ၵေႃႉတေႇငဝ်ႈၽၢၼ်ႇသၢင်းႁဵတ်းပဵၼ်ပၼ်ႁႃၵႄႈတႆး

ၾၢၵ်ႇၵႂၢမ်းထိုင် ၵူၼ်းမိူင်း လႄႈ ၵူၼ်းသိုၵ်း SSPP ႁႂ်ႈႁူႉႁၼ်သေၵမ်း

ၸုမ်းသိုၵ်း SSPP ၵေႃႉတေႇငဝ်ႈငႃႇႁဵတ်းႁႂ်ႈပဵၼ်မႃးပၼ်ႁႃၵႄႈၵၢင်တႆးႁဝ်း ဝႃႈၼႆၵေႃႈ တိုၼ်းတေဢမ်ႇၽိတ်း။ ပၼ်ႁႃဢၼ်ပဵၼ်ယူႇၼႂ်းမိူင်းတႆးႁဝ်း ၶၢဝ်းတၢင်းလၢႆဝူင်ႈမႃးၼႆႉ ၽၢႆႇၸုမ်းသိုၵ်း SSPP ဢမ်ႇယွမ်းႁပ်ႉတ၊င်းၽိတ်းသင် ဢမ်ႇယွမ်းႁပ်ႉလွင်ႈဢၼ်ပဵၼ်တေႉ ဢမ်ႇဝူၼ်ႉတႃႇ တေမူၼ်ႉမႄးၵႄႈလိတ်ႈ ပၼ်ႁႃတေႇတီႈငဝ်ႈငႃႇ ဢၼ်ပဵၼ်မႃးၼၼ်ႉသေ ၼင်ႇႁိုဝ်ပၼ်ႁႃၵႄႈၵၢင်တႆးႁဝ်း ပေႃးတေ ဢမ်ႇၸၢင်ႈမေႃယဝ်ႉမေႃဝၢႆးၼၼ်ႉၵေႃႈ ၶိုင်ၵူႈလၢႆး ဝၢႆးသေၶူဝ်းလၢႆး ထွႆထွၼ်ပၼ်ပွတ်းႁွင်ႇသေၵေႃႈယဝ်ႉ ပၢၼ်ႁႃတႆးတေႃႇတႆးႁဝ်းၵေႃႈ ႁိုဝ်တေၸၢင်ႈယဝ်ႉတူဝ်ႈ ယၢမ်းလဵဝ် ပၼ်ႁႃလၢမ်းမႃးထိုင် လၢႆးၶႃႈ ပၢင်လူင် ၵုၼ်ႁဵင် ၸဵမ်ၸိူဝ်းၼႆႉ ၼင်ႇႁဝ်းၶႃႈႁၼ်ၵၼ်မႃးႁင်းၽႂ်မၼ်းၶႃႈယဝ်ႉ။

ၶၢဝ်းတၢင်း 2−3 ဝူင်ႈမႃးၼႆႉ ယူႇတီႈၸုမ်းသိုၵ်း SSPP လႆႈၸတ်းသိုၵ်းမုတ်း လၵ်ႉငွႆးယိုဝ်း RCSS မႃးလၢႆပွၵ်ႈလၢႆၵမ်းသေ ၵူၺ်းၵႃႈ ၵၢဝ်ႇမၢပ်ႇၼေး တၢင်ႇတၢင်းၽိတ်းပၼ် RCSS ပဵၼ်ၵေႃႉၽိတ်းမႃးတႃႇသေႇ၊ ထိုင်မႃးမိူဝ်ႈၼႆႉဝၼ်းထီႉ 14 April 2023 ယူႇတီႈသိုဝ်ႇၶၢဝ်ႇ SSPP Info လႆႈတႅမ်ႈတၢင်ႇၶၢဝ်ႇ ၵၢဝ်ႇမၢပ်ႇၼေး ၵဵဝ်ႇလူၺ်ႈလွင်ႈၵၢၼ်တၢႆ ၸၢႆးၺႃႇ ၼႆႉသေ ၼေးဝႃႈ ၸၢႆးၺႃႇၼႆႉ ပဵၼ်ၽူႈႁၢပ်ႇၵၢၼ် ၼႂ်းမုၵ်ႉၸုမ်း RCSS ပဵၼ်ၸုမ်းၽၢႆႇႁၢင်ႈၵၢင်မၢၵ်ႇ ၼႆလႄႈ ထိုင်မႃးၼႂ်းဝၼ်းထီႉ 12-13 April 2023 ယူႇတီႈၸုမ်းသိုၵ်း SSPP/SSA လႆႈႁွင်ႉဢဝ်တူဝ် ၸၢႆးၺႃႇ ၵႂႃႇၶႃႈႁႅမ်ပႅတ်ႈ ၸဵမ်ၸိူဝ်းၼႆႉၵေႃႈ လႆႈႁၼ်မႃးတႂ်ႈတႃႁင်းၽႂ်မၼ်းၶႃႈယဝ်ႉ၊ ၸုမ်းသိုၵ်း SSPP ယင်းလႆႈၵၢဝ်ႇမၢပ်ႇၼေးသႂ်ႇမုၵ်ႉၸုမ်း RCSS/SSA ထႅင်ႈဝႃႈ လၵ်ႉႁၢင်ႈၵၢင်မၢၵ်ႇ လၵ်ႉငွႆးယိုဝ်းၸုမ်းၶဝ်ၼႆၼၼ်ႉ တိုၼ်းဢမ်ႇမၢၼ်ႇမႅၼ်ႈလႃးလႃး ၶႃႈတႄႉယုမ်ႇယမ်ၼင်ႇၼႆ၊ ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး တိုၼ်းဝႆႉၵူၼ်းမိူင်းလမ်ႇလွင်ႈလိူဝ်မုၵ်ႉၸုမ်းလူးၵွၼ်ႇ လၢႆးႁဵတ်းသၢင်ႈၸိူင်ႉၼႆၼႆႉ ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး တႄႉ တိုၼ်းဢမ်ႇဝူၼ်ႉတႃႇတေႁဵတ်း လႄႈ တိုၼ်းတေဢမ်ႇႁဵတ်း ၼင်ႇသိုဝ်ႇၶၢဝ်ႇၸုမ်းသိုၵ်းဝၢၼ်ႈႁႆး SSPP Info ၵၢဝ်ႇမၢပ်ႇၼေးၼၼ်ႉ ဢမ်ႇမၢၼ်ႇမႅၼ်ႈလႃးလႃး။

ဝၢႆးသေ ၸုမ်းသိုၵ်း SSPP ႁွင်ႉဢဝ်ဢူၺ်းလီၶဝ်သေမႃးၶဝ်ႈတဝ် ၼႂ်းမိူင်းတႆးႁဝ်းၶႃႈၵေႃႈ ဢမ်ႇတွၼ်ႉၵတ်းယဵၼ်မႃးသေပွၵ်ႈ ၵူၼ်းမိူင်းႁဝ်းၶႃႈလႆႈပၢႆႈၼီ ၵႂႃႇတၢင်ႇတီႈတၢင်ႇမိူင်း ၵူၼ်းမိူင်းႁဝ်းၶႃႈ ဢမ်ႇထၢင်ႇ ႁၢင်ႈႁဵတ်းႁႃၵိၼ်လဵင်ႉတွင်ႉၼႆႉၵေႃႈ ပဵၼ်ယွၼ်ႉၸုမ်းသိုၵ်း SSPP ႁွင်ႉဢဝ်ဢူၺ်းလီၶဝ်မႃး ၶဝ်ႈတဝ် လူလၢႆပေႉၵိၼ်ၵူၼ်းႁဝ်းၼၼ်ႉၶႃႈယဝ်ႉ၊ ယူႇတီႈမုၵ်ႉၸုမ်းၶွင်သီႇဢဝ်ၶိုၼ်းၸိုင်ႈတႆးတႄႉ ဝူၼ်ႉတေႃႇ ၼႃႈပေႃႈမႄႈၵူၼ်းႁဝ်း ၶႃႈသေ လႆႈၶတ်းၸႂ်ငိူင်ႉဝႄႈ လွင်ႈဢၼ်တေၸၢင်ႈတုမ်ႉတိုဝ်ႉ ၵုင်ႇသိၵ်ႈၶႃႇတၢင်ႇမူႇ တၢင်ႇၸုမ်းမႃးတႃႇသေႇ လွင်ႈၼႆႉၵူၼ်းမိူင်းႁဝ်းၶႃႈ တေႁၼ်ၵၼ်မႃးႁင်းၽႂ်ႁင်းမၼ်းၶႃႈယဝ်ႉ။

SSPP ဢူၺ်ႉႁူပွင်ႇတႃလႅင်းလႆႈယဝ်ႉ ဢမ်ႇမီးၸၢဝ်းၶိူဝ်းလႂ် ဢၼ်တေၶႂ်ႈႁူမ်ႈႁွမ်းၸွမ်း ၸုမ်း SSPP ၵႂႃႇၶၢဝ်းႁိုင်လႃးလႃး ၽႂ်ၽႂ်ၵေႃႈႁူႉၵႃႈတိုၼ်းၶႂ်ႈမီးဢႃႇၼႃႇပူၵ်းပွင်ၶိုၼ်းၸိူဝ်ႉၶိူဝ်းႁင်းၽႂ်မၼ်းယဝ်ႉ၊ ပိူၼ်ႈဢဝ်ၶေႃႈဢၢင်ႈဢၼ်ၼႆႉသေ ၶိုင်ႁဵတ်းႁႂ်ႈတႆးႁဝ်းၶႃႈတႅၵ်ႇငၢၵ်ႈၵၼ် ပိူၼ်ႈႁဵတ်းႁႂ်ႈႁဝ်း ႁၼ်ၽိတ်းၵၼ် ပေႃးႁဝ်းပီႈၼွင်ႉၼိူဝ်ႉလိူတ်ႈလဵဝ်ၵၼ် ၽိတ်းၵၼ် ႁူႉၵႃႈၸၢဝ်းၶိူဝ်းၶဝ်ၵေႃႈတိုၼ်းတေယွၼ်းၸႄႈမိူင်း ယွၼ်းတင်ႈၸိုင်ႈမိူင်းႁင်းၽႂ်မၼ်း၊ ႁဝ်းမႃးတူၺ်းၼႂ်းမိူင်းတႆးပွတ်းႁွင်ႇ ယၢမ်းလဵဝ် တႃႇတေပူၵ်းတင်ႈမႃးလႆႈၸႄႈမိူင်းမႃးၼၼ်ႉ TNLA လႆႈၶိုင်ၵူႈလွၵ်းၵူႈလၢႆး ၶတ်းၸႂ်ဢဝ်ႁႅင်းသိုၵ်း ႁိပ်ႇတူင်ႉၼိုင် ဢဝ်ၼႃႈတီႈ ၸွတ်ႇတူဝ်ႈဝႆႉ ၼႂ်းမိူင်းတႆးပွတ်းႁွင်ႇ ယၢမ်းလဵဝ် ၸုမ်းသိုၵ်း ဝ ၶဝ်လႆႈၶႂၢၵ်ႈဢဝ်တီႈယူႇ ၶၢမ်ႈၶူင်းလူင်းမႃးထိုင်ဝဵင်းလူင်လႃႈသဵဝ်ႈ တၢင်ႉယၢၼ်း လွင်ႈၼႆႉၵေႃႈ တေႁၼ်ၵၼ်မႃးႁင်းၽႂ်မၼ်းၶႃႈယဝ်ႉ။ ၸိူဝ်းပဵၼ်လုၵ်ႈၸုမ်းဢူၺ်းလီပွတ်းႁွင်ႇၼၼ်ႉ ပေႃးႁဝ်းမႃးၼပ်ႉသၢင်ႈတူၺ်း တေလႆႈႁၼ်ဝႃႈ ဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် ဢၼ်ၶႂ်ႈယူႇႁူမ်ႈႁွမ်းၸွမ်းတႆး ၸုမ်း SSPP ၊ လွင်ႈၼႆႉ ၸိူဝ်းၸႃႉပဵၼ်ၵူၼ်းလူင်တႆးႁဝ်း ၼႂ်းဝၢၼ်ႈႁႆး တေႁူႉလီ သေပိူၼ်ႈ ဝႃႈလႃးၵေႃႈႁူႉယူႇ တိုၼ်းပွႆႇႁႂ်ႈပဵၼ်ၵႂႃႇၸိူင်ႉၼၼ်ႁိုဝ် ၼႆႉၵေႃႈလီဝူၼ်ႉၵႄႈလိတ်ႈၵႂႃႇ။

ပဵၼ်ပူၼ်ႉမႃးၼႂ်းဝၼ်းထီႉ 23 February 2023 ၶၢဝ်ႇတပ်ႉသိုၵ်း TNLA ပွတ်းႁွင်ႇ လႆႈတႅမ်ႈမွၵ်ႇၵႂႃႇဝႃႈ ၸုမ်းၶဝ် လႆႈၸတ်းႁဵတ်းပၢင်ႁူပ်ႉထူပ်းၸၢဝ်းၶိူဝ်း ပိူဝ်ႈတႃႇပူၵ်းတင်ႈၼႃႈလိၼ်ၽွင်းငၢမ်းတူဝ်ၵဝ်ႇၼၼ်ႉ ႁဝ်းမႃးတူၺ်းပၢင်ႁူပ်ႉထူပ်းၵူၼ်းမိူင်းမီးၵႂႃႇ 6 ဢွင်ႈတီႈ ၼႂ်းၸေႊဝဵင်း မူႇၸေႊ၊ ၼမ်ႉၶမ်း ၊ မၢၼ်ႊတူင်ႈ လႄႈ ၵူတ်ႉၶၢႆ ၸဵမ်ၸိူဝ်းၼႆႉ ဝႃႈၼႆ။

ႁဝ်းမႃးတူၺ်းၶိုၼ်း ၼႂ်းလိူၼ် April 2023 ပူၼ်ႉမႃးၼႆႉ လႆႈႁၼ် သိုၵ်းဝ လႆႈၶႂၢၵ်ႈၼႃႈလိၼ် ၶၢမ်ႈၶူင်းလူင်းမႃးသဝ်းထင်ဝႆႉ ၼႂ်းမိူင်းတႆးပွတ်းႁွင်ႇ မိူင်းယေႃ ၸႄႈဝဵင်းလႃႈသဵဝ်ႈ တင်းၼမ် ၸိူဝ်းႁဝ်းႁႃး လွမ်ဝူၼ်ႉၸွမ်း ၵၢၼ်သိုၵ်းၼႂ်းဝၼ်းမိူဝ်ႈၼႆႉ မိူၼ်တေပဵၼ်ၽႅၼ်ၵၢၼ်တပ်ႉသိုၵ်းၸၢဝ်းၶိူဝ်း ၸိူဝ်းမီးႁႅင်းယႂ်ႇၶဝ်ဝႆႉလူဝ်လူဝ် ၵႃႈပူၼ်ႉမႃးတေလႆႈႁၼ်သိုၵ်းၸၢဝ်းၶိူဝ်းမၢင်ၸုမ်း ၶဝ်ႈႁႃၶွင်ႇသီႇသိုၵ်းမၢၼ်ႈသေ ထူဝ်းသိုၵ်းၶဝ်ႈမႃးၼႂ်းမိူင်းတႆးပွတ်းၸၢၼ်း လႄႈ ပွတ်းဢွၵ်ႇ ယၢမ်းလဵဝ်သမ်ႉ မႅၵ်ႇၶႃၸုမ်းဢူၺ်းလီပွတ်းႁွင်ႇသေ ထူဝ်းသိုၵ်းၶၢမ်ႈၶူင်းၶဝ်ႈတဝ်ၼႂ်းမိူင်းတႆးပွတ်းႁွင်ႇ ဝၢႆးၼႆႉမႃး ၸိူဝ်းၶဝ်ႁိုဝ် တေယွၼ်ႇယွမ်းထွႆဢွၵ်ႇပၼ်ႁဝ်းလႃႇ ထႅင်ႈလွင်ႈၼိုင်ႈၵေႃႈ တေလႆႈဝႃႈ ယွၼ်ႉဢတ်ႉတ၊ မႃႇၼ၊ တေႃးသ၊ မေႃးႁ တႆးႁဝ်း ၽၢၼ်ႇသၢင်ႈ ႁဵတ်းပဵၼ်ဢဝ်ၵူၺ်း ဝႃႈၼႆၵေႃႈ တိုၼ်းတေဢမ်ႇၽိတ်းသင်။

ၸွမ်းၼင်ႇၵဝ်ၶႃႈပဵၼ်ၵူၼ်းမိူင်းတႆးၵေႃႉၼိုင်ႈသေ ၶႂ်းတုၵ်းယွၼ်းထိုင်ၸုမ်းသိုၵ်း SSPP ဝႃႈ “ၶႂ်ႈႁႂ်ႈၸုမ်း SSPP ႁဝ်းၶႃႈ ဢဝ်မၢၵ်ႇတႃၵၢၼ်ၸိူဝ်ႉၸၢတ်ႈ ဢဝ်မၢၵ်ႇတႃပၺ်ႇၺႃႇ ဢဝ်မၢၵ်ႇတႃၸိူဝ်ႉၶိူဝ်း ဢဝ်မၢၵ်ႇတႃသုၼ်ႇလႆႈၵူၼ်းမိူင်းတႆးႁဝ်းသေၵမ်းၶႃႈဢေႃႈ” ၵၢင်ၸႂ်ၵူၼ်းမိူင်းတႆးၵေႃႉၼိုင်ႈ ၶႂ်ႈတိုၵ်းသူၼ်းထိုင် ၸုမ်းသိုၵ်း SSPP ႁႂ်ႈႁူပွင်ႇတႃလႅင်း မီးၸိူင်ႉၼင်ႇၼႆၶႃႈ မႂ်ႇသုင်တင်းသဵင်ႈၶႃႈ။

သိူဝ်တေႁွင်ႉ
ၵူၼ်းမိူင်းသီႇပေႃႉ ၵေႃႉ႞