ၵႃးလူင်လႄႈထေႃႈၽႃႇၺႃးၵၼ် မီးၵူၼ်းလူႉတၢႆထင်တီႈ

မိူဝ်ႈဝၼ်းထီႉ 26 October 2024 (လိူၼ်သိပ်းဢဵတ်းလွင်ႈ 9 ၶမ်ႈ ပီႊတႆး 2118 ၼီႈ) ၵႃး 12 လေႃႉ လႄႈ ထေႃႈ (ထူဝ်ႈ) ပဵၼ်ၽေးၵိုင်ႉၵၢင်ႉၽႃႇၺႃးၵၼ် တီႈဝၢၼ်ႈၵုင်းပဝ်း ဢိူင်ႇလၢႆးၵမ် ၸႄႈဝဵင်းၵုၼ်ႁဵင်။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ လွင်ႈၼႆႉလႆႈပဵၼ်ၵႂႃႇမိူဝ်ႈယၢမ်းဝၢႆး 15:30 မူင်းၼၼ်ႉၶႃႈဢေႃႈ ၸဝ်ႈထေႃႈၼၼ်ႉ ၸိုဝ်ႈႁွင်ႉ ၸၢႆးၼၼ်ႇတေႃး ပဵၼ်ၵူၼ်းဝၢၼ်ႈၵုင်းပဝ်း လုၵ်ႉတီႈၼႂ်းဝၢၼ်ႈတေၵႂႃႇတီႈဝဵင်းၵုၼ်ႁဵင်ၼႆလႄႈ မိူဝ်ႈမၼ်းႁေႃႈထေႃႈၶဝ်ႈတၢင်းလူင်ၼၼ်ႉ လႆႈပဵၼ်ၽေးၵိုင်ႉၵၢင်ႉတင်းၵႃး 12 လေႃႉ ဢၼ်လုၵ်ႉမႃးတၢင်းၶူဝ်လမ် မုင်ႈၼႃႈၵႂႃႇဝဵင်းၵုၼ်ႁဵင်ၼၼ်ႉသေ ဢဝ်လူႉတၢႆထင်တီႈၵႂႃႇ ဝႃႈၼႆ။

ဝၢႆးသေပဵၼ်ၽေးၵိုင်ႉၵၢင်ႉယဝ်ႉ ၸုမ်းသိုၵ်းမၢၼ်ႈႁွင်ႉဢဝ်တူဝ် ၸဝ်ႈၵႃး 12 လေႃႉ  ၵႂႃႇတီႈတပ်ႉသၢႆးမူၼ်ႇသေ ၸႅတ်ႈထၢမ်လွင်ႈတၢင်းပိူင်ပဵၼ် လႄႈ လႆႈႁူႉဝႃႈ ပေႃးဢဝ်ပၵ်းပိူင် ၵၢၼ်ႁေႃႈလူတ်ႉႁေႃႈၵႃးဝႃႈၼႆၸိုင် ၸဝ်ႈထေႃႈ ပဵၼ်ၽၢႆႇၽိတ်း လႄႈ တၢင်းၽၢႆႇ ၸဝ်ႈၵႃးၵေႃႈတေၶၢမ်ႇသၢႆႈတႅၼ်းပၼ်ငိုၼ်း 300 သႅၼ်ပျႃး တီႈပေႃႈမႄႈပီႈၼွင်ႉ ဢၼ်ၵိုတ်းတၢင်းႁိူၼ်းၸၢႆးၼၼ်ႇတေႃး ၼႆယဝ်ႉ။

တႆးလွတ်ႈလႅဝ်း