ၵွပ်ႈၸုမ်းသိုၵ်း SSPP ၶဝ် ၵဵပ်းသိုၵ်းမႂ်ႇႁၢဝ်ႈႁႅင်းလႄႈ ၵူၼ်းၼႂ်းၸႄႈဝဵင်းၵျွၵ်းမႄး ၊ ၼမ်ႉတူႈ မီးလွင်ႈယၢပ်ႇၽိုတ်ႇ လႆႈပၢႆႈၼမ်

ၵွပ်ႈၸုမ်းသိုၵ်းလေႃးလႄး ၶဝ်ႈၵဵပ်းၶွၼ်ႇႁၢဝ်ႈႁႅင်း ၽၢႆႇၼိုင်ႈ၊ ၸုမ်းသိုၵ်း SSPP ၶဝ်ၵေႃႈသမ်ႉ ဢထမ်ႇမတီႉၺွပ်းၵူၼ်းမိူင်း၊ ၵဵပ်းသိုၵ်းမႂ်ႇႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းၼႂ်းၸႄႈဝဵင်းၵျွၵ်းမႄး လၢႆလၢႆဢိူင်ႇ မီးလွင်ႈယၢပ်ႇၽိုတ်ႇၵိၼ်းၸႂ် တႄႉတႄႉ ဝႃႈၼႆ။

မိူဝ်ႈဝၼ်းထီႉ 10 April 2022 (လိူၼ်ႁႃႈမႂ်ႇ 10 ၶမ်ႈ ပီႊတႆး 2116 ၼီႈ) ၵူၼ်းမိူင်းၼႂ်းပိုၼ်ႉတီႈပွင်ႇၶၢဝ်ႇမႃးဝႃႈ “ၵွပ်ႈၸုမ်းသိုၵ်း SSPP ၶဝ် ဢထမ်ႇမ ၵဵပ်းသိုၵ်းမႂ်ႇႁၢဝ်ႈႁႅင်းလႄႈသင်၊ ၶၼ်ၵုၼ်ႇၵႃႉတၢင်းၶၢႆၵေႃႈၶိုၼ်ႈသုင်မႃးလႄႈသင်၊ ၸုမ်းသိုၵ်းလေႃးလႄးၵဵပ်းၶွၼ်ႇႁၢဝ်ႈႁႅင်းလႄႈသင်၊ လိူဝ်ၼႆႉဢမ်ႇၵႃး ၽၢႆႇၾႆးၾႃႉၶဝ်ၵေႃႈ ၵဵပ်းငိုၼ်းႁၢဝ်ႈႁႅင်းလႄႈ ၵူၼ်းမိူင်းၼႂ်းၸႄႈဝဵင်းၵျွၵ်ႉမႄး မီးလွင်ႈယၢပ်ႇၽိုတ်ႇၵိၼ်းၸႂ်တႄႉတႄႉ” ဝႃႈၼႆ။

ယင်းသိုပ်ႇလၢတ်ႈထႅင်ႈဝႃႈ “လွင်ႈဢၼ်ၸုမ်းသိုၵ်း SSPP ၶဝ် ဢထမ်ႇမတီႉၺွပ်း ၵူၼ်းမိူင်း လႄႈ ၵဵပ်းသိုၵ်းႁၢဝ်ႈႁႅင်းၼႆႉ ႁဵတ်းႁႂ်ႈၵူၼ်းၼုမ်ႇၵူၼ်းၵမ်ၶဝ် ပၢႆႈ ၵႂႃႇတၢင်ႇမိူင်း တင်းၼမ်လႄႈ လိူဝ်သေၼၼ်ႉ ၶၼ်ၵုၼ်ႇၵေႃႈၶိုၼ်ႈလႄႈ တႃႇတေဢွၵ်ႇဢလၢင်းႁဵတ်းသူၼ်ႁႆႈၼႃးၵေႃႈ ဢမ်ႇပႄႉၵႃႈမၼ်းလႆႈယဝ်ႉ ထႅင်ႈၽၢႆႇၼိုင်ႈတၢင်းၵေႃႈ မိူဝ်ႈပူၼ်ႉမႃး 7-8 ဝၼ်းၼႆႉ ၽၢႆႇၾႆးၽႃႉၶဝ် လူင်းၵဵပ်းငိုၼ်းဝႆႉထႃႈလူင်ႈၼႃႈ တႃႇၶၢဝ်းတၢင်းၼႃႈ 10 လိူၼ်ၼႆသေ ၵူၼ်းမိူင်းၶဝ်လႆႈသႂ်ႇၵႃႈၾႆး 50,000 ပျႃး မၢင်ႁိူၼ်းလႆႈသႂ်ႇထိုင် 70,000 ပျႃး ၵွၼ်ႇ လင်ၸိူဝ်းဢၼ်မီး ၸၢၵ်ႈဢိတ်ႇၶဝ်ႈၼၼ်ႉၶႅၼ်ႈၼႃႇ လႆႈသႂ်ႇထိုင် 50 သႅၼ်ပျႃး လူးၵွၼ်ႇ ပေႃးဢမ်ႇယွမ်းသႂ်ႇပၼ်ၵေႃႈ ၶဝ်မွတ်ႇပႅတ်ႈၾႆးၼၼ်ႉၶႃႈၼႃႇ မိူၼ်ၼင်ႇၼႂ်းဢိူင်ႇမိူင်းတၢင်ႈ ၸႄႈဝဵင်းၵျွၵ်းမႄးၼႆႉ ၺႃးတတ်းၶၢတ်ႇလႅင်းၽူင်းပႃး” ၼႆယဝ်ႉ။

သိုပ်ႇလၢတ်ႈထႅင်ႈဝႃႈ “လိူဝ်သေၸိူဝ်းၼႆႉယဝ်ႉ ၸုမ်းသိုၵ်းလေႃးလႄးၶဝ်သမ်ႉ ၵဵပ်းၶွၼ်ႇႁၢဝ်ႈႁႅင်း ပေႃးပဵၼ်ထေႃႈပဵၼ်ၵႃး ဢၼ်ၸႂ်ႉၵၢၼ်ၵျၢမ်းၼၼ်ႉ လႆႈသႂ်ႇပၼ်ၶဝ် 50,000 မိုၼ်ႇပျႃး၊ ၸုမ်းၶူဝ်းၶဵဝ် SSPP ၶဝ်သမ်ႉယွၼ်းထႅင်ႈ 1 လမ်းၼႆႉ 25,000 ပျႃး ပေႃးမႃးႁူမ်ႈလေႃးၵၼ် တင်းဢၼ်သိုၵ်းလေႃးလႄးၶဝ် ယွၼ်းၼၼ်ႉ တူၵ်းယူႇ 1 လမ်း 75,000 ပျႃးယဝ်ႉ၊ လိူဝ်သေၼၼ်ႉ ၼႂ်းလၢႆဝၼ်းၼႆႉ ၶဝ်ယင်းႁွင်ႉၵူၼ်းမိူင်း ႁဵတ်းပၢင်ၵုမ်ထႅင်ႈယူႇသၢမ်ပွၵ်ႈ ၊  1. ၶဝ်ႁွင်ႉဢုပ်ႇလွင်ႈ ၵဵပ်းၶွၼ်ႇထေႃႈၵႃး၊ 2. ၶဝ်ႁွင်ႉဢုပ်ႇလွင်ႈၵဵပ်းၶွၼ်ႇ ၵူၼ်းၸိူဝ်းၶၢႆလၢၼ်ႉၶၢႆၵုၼ်ႇ၊ 3. ၶဝ်ႁွင်ႉဢုပ်ႇလွင်ႈၵဵပ်းသိုၵ်းမႂ်ႇ ၸိူဝ်းၼႆႉၶႃႈဢေႃႈ” လၢတ်ႈၼႄၼင်ႇၼႆ။

ၵူၼ်းမိူင်း ပွတ်းပၢင်လူင် ၵေႃႉၼိုင်ႈလၢတ်ႈၼႄဝႃႈ ” ၵွပ်ႈၶဝ်ၵဵပ်းသိုၵ်းႁၢဝ်ႈႁႅင်းလႄႈ ၵူၼ်းမိူင်းဢမ်ႇဝႃႈၵူၼ်းၼုမ်ႇၵူၼ်းၵမ် ဢိၵ်ႇပႃးၶိင်းႁဵင်ၸိူဝ်းၼႆႉ ဢွၼ်ၵၼ်ပၢႆႈ ၶႃႈဢေႃႈ ဢမ်ႇၸၢင်ႈဝႃႈႁိုဝ်ယဝ်ႉၶႃႈ ၵူၼ်းၸိူဝ်းဢၼ်ၶဝ်တီႉၺွပ်းၵႂႃႇၼၼ်ႉၵေႃႈ ပေႃႈမႄႈပီႈၼွင်ႉမၼ်း ၶိုၼ်းၵႂႃႇယွၼ်းၶႂၢင်ႉဝႆႉယူႇ ဝႃႈတေၶၢမ်ႇသႂ်ႇပၼ်ငိုၼ်းဢဝ် ၽၢႆႇၸုမ်းသိုၵ်း SSPP ၶဝ်တႄႉတွပ်ႇဝႃႈ တေလႆႈပႂ်ႉထွမ်ႇတၢင်းၼိူဝ်ၵွၼ်ႇ ဝႃႈတေႁပ်ႉငိုၼ်းႁႃႉ ဢဝ်ၵူၼ်းၼႆၼၼ်ႉ မီးတီႈတၢင်းၼိူဝ်ၵူၺ်း” ဝႃႈၼႆ။

ၼႂ်းၸႄႈဝဵင်းၵျွၵ်းမႄးၼႆႉ ၵွပ်ႈမီးလွင်ႈယၢပ်ႇၽိုတ်ႇလၢႆလွင်ႈလၢႆတၢင်းလႄႈ တႄႇၼႂ်းပီႊ 2022 မႃးၼႆႉ ၵူၼ်းမိူင်းၼႂ်းၸႄႈဝဵင်းၵျွၵ်းမႄး ဢွၼ်ၵၼ်ၸုၼ်ႉပွႆႇပႅတ်ႈႁိူၼ်းယေး သူၼ်ႁႆႈၼႃးသေ ပၢႆႈၶဝ်ႈမိူင်းထႆး ၊ မိူင်းၶႄႇ တၢင်းၼမ်တၢင်းလၢႆသေ တေႃႈၼင်ႇၼၼ် ပွတ်းၸႄႈဝဵင်းၼမ်ႉတူႈၵေႃႈ ဢမ်ႇပေႃးပၢႆႈပိူင်ႈၵၼ်  ၼႆယဝ်ႉ။

တႆးလွတ်ႈလႅဝ်း