ၶဝ်ႈပႆႇမၢၵ်ႈလီသေတႃႉ ၵူၼ်းမိူင်းပၢႆးၼႅတ်ႈပၢတ်ႇၶဝ်ႈ

ၼႂ်းလိူၼ် November 2024 ၸုမ်းသိုၵ်းမၢၼ်ႈ လႄႈ ၸုမ်း PDF ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းပိုၼ်ႉတီႈ မိူင်းပၢႆး ၸိုင်ႈတႆးပွတ်းၸၢၼ်းသေ ၵူၼ်းမိူင်းၸိူဝ်းယူႇၸမ် ဢွင်ႈတီႈပၢင်တိုၵ်းၼၼ်ႉ ဢွၼ်ၵၼ်ၼႅတ်ႈၵဵဝ်ႇၶဝ်ႈ ပၢတ်ႇၶဝ်ႈ ႁင်းၽႂ်ႁင်းမၼ်း ယူႇယဝ်ႉ။

မိူဝ်ႈၼႆႉဝၼ်းထီႉ 20 November 2024 (လိူၼ်သိပ်းသွင်လွင်ႈ 5 ၶမ်ႈ ပီႊတႆး 2118 ၼီႈ ၵူၼ်းဝၢၼ်ႈၼႂ်းပိုၼ်ႉတီႈ ၵေႃႉၼိုင်ႈလၢတ်ႈတီႈသိုဝ်ႇၶၢဝ်ႇ DVB ဝႃႈ တွၼ်ႈတႃႇတေပၢတ်ႇၶဝ်ႈ ပေႃႉၶဝ်ႈၼႆႉ မိူဝ်ႈဢွၼ်တၢင်းလႆႈပႂ်ႉၵႃးၸၢၵ်ႈ၊ မိူဝ်ႈလဵဝ် ငဝ်းလၢႆးဝၢၼ်ႈမိူင်းဢမ်ႇလီႁႅင်း လႄႈ ၶဝ်ႈၵေႃႈသမ်ႉပႆႇမၢၵ်ႈလီထႅင်ႈသေ သင်ၵႃးၸၢၵ်ႈဢမ်ႇတၼ်းၵေႃႈ ၸဝ်ႈႁႆႈၸဝ်ႈၼႃး ၵႃႈလႆႈဢွၼ်ၵၼ် ဢဝ်ၵူၼ်းပၢတ်ႇၶဝ်ႈယဝ်ႉ၊ သင်ဝႃႈသၢႆသိုၵ်းမၢၼ်ႈ ထူဝ်းသိုၵ်းႁွတ်ႈထိုင် တီႈႁဝ်းၶႃႈယူႇၼႆၸိုင် တေဢမ်ႇၸၢင်ႈ ပၢတ်ႇၶဝ်ႈပေႃႉၶဝ်ႈယဝ်ႉ လႄႈ ၼိုင်ႈၶႅၼ်းသုမ်းယႂ်ႇ သုမ်းလူင်ၶႃႈယဝ်ႉ၊ တင်ႈတႄႇႁူဝ်လိူၼ် November မႃးၼႆႉ လႆႈငိၼ်းသဵင်ႈၵွင်ႈသဵင်မၢၵ်ႇ ၸွမ်းမိူင်းပၢႆး လႄႈ တၢင်းၽၢႆႇသိုၵ်းမၢၼ်ႈၵေႃႈ သိုပ်ႇထူဝ်းသိုၵ်း ဢမ်ႇၵိုတ်းဢမ်ႇလိုဝ်ႈ ဝႃႈၼႆ။

မိူဝ်ႈႁူဝ်လိူၼ် November 2024 ၼၼ်ႉၵူၺ်းၼင်ႇၵဝ်ႇ မီးၶၢဝ်ႇဢွၵ်ႇမႃးဝႃႈ ၸုမ်းသိုၵ်းမၢၼ်ႈဢၼ်ထူဝ်းသိုၵ်းၶဝ်ႈၵႂႃႇ ၸွမ်းဝၢၼ်ႈယႂ်ႇဝၢၼ်ႈလူင် (ၵမ်ႉၼမ်ပဵၼ်ဝၢၼ်ႈ ၸၢဝ်းၶိူဝ်းတႆးလႄႈၸၢဝ်းၶိူဝ်းၵယၢၼ်းယူႇသဝ်း) တီႈၼႂ်းၸႄႈဝဵင်းပၢင်လွင်းသေ ၵူၼ်းမိူင်းဢွၼ်ၵၼ်ပၢႆႈဢွၵ်ႇဝၢၼ်ႈလႄႈ သိုၵ်းမၢၼ်ႈ ၶိုၼ်းဢဝ်ၵႃးၸၢၵ်ႈပၢတ်ႇၶဝ်ႈၵူၼ်းဝၢၼ်ႈယဝ်ႉ ဢဝ်တေႃႉၶဝ်ႈမိူဝ်း ၼႂ်းဝဵင်းပၢင်လွင်း ၼႆယဝ်ႉ။

တႆးလွတ်ႈလႅဝ်း