ၵႃးၽႃႇၺႃးၵၼ် မီးၵူၼ်းလူႉတၢႆ 6 ၵေႃႉ

ၵႃး 10 မၢၵ်ႇ လႄႈ ၵႃးဢွၼ်ႇ ပဵၼ်ၽေးၵိုင်ႉၵၢင်ႉၽႃႇၺႃးၵၼ် တီႈဢၼ်ၸမ်တေႁွတ်ႈၼိူဝ်ၸိၵ်းလွႆပၢင်ၵႂၢႆး ႁိမ်းဝၢၼ်ႈပၢင်လေႃႉ သဵၼ်ႈတၢင်း ၵဵင်းတုင် − တႃႈၶီႈလဵၵ်း ၸိုင်ႈတႆးပွတ်းဢွၵ်ႇၼၼ်ႉ မီးၵူၼ်းၼႂ်းၵႃးဢွၼ်ႇ လူႉတၢႆတင်းမူတ်း ၼႆယဝ်ႉ။

မိူဝ်ႈဝႃးဝၼ်းထီႉ 15 July 2024 (လိူၼ်ပႅတ်ႇမႂ်ႇ 10 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 08:00 မူင်း မီးၵႃး 10 မၢၵ်ႇ လမ်းၼိုင်ႈ လႄႈ ၵႃးဢွၼ်ႇလမ်းၼိုင်ႈ ၵိုင်ႉၵၢင်ႉၽႃႇၺႃးၵၼ် တီႈႁိမ်းဝၢၼ်ႈပၢင်လႃႉ ဢိူင်ႇမိူင်းၸဵမ်း ၸႄႈဝဵင်းၵဵင်းတုင်သေ ဢဝ်ပဵၼ်ၽေးၵိုင်ႉၵၢင်ႉ ထိုင်တီႈမီးၵူၼ်းလႆႈလူႉတၢႆၸွမ်းတင်းၼမ် ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ပေႃးလၢမ်းတူၺ်းတႄႉ ၵႃးလူင်ၼၼ်ႉ တေတၢင်ႇၼၵ်းလႄႈ ပလိၵ်ႈသမ်ႉလႅပ်ႈတေပွင်ႇၽွင်းလူင်းၵုင်းထႅင်ႈသေ ၵိုင်ႉၵၢင်ႉၵႂႃႇၽႃႇၺႃး/ဢိတ်ႇၺႃးၵႃး (ပလူဝ်ႇပွၵ်ႉ) ဢၼ်မီးၵူၼ်းၶီႇၼႂ်းမၼ်း 6 ၵေႃႉ (ၸၢႆး 4 ၵေႃႉ ယိင်း 2 ၵေႃႉ ၼႂ်း 6 ၵေႃႉ ၼၼ်ႉ ပႃးလုၵ်ႈဢွၼ်ႇဝႆႉ 2 ၵေႃႉ) သေ ဢဝ်လုၵ်ႉပဵၼ်ၾႆးၵႂႃႇလႄႈ ၸိူဝ်းၶဝ် 6 ၵေႃႉၼၼ်ႉ လႆႈတၢႆၵႂႃႇၸွမ်းၼႂ်းၵွင်ၾႆးယဝ်ႉ၊ ၸိူဝ်းၶဝ် 6 ၵေႃႉၼၼ်ႉ ပဵၼ်ၵူၼ်းမိူင်းယူႇ ၵေႃႉတီႈၵေႃႉတၢင်းႁိုဝ် ဢမ်ႇၼၼ် ပဵၼ်ၵူၼ်းႁိူၼ်းလဵဝ်ၵၼ်ႁိုဝ်ၼႆၼၼ်ႉတႄႉ ဢမ်ႇလႆႈႁူႉၸွမ်း ၵူၺ်းၼႃႇ ၵူၼ်းၵမ်ႉၼမ်တႄႉလၢတ်ႈဝႃႈ ၶဝ်ပဵၼ်ၵူၼ်းႁိူၼ်းလဵဝ်ၵၼ်မူတ်း လႄႈ ယူႇတီႈၵဵင်းတုင် ဝႃႈၼႆ။

ၵႃး 10 မၢၵ်ႇၼၼ်ႉၵေႃႈ ပိၼ်ႈႁၢဝ်ႈႁႅင်းဝႆႉလႄႈ ၵူၼ်းႁေႃႈၵႃး တင်း ၵူၼ်းၸွမ်းၵႃး 10 မၢၵ်ႇ လႆႈတၢင်းၸဵပ်းမၢတ်ႇသေ မိူဝ်ႈလဵဝ်ယူတ်းယႃတူဝ်ဝႆႉတီႈ ႁူင်းယႃဝဵင်းၵဵင်းတုင် ဝႃႈၼႆ။

မိူဝ်ႈဝၼ်းထီႉ 21 May 2024 ၼၼ်ႉၵေႃႈ ယွၼ်ႉၾူၼ်တူၵ်းသေသဵၼ်ႈတႃႈသၢႆတၢင်း မိုၼ်ႈလႄႈ မီးၵႃးတၢင်ႇမၢၵ်ႇမႆႉမၢၵ်ႇတွၵ်ႇလမ်းၼိုင်ႈ ဢဝ်ပဵၼ်ၽေးၵိုင်ႉၵၢင်ႉ တူၵ်းႁူၺ်ႈတီႈလၵ်းသဝ်ႁိၼ် မၢႆ 693−694 လၵ်း ၸႄႈဝဵင်းမိူင်းၽျၢၵ်ႈသေ မီးၼၢင်းယိင်းၵေႃႉၼိုင်ႈ လႆႈလူႉသဵင်ႈသၢႆၸႂ် ၼႆယဝ်ႉ။

တႆးလွတ်ႈလႅဝ်း