ၵၢၼ်ႁၵ်ႉၶိူဝ်း ၵူၼ်းၼုမ်ႇဝၼ်းမိူဝ်ႈၼႆႉ လႄႈၶေႃႈပူၵ်းတိုၼ်ႇ ၸွမ်သိုၵ်းလူင် ယွတ်ႈသိုၵ်း

ၸွမ်းၼင်ႇတႃႁၼ်တူဝ်ထူပ်းလႄႈသင် ၸွမ်းၼင်ႇလႆႈႁူႉငိၼ်းမႅၼ်ႈလႄႈသင် ၼႂ်းဝၼ်းမိူဝ်ႈၼႆႉ လႆႈႁၼ်ၼုမ်ႇယိင်း၊ ၼုမ်ႇၸၢႆး ပႃးၸႂ်သႂ်ႇၶေႃး ၼိူဝ်ၵၢၼ်ၸိူဝ်ႉၸၢတ်ႈမႃးၼမ်တႄႉတႄႉ၊ ၵူၼ်းၼုမ်ႇၼႆၼၼ်ႉ ဢမ်ႇလႆႈမၢႆထိုင်ၵူၼ်းၼုမ်ႇတႆးၵူၺ်း ၵူၼ်းၼုမ်ႇတၢင်ႇၶိူဝ်းၵေႃႈ သႂ်ႇၸႂ်ၼိူဝ်ၸိူဝ်ႉၸၢတ်ႈၶဝ်မိူၼ်ၵၼ်ယဝ်ႉ ယွၼ်ႉၼၼ်လႄႈ ဢၼႃႇၵၢတ်ႈဝၢၼ်ႈမိူင်းမိူဝ်းၼႃႈ တေပဵၼ်မႃးၸိူင်ႉႁိုဝ်ၼႆၼၼ်ႉ သမ်ႉပေႃးမုင်ႈႁၼ်ဝႆႉယူႇယဝ်ႉ။

ၽူႈမီးတၢင်းႁူႉၶဝ်လၢတ်ႈဝႆႉဝႃႈ “တႃႇမိူင်းၼိုင်ႈမိူင်း ပေႃးတေၶိုၼ်ႈသင်ႉပဵင်းပိူၼ်ႈၼၼ်ႉ ၽူႈယႂ်ႇဝၼ်းမိူဝ်ႈၼႆႉ လူဝ်ႇလႆႈမေႃပူၵ်းပွင်ပၼ်ၼမ်ႉၵတ်ႉၵူၼ်းၼုမ်ႇလႄႈ သင်ႇသွၼ်ပၼ်ၶဝ် ႁႂ်ႈၶဝ်ပေႃးမေႃႁၵ်ႉၸိူဝ်ႉႁၵ်ႉၶိူဝ်းၵွၼ်ႇ’’  ၼႆယဝ်ႉ ဝၢၼ်ႈမိူင်းမိူဝ်းၼႃႈတေၶိုၼ်ႈယႂ်ႇႁိုဝ်တူၵ်းတႅမ်ႇ မၼ်းယူႇတီႈၵူၼ်းၼုမ်ႇ ၼႂ်းဝၼ်းမိူဝ်ႈၼႆႉ ဝႃႈၼႆသေတႃႉ ပိူင်လူင်မၼ်းသမ်ႉ ယူႇတီႈၽူႈယႂ်ႇၶဝ် သင်ႇသွၼ်ပူၵ်းပွင်ပၼ်ၸိူင်ႉႁိုဝ်ၼၼ်ႉယဝ်ႉ၊ ၵူၼ်းၼုမ်ႇၼႆႉ မိူၼ်ၼင်ႇ ၽႅၼ်ႇသီၶၢဝ်ၽိုၼ်ၼိုင်ႈသေ ဢဝ်သီသင်မႃးယွမ်ႉၵေႃႈ တေပဵၼ်သီၼၼ်ႉၵႂႃႇယူႇ။

ငဝ်းလၢႆးၵူၼ်းၼုမ်ႇ ဝၢႆးသိုၵ်းမၢၼ်ႈပိုၼ်ၽၢဝ်ႇၵဵပ်းသိုၵ်း

မိူဝ်ႈဝၼ်းထီ့ 10 လိူၼ် February ႁူဝ်ပီႊ 2024 ၼၼ်ႉ ၸုမ်းသိုၵ်းမၢၼ်ႈၶဝ်တႄႇပိုၼ်ၽၢဝ်ႇ မၵ်းမၼ်ႈၸႂ်ႉတိုဝ်းမၢႆမီႈၵဵပ်းသိုၵ်းၵူၼ်းမိူင်း ၸိူဝ်းဢႃႇယုတဵမ် 18 ထိုင် 35 တၵ်းတေလႆႈႁၢပ်ႇထၢမ်းၵၢၼ်သိုၵ်း ၼႂ်းၸုမ်းသိုၵ်းမၢၼ်ႈ ၵူႈၵေႃႉဝႃႈၼႆႉသေ ၼ်ႂးပိူင်ၶဝ်ပႃးဝႆႉဝႃႈ ပေႃးပဵၼ်ၵူၼ်းမိူင်းယူဝ်းယူဝ်း ၽူႈၸၢႆး ဢႃႇယု 18 ထိုင် 35 ပီႊ ပေႃးပဵၼ်ၽူႈယိင်း ဢႃႇယု 18 ထိုင် 27 ပီႊ ပေႃးသမ်ႉပဵၼ် ၵူၼ်းၸိူဝ်းမီး ပၺ်ႇၺႃႇတၢင်းမေႃ မိူၼ်ၼင်ႇ ၽၢႆႇမေႃယႃ၊ ၽၢႆႇဢိၼ်ႊၵျိၼ်ႊၼီႊယႃႊ လႄႈပၺ်ႇၺႃႇတၢင်း မေႃတၢင်ႇပိူင်ၸိုင် ၽူႈၸၢႆးဢႃႇယု 18 ထိုင် 45 ပီႊ ၽူႈယိင်းဢႃႇယု 18 ထိုင် 35 ပီႊ ၼႆယဝ်ႉ။

မၢႆမီႈၵဵပ်းသိုၵ်းဢၼ်ၼႆႉ ဢမ်ႇၸႂ်ႈဝႃႈ ၸင်ႇႁႃမီးမႃးၼႂ်းပီႊ 2024 ၼႆႉၵူၺ်း  ယူႇတီႈၸွမ်ၸိၵ်းသိုၵ်းမၢၼ်ႈ တၢၼ်းသူၺ်ႇ လူင်းလၢႆးမိုဝ်းပိုၼ်ၽၢဝ်ႇဝႆႉ ၸဵမ်မိူဝ်ႈဝၼ်းထီ့ 4 November, 2010 ပူၼ်ႉမႃး 14 ပီႊပုၼ်ႉသေ မိၼ်းဢွင်ႇလၢႆႇ ၸင်ႇမႃးပိုၼ်ၽၢဝ်ႇမၵ်းမၼ်ႈၸႂ်ႉပဵၼ်တၢင်းၵၢၼ် ၼႂ်းပီႊ 2024 ၼႆႉ ၽွင်းဢၼ်သၢႆငၢႆငဝ်းလၢႆးသိုၵ်းမၢၼ်ႈ ၸမ်တေလူမ်ႉၸူမ်ၼႆႉယဝ်ႉ။

မိူဝ်ႈၶဝ်တႄႇပိုၼ်ၽၢဝ်ႇၼၼ်ႉ ယူႇတီႈၽူႈၶၢၼ်ပၢၵ်ႇသိုၵ်းမၢၼ်ႈတႄႉလၢတ်ႈဝႃႈ တႃႇၼိုင်ႈၸုပ်ႈၼႆႉ တေၵဵပ်းၼိုင်ႈဢိူင်ႇၼိုင်ႈပွၵ်ႉလႂ် 2-3 ၵေႃႉၼႆသေ ပိုၼ်ႉတီႈၼိုင်ႈလႄႈတီႈၼိုင်ႈဢမ်ႇမိူၼ်ၵၼ် မၢင်တီႈၵဵပ်းဢေႇ မၢင်တီႈၵေႃႈၵဵပ်းၼမ် ဝၢႆးၼၼ်ႉမႃးၶဝ်ၶိုၼ်းၵဵပ်း ၼိုင်ႈဢိူင်ႇၼိုင်ႈပွၵ်ႉလႂ် 150 ၵေႃႉ ထိုင် 170 ၼႆႉၵေႃႈမီး၊ ၸွမ်းၼင်ႇပိူင်ၶဝ်တမ်းၼၼ်ႉ သင်ဢမ်ႉႁဵတ်းၸွမ်း တၵ်းတေၺႃးတၢမ်ႇၶွၵ်ႈ 3 ပီႊၼႆသေ ႁဵတ်းႁႂ်ႈၵူၼ်းၼုမ်ႇၶဝ်ႈၵူႈတီႈၵူႈတၢင်း ဢွၼ်ၵၼ်တိုၼ်ႇၵူဝ်ၵၼ် သိုၵ်းမၢၼ်ႈၵေႃႈဢမ်ႇၶႂ်ႈႁဵတ်း တေပၢႆႈၵေႃႈသေလၢႆတီႈယူႇတၼ်းသဝ်း တေဢမ်ႇပၢႆႈၵေႃႈ ၵူဝ်လႆႈတူၵ်းၶွၵ်ႈၼႆသေ ၸင်ႇဢွၼ်ၵၼ်ႁႃလၢႆးလွတ်ႈၽႂ်မၼ်း မၢင်ၸိူဝ်းပၢႆႈဢွၵ်ႇမိူင်း မၢင်ၸိူဝ်းၵေႃႈဢဝ်တိုဝ်ႉတၢင်းၼႆႉသေ ၶဝ်ႈႁၢပ်ႇၵၢၼ်သိုၵ်းတႃႇတွပ်ႇၵုင်ႇၽႅၼ်ႇလိၼ် ၸွမ်းၼင်ႇပိုၼ်ႉတီႈၽႂ်မၼ်းယဝ်ႉ။

ယၢမ်းၼင်ႇၼၼ် ၼုမ်ႇၸၢႆးယိင်းတႆးႁဝ်းၵမ်ႈၽွင်ႈၵေႃႈ ႁၼ်ထိုင်ဝႃႈ ၽိူဝ်တေႁဵတ်းသိုၵ်းမၢၼ်ႈ တႃႉႁဵတ်းသိုၵ်းတႆးၼႆသေ ၵူၼ်းၼုမ်ႇၼႂ်းပိုၼ်ႉတီႈၵမ်ႈၽွင်ႈ ပႃးၵၼ်ၶဝ်ႁၢပ်ႇၵၢၼ်သိုၵ်းပဵၼ်ယိုတ်ႈပဵၼ်သၢႆ မၢင်တီႈဝၢၼ်ႈပေႃးယဵၼ် ဝဵင်းပေႃးယဵၼ် ဢၼ်ၼႆႉတေလႆႈႁၼ်ဝႃႈ ၵူၼ်းၼုမ်ႇႁဝ်း ၼႄၼမ်ႉၸႂ်ႁတ်းႁၢၼ် မေႃႁူႉပုၼ်ႈၽွၼ်းတူဝ်ၵဝ်ႇမႃးၼႆယူႇ၊ ၵူၼ်းၼုမ်ႇပွတ်းမိူင်းၼွင်ၵေႃႉၼိုင်ႈ ဢၼ်ၶဝ်ႈသွၼ်ၵၢၼ်ၼႂ်းတပ်ႉသိုၵ်းၸိုင်ႈတႆး (RCSS/SSA) ဝႆႉၼၼ်ႉ လၢတ်ႈၼႄၵႂၢမ်းၼႂ်းၸႂ်မၼ်း တီႈၽူႈတႅမ်ႈလိၵ်ႈဝႃႈ “ၽိူဝ်တေၶဝ်ႈႁဵတ်းသိုၵ်းမၢၼ်ႈၼၼ်ႉ ၶဝ်ႈႁဵတ်းသိုၵ်းတႆး ၼႂ်းၶူဝ်းလၢႆးၶူဝ်ၶဵဝ်ႁဝ်းဢေႃႈ တႃႇၵႅတ်ႇၶႄၽႅၼ်လိၼ်ႁဝ်းၼၼ်ႉ တိုၼ်းပဵၼ်ပုၼ်ႈၽွၼ်းႁဝ်းႁႃးၵူႈၵေႃႉ ႁဝ်းၶႃႈၼႆႉ တိုၼ်းဢမ်ႇၶႂ်ႈပၢႆႈပုၼ်ႈၽွၼ်းဢဝ်တူဝ်လွတ်ႈသေ မိူဝ်ႈဝၢၼ်ႈမိူင်းၼိမ်သဝ်းယဝ်ႉသမ်ႉ ၶိုၼ်းမႃးၸၢမ်ႇၽွၼ်းလီၸွမ်းပိူၼ်ႈၼၼ်ႉ ႁဝ်းတိုၼ်းဢမ်ႇႁဵတ်း” လၢတ်ႈၼင်ႇၼႆ။

လိူဝ်သေၼၼ်ႉ ၵူၼ်းၼုမ်ႇလၢင်းၶိူဝ်း ဢၼ်ၶဝ်ႈသိုၵ်းမႂ်ႇ ၼႂ်းပီႊၼႆႉၵေႃႉၼိုင်ႈၵေႃႈလၢတ်ႈဝႃႈ “ၵၢၼ်သိုၵ်းၼႆႉ ဢမ်ႇပႃးႁဝ်းၵေႃႉၼိုင်ႈၵေႃႈ ပိူၼ်ႈႁဵတ်းပဵၼ်ယူႇ ၸဵမ်မိူဝ်ႈႁဝ်းၶႃႈပႆႇၵိူတ်ႇပိူၼ်ႈပေႃးႁဵတ်းယူႇယဝ်ႉလူး” မၼ်းလၢတ်ႈၸိူင်ႉၼင်ႇၼႆ မိူဝ်ႈၼၼ်ႉၽူႈတႅမ်ႈၵေႃႈမိုင်ၵႂႃႇၵမ်းၼိုင်ႈ ယူႇယူႇၵေႃႈမၼ်ၶိုၼ်းသိုပ်ႇလၢတ်ႈဝႃႈ “ၵူၺ်းၵႃႈ… ၵၢၼ်သိုၵ်းၼႆႉ ပေႃးပႃးၵဝ်သေၵေႃႉၼိုင်ႈၶႅၼ်းတေလီ ႁႃတီႈဝႃႈပေႃးဢမ်ႇမီးယဝ်ႉ” လၢတ်ႈၼင်ႇၼႆ ၵႂၢမ်းမၼ်းလၢတ်ႈၼႆႉ ၶႃႈႁဝ်းလႆႈၸႂ်ၼႃႇ ၸင်ႇတႅမ်ႈမၢႆၵဵပ်းဝႆႉသေ ၶိုၼ်းမႃး Share ၼႄ ၽူႈလူလိၵ်ႈႁဝ်းၶဝ် ယွၼ်ႉပိူဝ်ႈၼၼ် ၶႃႈၸင်ႇဝူၼ်ႉဝႃႈ “ၵူၼ်းၼုမ်ႇႁဝ်းဝၼ်းမိူဝ်ႈၼႆႉ    ဢမ်ႇႁူၼူၵ်ႇတႃမွတ်ႇယဝ်ႉ မေႃႁူႉပုၼ်ႈၽွၼ်းၸဝ်ႈၵဝ်ႇယဝ်ႉ” ဝူၼ်ႉႁၼ်ၼင်ႇၼႆ။ ဢမ်ႇဝႃႈၵူၼ်းၼုမ်ႇၼႂ်းတႆးႁဝ်းၵူၺ်း ၵူၼ်းၼုမ်ႇၸၢဝ်းၶိူဝ်းၶဝ်ၵေႃႈ ၼႄၼမ်ႉၸႂ်ႁတ်းႁၢၼ်ၶဝ်မိူၼ်ၵၼ် ပိူၼ်ႈၵေႃႈဢွၼ်ၵၼ်တူင်ႉတိုၼ်ႇၶိုၼ်ႈမႃးႁႅင်းတႄႉတႄႉ။

ၶေႃႈပူၵ်းတိုၼ်ႇ ၸွမ်သိုၵ်းလူင် ယွတ်ႈသိုၵ်း

မိူဝ်ႈၼႂ်းလိူၼ် March – April (လိူၼ်ထူၼ်ႈ 3 ထိုင် လိူၼ်ထူၼ်ႈ 4) ပီႊ 2024 ၼႆႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸွမ်သိုၵ်းလူင် ယွတ်ႈသိုၵ်း လူင်းႁူပ်ႉထူပ်းသူႇၸႂ်းပၼ်ႁႅင်း ပူၵ်းတိုၼ်ႇၵူၼ်းမိူင်း လႄႈၵူၼ်းၼုမ်ႇၸိူဝ်းၶဝ်ႈႁၢပ်ႇထၢမ်းၵၢၼ်သိုၵ်းၼၼ်ႉ တူဝ်ၽူႈတႅမ်ႈၵေႃႈ ဢိင်ၼိူဝ်ၼႃႈတီႈပုၼ်ႈၽွၼ်းသေ လႆႈၸပ်းၸွမ်းႁွမ်းပႆပႃးၵေႃႉၼိုင်ႈ။ ယွၼ်ႉၼၼ် ၶေႃႈပူၵ်းတိုၼ်ႇမၼ်းၸဝ်ႈၵမ်ႈၽွင်ႈ လႆႈၵဵပ်းမၢႆတွင်းဝႆႉယူႇ ၼႂ်းငဝ်းလၢႆးဝၢၼ်ႈမိူင်းသုၵ်ႉယုင်ႈဝၼ်းမိူဝ်ႈၼႆႉ မၼ်းၸဝ်ႈလၢတ်ႈဝႃႈ “ၵွပ်ႈၾႆးမႆႈပႃႇမႃးယဝ်ႉလႄႈ သိူဝ်ၵူႈတူဝ်ထုၵ်ႇလီတိုၼ်ႇလုၵ်ႉယဝ်ႉ သင်သမ်ႉၵုမ်ႇၼွၼ်းၼူၵ်ႇယူႇၸိုင် ၾႆးတေလုၵ်ႉမႆႈႁၢင်သိူဝ် ၵူၺ်းဢမ်ႇၵႃး တေမႆႈပႃးတၢင်းတူဝ်ၵွၼ်ႇယဝ်ႉ” မၼ်းၸဝ်ႈလၢတ်ႈၼင်ႇၼႆ။

ၵွပ်ႈပိူဝ်ႈငဝ်းလၢႆးဝၢၼ်ႈမိူင်းလႄႈ ႁႅင်းမိပ်ႇဢီးၵူႈၽၢႆႇသေ ၵူၼ်းမိူင်းတႆးႁဝ်းၶႃႈၵူႈၵေႃႉ ထိုင်ၶၢဝ်းယၢမ်းထုၵ်ႇလီလုၵ်ႉႁူမ်ႈႁႅင်းၵၼ် ႁၢပ်ႇဢဝ်ပုၼ်ႈၽွၼ်းၽႂ်မၼ်းယဝ်ႉ သင်တေၵုမ်ႇလိုမ်းႁၢင်ႈလိုမ်းတူဝ်သေ ယူႇၵိၼ်ၵႂႃႇဝၼ်းလႂ်ဝၼ်းၼၼ်ႉၵူၺ်းတႄႉ လုၵ်ႈလၢၼ်ၶိူဝ်းႁဝ်းၸိူဝ်းၵိုတ်းပႃႈၼွင်ႈပႃႈလင် တေဢမ်ႇမီးတီႈယူႇတီႈၵိၼ်ယဝ်ႉ။ ၵွပ်ႈၼၼ် တႃႇတေၵႅတ်ႇၵင်ႈလႆႈၽႅၼ်ႇလိၼ် လႄႈၸိူဝ်ႉၸၢတ်ႈႁဝ်းၼၼ်ႉ ႁဝ်းလူဝ်ႇသင်ၼႆ ၵူႈၵေႃႉတေႁူႉႁၼ်ထိုင်ၵၼ်ယူႇ။

ၸွမ်သိုၵ်းလူင် ယွတ်ႈသိုၵ်း လၢတ်ႈဝႆႉဝႃႈ “သိုၵ်းၼႆႉပဵၼ်လုပ်ႇၵၢင်ႈမိူင်း မိူင်းၼိုင်ႈမိူင်း သင်ဢမ်ႇမီးသိုၵ်းၼႆ မိူၼ်ၵၼ်တင်းၼိူဝ်ႉပႃ ဢၼ်ဢမ်ႇမီးလုပ်ႇမီးၵၢင်ႈၼၼ်ႉလႄႈ ပိူၼ်ႈၶႂ်ႈဢိုၼ်ၵိၼ်မိူဝ်ႈလႂ်ၵေႃႈ ဢိုၼ်ၵိၼ်လႆႈငၢႆႈငၢႆႈၵူၺ်း၊ ၵွပ်ႈၼႆႁဝ်းလူဝ်ႇမီးသိုၵ်းၼမ်ၼမ် တီႈဢေႇလူဝ်ႇလႆႈမီးၼိုင်ႈသႅၼ်ၵေႃႉ ၸင်ႇတေႁူမ်ႇလူမ်ႈမိူင်းႁဝ်းလႆႈ ၵွပ်ႈသင်ႁဝ်းလူဝ်ႇသိုၵ်းပဵၼ်သႅၼ်ၼႆ မိူဝ်ႈႁဝ်းလႆႈမိူင်းယဝ်ႉၼၼ်ႉ ၸွမ်းၸိူဝ်းလႅၼ်လိၼ်ၵူႈတီႈ လႄႈၼႂ်းမိူင်း သိုၵ်းႁဝ်းလူဝ်ႇႁူမ်ႇလူမ်ႈႁႂ်ႈလႆႈယဝ်ႉ၊ ယိုင်ႈႁႅင်းသိုၵ်းၼမ်ၵႃႈႁိုဝ်ၵေႃႈ ယိုင်ႈႁဝ်းတေဢမ်ႇလႆႈတိုၵ်း ပေႃးႁႅင်းသိုၵ်းႁဝ်းဢေႇၸိုင် တိုၼ်းတေလႆႈတိုၵ်းၼမ် ၸုမ်းလႂ်ၵေႃႈတေမႃးတိုၵ်းႁဝ်းၼၼ်ႉယဝ်ႉ” လၢတ်ႈဝႆႉၼင်ႇၼႆ။

လိူဝ်ၼၼ်ႉမၼ်းၸဝ်ႈလၢတ်ႈဝႆႉဝႃႈ “ဝၼ်းမိူဝ်ႈၼႆႉ မၢင်ၸိူဝ်းတေႁၼ်ဝႃႈ ပိူၼ်ႈဢွၼ်ၵၼ်တိုၵ်းမၢၼ်ႈယူႇ ယွၼ်ႉသင် RCSS ဢမ်ႇတိုၵ်းမၢၼ်ႈ ၼႆၵေႃႈတေမီး၊ မုၵ်ႉၸုမ်းႁဝ်းၼႆႉ ႁဝ်းမီးသဵၼ်ႈတၢင်းယိူင်းဢၢၼ်းလႄႈ ႁၼ်ပိူၼ်ႈတိုၵ်းလႄႈတိုၵ်းဢိူဝ်ႈၼႆၼၼ်ႉ တိုၼ်းဢမ်ႇႁဵတ်း ႁဝ်းတေတိုၵ်းၸွမ်းၼင်ႇသဵၼ်ႈတၢင်းႁဝ်းလႄႈ ဢၼ်တေမီးၽွၼ်းလီ ပုၼ်ႈတႃႇၸိူဝ်ႇၸၢတ်ႈၼၼ်ႉၵူၺ်း ပေႃးတေဝႃႈတႄႉမၼ်း ႁဝ်းၼႆႉ တိုၵ်းယူႇၵူႈဝၼ်းယဝ်ႉ ၵူၺ်းလၢႆးတိုၵ်းဢမ်ႇမိူၼ်ၵၼ်ၵူၺ်း” ၼႆယဝ်ႉ။

ၵၢၼ်ၵူႈဢၼ်ၼၼ်ႉ ပေႃးႁဝ်းႁူမ်ႈႁႅင်းတူဝ်ႁႅင်းၸႂ်ၵၼ်ၵွၼ်ႇ ၸင်ႇတေဢွင်ႇမၢၼ်လႆႈ ၶႃႈႁဝ်းတွင်းဝႆႉ လွၼ်ႉမွၼ်းၵႂၢမ်း ၽူႈၵွၼ်းတပ်ႉၸုမ်း ၸၼ်ႉၸဝ်ႈသိုၵ်းၵေႃႉၼိုင်ႈ လၢတ်ႈဝႆႉဝႃႈ “ၵႆႉၵုမ်ၵၼ်ၵူၼ်းၵတ်ႉၵူႈၵေႃႉ၊ ၵႆႉၵဝ်းၵၼ်ၵူၼ်းၵတ်ႉၵေႃႈၵွႆ၊ ၵႆႉၵဝ်းၵၼ် ၵူၼ်းၵိုၼ်းၵေႃႈၵူၼ်ႇ” ၼႆယဝ်ႉ။

ၵွပ်ႈပိူဝ်ႈၸိူင်ႉၼၼ်လႄႈ ၵၢၼ်ၵွပ်ႇၵူႈၸိူဝ်ႈၸၢတ်ႈႁဝ်းၶႃႈၼႆႉ ႁၼ်ထိုင်ဝႃႈ ၵေႃႉလဵဝ်ႁဵတ်းၵေႃႈဢမ်ႇလႆႈ ၸုမ်းလဵဝ်ႁဵတ်းၵေႃႈဢမ်ႇပေႉ၊ ပေႃးႁဝ်းၶႃႈၵူၼ်းၼုမ်ႇတင်းသဵင်ႈ ၵူၼ်းမိူင်းလဵၵ်ႉယႂ်ႇၵူႈၶုၼ်ၵူႈၼၢင်း ႁူမ်ႈၵၼ်ၵွၼ်ႇ ၵၢၼ်ၼၵ်းၸင်ႇပဵၼ်လႆႈၵၢၼ်မဝ်သေ ၵမ်းလိုၼ်းၼႆႉ ယွၼ်းယုၵ်ႉယွင်ႈတၢင်ႇမုၼ် ၵေႃႉသိုၵ်းၵေႃႉႁၢၼ် ဢၼ်မႂ်ႇဢၼ်ၵဝ်ႇ တင်းသဵင်ႈၼႆသေ ၶွတ်ႇယွတ်ႈပၢႆၵႂၢမ်းတီႈၼႆႈၶႃႈ…။

လွမ်ႉမိူင်း ၵေးသီး

11/05/2024

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း။