ၶေႃႈမုၼ်းလပ်ႉ ဢမေႇရိၵၢၼ်ႇ ထုၵ်ႇပိုၼ်ၽႄႈၼိူဝ် Online

ၶေႃႈမုၼ်းလပ်ႉ ဢမေႇရိၵၢၼ်ႇ ဢၼ်ၵဵဝ်ႇၶွင်ႈငဝ်းလၢႆးပၢင်တိုၵ်း ၼႂ်းမိူင်းယူႇၶရဵၼ်း ၼၼ်ႉ ထုၵ်ႇပိုၼ်ၽႄႈဢွၵ်ႇမႃးၼိူဝ် Online ဝႃႈၼႆ။

သိုဝ်ႇၶၢဝ်ႇ TNN World ဢွၵ်ႇဝႆႉ မိူဝ်ႈဝႃး ဝၼ်းထီႉ 10 April 2023 (လိူၼ်ႁႃႈလွင်ႈ 6 ၶမ်ႈ ပီႊတႆး 2117 ၼီႈ) ဝႃႈ ၶေႃႈမုၼ်းဢၼ်ႁူဝ်ႈဢွၵ်ႇၵႂႃႇၼၼ်ႉ တေမီးပႃးႁၢင်ႈၽႅၼ်ႇတီႈလႄႈ ၶႅပ်းႁၢင်ႈ ႁူမ်ႈတင်းမူတ်းမီး 100 မဵဝ်း သေဢမ်ႇၵႃး ၼႂ်းၶေႃႈမုၼ်းၼၼ်ႉ မၢင်မဵဝ်း ပဵၼ်ဢၼ်လပ်ႉတီႈသုတ်း ၵူၺ်းၵႃႈ သမ်ႉထုၵ်ႇပိုၼ်ၽႄႈၼိူဝ် Online သေ တေလႆႈဝႃႈ ပဵၼ်ၶေႃႈမုၼ်းလပ်ႉ ဢမေႇရိၵၢၼ်ႇ ႁူဝ်ႈႁၢႆႉႁႅင်းတီႈသုတ်း တႄႇၸဵမ်မိူဝ်ႈ လွင်ႈၶဵင်ႈၶႅင်ရၢတ်ႉသျႃး လႄႈ ယူႇၶရဵၼ်း လႆႈမီးမႃးၶၢဝ်းတၢင်း 1 ပီႊၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉ ၼႂ်းၶေႃႈမုၼ်းလပ်ႉၼၼ်ႉ ယင်းမီးပႃး လွင်ႈမၵ်းတမ်းၶၢဝ်းယၢမ်း မိူၼ်ၼင်ႇ − ၵၢၼ်ၽိုၵ်းၽွၼ်ႉသိုၵ်း ႁူမ်ႈထိုင်ပႃး ၶိူင်ႈယိပ်းဢၼ်သူင်ႇပၼ်ယူႇၶရဵၼ်း တႃႇၵေႃႇတင်ႈတပ်ႉသိုၵ်း သေဢမ်ႇၵႃး မီးပႃးသၢႆမၢႆႁူဝ်ၼပ်ႉၵူၼ်းလူႉတၢႆ ၼႂ်းပၢင်တိုၵ်းယူႇၶရဵၼ်း ဢၼ်ဢမေႇရိၵၢၼ်ႇ လႆႈလၢမ်းၶၢတ်ႇဝႆႉၼၼ်ႉ ၽၢႆႇရၢတ်ႉ သျႃးလူႉတၢႆလႄႈ မၢတ်ႇၸဵပ်း မွၵ်ႈ 189,500-223,000 ၵေႃႉ လႄႈ ၽၢႆႇယူႇၶရဵၼ်းသမ်ႉ မီးယူႇတီႈ 124,500-131,000 ၵေႃႉ ႁူဝ်ၼပ်ႉမီးဢေႇလိူဝ်သေရၢတ်ႉသျႃး ဝႃႈၼႆ။

ၸိူင်ႉႁိုဝ်ၵေႃႈလီ ၽၢႆႇတၢင်းဢမေႇရိၵၢၼ်ႇၵေႃႈ ယွမ်းႁပ်ႉဝႃႈ လွင်ႈလၢမ်းၶၢတ်ႈၼႆႉ တေၸၢင်ႈမီးလွင်ႈၽိတ်းပိူင်ႈယူႇ ယွၼ်ႉပိူဝ်ႈလွင်ႈၶဝ်ႈထိုင်ၶေႃႈမုၼ်းၼၼ်ႉ မီးလွင်ႈ ယၢပ်ႇလႄႈ တင်းသွင်ၽၢႆႇၵေႃႈ ၶတ်းၸႂ်ဢမ်လပ်ႉၶေႃႈမုၼ်းဢၼ်တေႉမၼ်းဝႆႉ ဝႃႈၼႆ။

ၽူႈမီးပုၼ်ႈၽွၼ်း ၽၢႆႇလွင်ႈမၼ်ႈၼိမ်သဝ်းဢမေႇရိၵၢၼ်ႇၵေႃႈ ယွမ်းႁပ်ႉဝႃႈ ၶေႃႈ မုၼ်းဢၼ်ႁူဝ်ႈဢွၵ်ႇမႃးၼၼ်ႉ ပဵၼ်ၶေႃႈမုၼ်းဢၼ်တေႉ ၵူၺ်းၵႃႈ ဢမ်ႇပႆႇႁူႉဝႃႈ ၽူႈလႂ်ၽႂ် ပဵၼ်ၵူၼ်းၵေႃႉပွႆႇၶေႃႈမုၼ်း ၵူၺ်းႁူႉဝႃႈ ၶေႃႈမုၼ်းလပ်ႉ ထုၵ်ႇပိုၼ်ၽႄႈ ၼိူဝ် Online ၵူၺ်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းလူင်ပွင်ၸိုင်ႈယူႇၶရဵၼ်း ဝူၼ်ႉဝႃႈ ရၢတ်ႉသျႃး ပဵၼ်ၵူၼ်းၵေႃႉယူႇၽၢႆႇလင် ၵူၺ်းၵႃႈ ၽၢႆႇတၢင်းရၢတ်ႉသျႃးသမ်ႉ ယုမ်ႇဝႃႈ မိူင်းဝၼ်းတူၵ်းတင်ႈၸႂ်ပွႆႇၶၢဝ်ႇ တႃႇႁႂ်ႈရၢတ်ႉသျႃးတူၵ်းလွၵ်းလႄႈ ၽၢႆႇတၢင်း ရၢတ်ႉသျႃးၵေႃႈ ဢမ်ႇလႆႈယွမ်းႁပ်ႉဝႃႈ ပဵၼ်ၵူၼ်းၵေႃႉယူႇၽၢႆႇလင် လွင်ႈၶေႃႈမုၼ်း လပ်ႉႁူဝ်ႈဢွၵ်ႇမႃးၼၼ်ႉ ဝႃႈၼႆ။

တႆးလွတ်ႈလႅဝ်း