ၵၢၼ်မၵ်းတမ်းၵႃႈၶၼ်ၼမ်ႉမၼ်းရၢတ်ႉသျႃးၼၼ်ႉ တေတုမ်ႉတိူဝ်ႉထိုင်ပၢႆးမၢၵ်ႈမီးလုမ်ႈၾႃႉ

ၽွင်းလူင်ၽၢႆႇၽၼ်ႇတႃႇငိုၼ်းတွင်း ဢိၼ်ႇတူဝ်ႇၼီးသျႃး လၢတ်ႈဝႃႈ လွင်ႈဢမေႇရိၵၢၼ်ႇ မၵ်းတမ်းၵႃႈၶၼ်ၼမ်ႉမၼ်းရၢတ်ႉသျႃး ဢၼ်သူင်ႇဢွၵ်ႇၶၢႆၼၼ်ႉ တေတုမ်ႉတိူဝ်ႉတေႃႇ ပၢႆးမၢၵ်ႈမီးလုမ်ႈၾႃႉမႃး ၼႆယူႇ။

ၽွင်းလူင်ၽၢႆႇၽၼ်ႇတႃႇငိုၼ်းတွင်း ဢိၼ်ႇတူဝ်ႇၼီးသျႃး လၢတ်ႈတီႈသိုဝ်ႇၶၢဝ်ႇ Bloomberg ဝႃႈ လူင်ပွင်ၸိုင်ႈ ဢမေႇရိၵၢၼ်ႇ ဢၼ်ယူႇၽၢႆႇတႂ်ႈ ၵျူဝ်းပၢႆႇတႅၼ်ႇဢွၼ်ႁူဝ်ၼၼ်ႉ တေၶတ်းၸႂ်မိပ်ႇဢီး ၶၵ်ႉတွၼ်ႈၵၢၼ်မၵ်းတမ်း ၵႃႈၶၼ်ၼမ်ႉမၼ်း ဢၼ်လုၵ်ႉဢဝ်တီႈရၢတ်ႉသျႃး သူင်ႇဢွၵ်ႇၼၼ်ႉသေ တေတုမ်ႉတိူဝ်ႉတေႃႇၶူဝ်းၶွင် ၵုၼ်ႇၵႃႉတၢင်းၶၢႆလၢႆလၢႆလွင်ႈမႃး လႄႈ တေၸၢင်ႈႁဵတ်းႁႂ်ႈ ပၢႆးမၢၵ်ႈမီးလုမ်ႈၾႃႉၼၼ်ႉ ႁၢင်ႈႁၢႆႉမႃးထႅင်ႈလိူဝ်ၵဝ်ႇ ဝႃႈၼႆ။

သိုပ်ႇလၢတ်ႈထႅင်ႈဝႃႈ မိူဝ်ႈဢမေႇရိၵၢၼ်ႇ ဢဝ်ၵၢၼ်ပၢႆးမၢၵ်ႈမီးပဵၼ်ၶိူင်ႈမိုဝ်း ၼႂ်းၵၢၼ်ၶွမ်ႈသပိတ်ႈ ႁႂ်ႈပဵၼ်ပိူင်တႅၵ်ႈတွၼ်ႈတႃႇၵူႈလွင်ႈၼႆၼၼ်ႉ တေႁဵတ်းႁႂ်ႈ မီးလွင်ႈဢမ်ႇၼႄႉဢမ်ႇၼွၼ်း ၵဵဝ်ႇလူၺ်ႈပၢႆးမၢၵ်ႈမီးၼၼ်ႉၸွမ်းမႃးတၢင်းလင်ထႅင်ႈယူႇ၊ ဢမ်ႇၵွမ်ႉၵႃးဢိၼ်ႇတူဝ်ႇၼီးသျႃးၵူၺ်း တူဝ်ႈတင်းလုမ်ႈၾႃႉၵေႃႈ တေထူပ်းလွင်ႈလိူတ်ႇမႆႈမႃး ၼႆယဝ်ႉ။

လိူဝ်သေၼၼ်ႉ ယင်းလၢတ်ႈထႅင်ႈဝႃႈ ၵၢၼ်မၵ်းတမ်းၵႃႈၶၼ်ၼမ်ႉမၼ်းၼၼ်ႉ တေတုမ်ႉယွၼ်ႈႁႂ်ႈ Saudi Arabia လႄႈ OPEC Plus ၶဝ် တႅပ်းတတ်း တႃႇလူတ်းယွမ်း ၵၢၼ်ႁဵတ်းဢွၵ်ႇၼမ်ႉမၼ်းမႃးထႅင်ႈ ၼင်ႇႁိုဝ်တေယႃႉလူႉ တၢင်းမုင်ႈမွင်းတီႈႁိူၼ်းႁေႃၶၢဝ် ဢၼ်ၶတ်းၸႂ်လူတ်းယွမ်းၵႃႈၶၼ်ၼမ်ႉမၼ်းလူင်းႁႂ်ႈလႆႈ ဢွၼ်တၢင်းတေထိုင်ပၢင်လိူၵ်ႈတင်ႈ ၼႂ်းလိူၼ်ၼႃႈၼႆႉ ၼႆယူႇ။

လွင်ႈတၢင်းဢၼ်ဢမေႇရိၵၢၼ်ႇ ၶတ်းၸႂ်မၵ်းတမ်းၵႃႈၶၼ်ၼမ်ႉမၼ်း တီႈရၢတ်ႉသျႃးၼၼ်ႉၵေႃႈ တႃႇတတ်းၶၢတ်ႇပႅတ်ႈငိုၼ်းၶဝ်ႈၶွင်ရၢတ်ႉသျႃး ႁႂ်ႈလူတ်းယွမ်း ငိုၼ်းၵမ်ႉထႅမ် တႃႇတူင်ႉၼိုင်ႁဵတ်းသၢင်ႈၼႂ်းယူႇၶရဵၼ်းၼၼ်ႉလႄႈ ပဵၼ်မႃးလွင်ႈတၢင်းဢၼ်ႁဵတ်းႁႂ်ႈ ၵႃႈၶၼ် ႁႅင်းထၢတ်ႈလႄႈ ၶဝ်ႈၼမ်ႉတၢင်းၵိၼ်သုင်ၶိုၼ်ႈ ၼၼ်ႉယဝ်ႉ။

ၸိူင်ႉႁိုဝ်ၵေႃႈလီ ပႅၵ်ႉသမ်ႉဝႃႈ ၸုမ်း G-7 တေၵမ်ႉထႅမ်လွင်ႈပၼ်တၢမ်ႇ လွၵ်းလၢႆးဢမေႇရိၵၢၼ်ႇၵေႃႈယဝ်ႉ ယင်းမီးမိူင်းဢၼ်မီးဢႃႇၼႃႇဢၢမ်းၼၢတ်ႈ မိူၼ်ၼင်ႇ ၶႄႇ၊ ဢိၼ်းတီးယႃး ၸိူဝ်းၼႆႉ ယင်းပဵၼ်ၽူႈႁပ်ႉသိုဝ်ႉၸဝ်ႈယႂ်ႇၶွင်ရၢတ်ႉသျႃးဝႆႉယူႇ ဝႃႈၼႆ။

တႆးလွတ်ႈလႅဝ်း