မိူဝ်ႈဝၼ်းထီႉ 8 July 2022(လိူၼ်ပႅတ်ႇမႂ်ႇ 11 ၶမ်ႈ ပီတႆး 2116 ၼီႈ) ၵျူဝ်းပၢႆႇတဵၼ်ႇ ၸွမ်ၸိုင်ႈဢ‌မေႇရိၵၢၼ်ႇ လၢတ်ႈ သင်ႇလူတ်းၸွမ်ပိဝ် လူင်းၼိုင်ႈၶိုင်ႈ တေႃႇထိုင်ဝၼ်းထီႉ 10 July 2022 ၼႆႉ ‌တႃႇပဵၼ်ၵၢၼ်ယိၼ်းမွင်ၸႂ်ၸွမ်း Shinzo Abe ၸွမ်ၽွင်းလူင် (ၵေႃႉၵဝ်ႇ) မိူင်းၵျႃႇပၢၼ်ႇဢၼ် ထုၵ်ႇၺႃး လၵ်ႉယိုဝ်းၽွင်းႁႃသဵင် ဝႃႈၼႆ။

Shinzo Abe ၼႆႉပဵၼ် ၸွမ်ၽွင်းလူင် (ၵေႃႉၵဝ်ႇ) ႁိုင်ၼၢၼ်းလိူဝ်သေပိူၼ်ႈ ၼႂ်းမိူင်းၵျႃႇပၼ်ႇ ‌‌လႄႈ ၽွင်းႁႃသဵင်ယူႇၼၼ်ႉ ၺႃးလၵ်ႉယိုဝ်းတင်းလင်လႄႈ ႁဵတ်းႁႂ်ႈမၼ်းၸၢႆးလူႉသဵင်ႈသၢႆၸႂ်ၵႂႃႇ ၼႂ်းဝၼ်းထီႉ 8 July 2022 ၼၼ်ႉလႄႈ ႁဵတ်းႁႂ်ႈၵူၼ်းမိူင်းၵျႃႇပၢၼ်ႇ တူၵ်းၸႂ်ၵူဝ်ႁေၵႂႃႇတေႉတေႉ၊ ယွၼ်ႉဝႃႈ မိူင်းၵျႃႇပၢၼ်ႇၼႆႉ မီးပၵ်းပိူင်ႁေႉႁၢမ်ႈ ၵၢၼ်ယိပ်းၵွင်ႈၵၢင်ႇၼၵ်းၼႃဝႆႉယူႇလႄႈ ၵူၼ်းတင်းၼမ်ယင်း ဢမ်ႇဝူၼ်ႉမႅၼ်ႈၺႃးဝႃႈပၼ်ႁႃၼႆႉ တေပဵၼ်မႃးလူးၵွၼ်ႇ ဝႃႈၼႆ။

Shinzo Abe ၼႆႉမီးဢႃႇယု 67 ပီႊ လႄႈဝၢႆးထုၵ်ႇၺႃးလၵ်ႉယိုဝ်း လင် 5 ၸူဝ်ႈမွင်း ၵေႃႈလႆႈ လူႉသဵင်ႈသၢႆၸႂ်ၵႂႃႇယဝ်ႉ ၽၢႆႇပလိၵ်ႈႁၢၼ်ၶဝ်တီႉၺွပ်းဝႆႉ ၵူၼ်းၵေႃႉထုၵ်ႇထၢင်ႇထိူမ် ဝႃႈပဵၼ် ၵေႃႉလၵ်ႉ လွမ်ယိုဝ်း ၸွမ်ၽွင်းလူင် (ၵေႃႉၵဝ်ႇ) မိူင်းၵျႃႇပၢၼ်ႇ ၼၼ်ႉယဝ်ႉ ဝႃႈၼႆ။

တႆးလွတ်ႈလႅဝ်း