ၵႃးတၢင်ႇႁႅင်းၵၢၼ်ယၢၼ်မိူင်း ပဵၼ်ၽေးၵိုင်ႉၵၢင်ႉ ၵူၼ်းလူႉတၢႆမၢတ်ႇၸဵပ်းၼမ်

မိူဝ်ႈဝၼ်းထီႉ 6 November 2024 (လိူၼ်သိပ်းသွင်မႂ်ႇ 6 ၶမ်ႈ ပီႊတႆး 2118 ၼီႈ) ၵႃးဢၼ်တၢင်ႇႁႅင်းၵၢၼ်ယၢၼ်မိူင်း မိူင်းႁူမ်ႈတုမ်မႃးတင်းမူတ်း 15 ၼၼ်ႉ လႆႈပဵၼ်ၽေးၵိုင်ႉၵၢင်ႉ ၽႃႇၵၼ်တင်း ၵႃးတၢင်ႇၵုၼ်ႇ တီႈႁိမ်းသဵၼ်ႈတၢင်း ဢေးသျႃး 41   ပွၵ်ႉ 5 ဢိူင်ႇပရႃႇသူင် ၸႄႈဝဵင်းထႃႉသၼႃးသေ မီးၵူၼ်းလူႉသဵင်ႈတၢႆ ထင်တီႈ 3 ၵေႃႉ လႄႈ ၵႂႃႇလူႉသဵင်ႈတီႈႁူင်းယႃ 1 ၵေႃႉ ႁူမ်ႈၵူၼ်းလူႉသဵင်ႈတၢႆ 4 ၵေႃႉ၊ မီးၵူၼ်းမၢတ်ႇၸဵပ်း 9 ၵေႃႉ တိုၵ်ႉယူတ်းယႃတူဝ်ယူႇဝႆႉတီႈႁူင်းယႃထႃႉသၼႃး လႄႈ ႁူင်းယႃသျႆႊယႃႊ ၼႆယဝ်ႉ။

ဝၢႆးသေၵႃးတၢင်ႇႁႅင်းၵၢၼ်ယၢၼ်မိူင်း မိူင်းႁူမ်ႈတုမ် လႆႈပဵၼ်ၽေးၵိုင်ႉၵၢင်ႉယဝ်ႉ ၼၼ်ႉ မီးႁႅင်းၵၢၼ်ယၢၼ်မိူင်း လႅၼ်ႈပၢႆႈၶဝ်ႈထိူၼ်ႇၵႂႃႇ 2 ၵေႃႉ လႄႈ ၸဝ်ႈ ၼႃႈတီႈထႆးၶဝ် လၢမ်းၶၢတ်ႈဝႃႈ ပဵၼ်ႁႅင်းၵၢၼ်ဢမ်ႇမီးဝတ်းဝႂ် ဢၼ်လၵ်ႉလွမ်ၶဝ်ႈမိူင်းမႃး ဝႃႈၼႆ။

ၸွမ်းၼင်ႇၽူႈမီးပုၼ်ႈၽွၼ်းထႆးတွင်ႈထၢမ်ၼၼ်ႉသေ လႆႈႁူႉဝႃႈ ၵႃးတၢင်ႇႁႅင်းၵၢၼ် ယၢၼ်မိူင်း မိူင်းႁူမ်ႈတုမ်ၼၼ်ႉ လႆႈလုၵ်ႉတီႈဝဵင်းလူင်မိူင်းၵွၵ်ႇ တေၵႂႃႇတီႈၼႂ်းၸႄႈ တွၼ်ႈၽတ်ႉထလုင်း ၵူၺ်းသမ်ႉလႆႈမႃးပဵၼ်ၽေးၵိုင်ႉၵၢင်ႉၸွမ်းတၢင်း ၼႆယဝ်ႉ။

တႆးလွတ်ႈလႅဝ်း