ၶူဝ်ၶၢမ်ႈလႅၼ်လိၼ် တႃႈၶီႈလဵၵ်း − မႄႈသၢႆ ပိုတ်ႇၶိုၼ်းမိူဝ်ႈၽုၵ်ႈ

သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ မိူဝ်ႈၽုၵ်ႈဝၼ်းထီႉ 20 February 2023 (လိူၼ်သီႇမႂ်ႇ 2 ၶမ်ႈ ပီႊတႆး 2117 ၼီႈ) ၶူဝ်ၶၢမ်ႈလႅၼ်လိၼ် မၢႆ 1 တႃႈၶီႈလဵၵ်း−မႄႈသၢႆ တေပိုတ်ႇၽုၺ်ႇ ပဵၼ်တၢင်းၵၢၼ်ၶိုၼ်းယဝ်ႉ ဝႃႈၼႆ။

ပေႃးထိုင်မႃး ယၢမ်းၵၢင်ၼႂ် 07:00 မူင်း သွင်ၽၢႆႇတေႁူမ်ႈၵၼ် ပိုတ်ႇၽၵ်းတူဝ်ၶၢမ်ႈလႅၼ်လိၼ်သေ ၽၢႆႇမၢၼ်ႈတေမီး ပိဝ်ႇႁႃႇသိုၵ်း တင်း ၽူႈၵွၼ်းၸႄႈတွၼ်ႈတႃႈၶီႈလဵၵ်း၊ ၽၢႆႇထႆးသမ်ႉ တေမီး ၵႅမ်ၽူႈၵွၼ်းၸႄႈတွၼ်ႈ ၵဵင်းႁၢႆး ဢွၼ်ႁူဝ်လုၵ်ႈၸုမ်းသေၶိုၼ်ႈႁွတ်ႈၼႆ လႆႈႁၼ် Tachileik News Agency ဢွၵ်ႇဝႆႉၼင်ႇၼႆယဝ်ႉ။

ၽၵ်းတူၶၢမ်ႈလႅၼ်လိၼ်ၼႆႉ တေပိုတ်ႇၽုၺ်ႇ ယၢမ်းၵၢင်ၼႂ် 06:00 မူင်းတေႃႇထိုင် ႁူဝ်ၶမ်ႈ 18:00 မူင်း သေ တေဢမ်ႇပႆႇပိုတ်ႇထိုင် 21:00 မိူၼ်ၼင်ႇမိူဝ်ႈၵူႈပွၵ်ႈပူၼ်ႉမႃး သေဢမ်ႇၵႃး လွင်ႈၵူတ်ႇထတ်းၵေႃႈ တေတိူဝ်းႁဵတ်းသၢင်ႈၼမ်ၼႆယူႇယဝ်ႉ။

တႆးလွတ်ႈလႅဝ်း