ၶိမ်း ၵျွင်းဢိုၼ်း သင်ႇႁႂ်ႈၽွမ်ႉတူဝ်ႈတၼ်း တႃႇတေႃႇသူႈလွင်ႈပူၼ်ႉပႅၼ် ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း

မိူဝ်ႈဝၼ်းထီႉ 11 April 2023 (လိူၼ်ႁႃႈလွင်ႈ 7 ၶမ်ႈ ပီႊတႆး 2117 ၼီႈ) ၼၼ်ႉ ၽၢႆႇတၢင်းသိုဝ်ႇၶၢဝ်ႇလူင်ပွင်ၸိုင်ႈၵူဝ်းရီးယႃးႁွင်ႇ KCNA လၢႆးငၢၼ်းဝႃႈ ၸွမ်ၸိုင်ႈ ၵူဝ်းရီးယႃးႁွင်ႇ ၶိမ်း ၵျွင်းဢိုၼ်း မီးၶေႃႈသင်ႇႁႂ်ႈၽိူမ်ႉထႅမ်သၢင်ႈလွင်ႈၵႅၼ်ႇၶႅင် ပၼ်ၼမ်ႉၵတ်ႉၽၢႆႇႁႄႉၵင်ႈပၢင်တိုၵ်းၶွင်ၵူဝ်းရီးယႃးႁွင်ႇ ႁႂ်ႈႁဵတ်းသၢင်ႈလႆႈလႄႈ လူမ်ႇတိုၵ်း ႁႂ်ႈဝႆးၽႂ်းၶိုၼ်ႈမႃး တႃႇႁပ်ႉမိုဝ်းၸွမ်းလွင်ႈပူၼ်ႉပႅၼ် ဢမေႇရိၵၢၼ်ႇ တင်း ၵူဝ်းရီးယႃးၸၢၼ်းၼၼ်ႉ ဝႃႈၼႆ။

ဢွၼ်တၢင်းၼႆႉၵေႃႈ ၵူဝ်းရီးယႃးႁွင်ႇ မီးလွင်ႈဢမ်ႇပဵင်းပေႃးၸႂ်တေႃႇ လွင်ႈၽိုၵ်း ၽွၼ်ႉၵၢၼ်သိုၵ်း ဢမေႇရိၵၢၼ်ႇ လႄႈ ၵူဝ်းရီးယႃးၸၢၼ်း ဢၼ်ၽိုၼ်းၽွၼ်ႉႁူမ်ႈ ၵၼ် လႄႈ ၽၢႆႇတၢင်း သိုဝ်ႇၶၢဝ်ႇ KCNA ယင်းလႆႈၵၢဝ်ႇၼႄးဝႃႈ လွင်ႈၽိုၵ်းၽွၼ်ႉသိုၵ်း တင်းသွင်ၸိုင်ႈမိူင်းၼၼ်ႉ ပဵၼ်တႃႇပိုတ်ႇၼႃႈသိုၵ်းတိုၵ်းယိုဝ်း ၵူဝ်းရီးယႃးႁွင်ႇသေ ႁဵတ်းႁႂ်ႈၵူဝ်းရီးယႃးႁွင်ႇ ပေႃးလႆႈလူင်းမိုဝ်းႁဵတ်းသၢင်ႈ ႁူမ်ႈထိုင်သဵၼ်ႈတၢင်းလိူၵ်ႈ ၽၢႆႇၵၢၼ်သိုၵ်းထႅင်ႈ ဝႃႈၼႆ။

တႆးလွတ်ႈလႅဝ်း