ၶွင်ႇသီႇသိုၵ်းမၢၼ်ႈ ၽိူမ်ႉငိုၼ်းပၢတ်ႉၵျႅတ်ႉၽၢႆႇၵႅတ်ႇၶႄ သုင်ထိုင် Ks 5,600 ပီႇလီႇယၼ်ႇပျႃး

ၶွင်ႇသီႇသိုၵ်းမၢၼ်ႈ ၽိူမ်ႉပၢတ်ႉၵျႅတ်ႉငိုၼ်းတႃႇၸႂ်ႉတိုဝ်းၼႂ်းတပ်ႉသိုၵ်း ပီႊ 2023 – 2024 တႃႇသၢင်ႉငိုၼ်း Ks 5,600 ပီႇလီႇယၼ်ႇပျႃးပၢႆသေ ၼမ်လိူဝ်ပၢတ်ႉၵျႅတ်ႉငိုၼ်း ပီႊ 2022–2023 Ks 2,000 ပီႇလီႇယၼ်ႇပၢႆ ဝႃႈၼႆ။

မိူဝ်ႈဝႃးဝၼ်းထီႉ 10 April 2023 (လိူၼ်ႁႃႈလွင်ႈ 6 ၶမ်ႈ ပီႊတႆး 2117 ၼီႈ) သိုဝ်ႇၶၢဝ်ႇ BBC ဢွၵ်ႇၼႄဝႆႉဝႃႈ ၶွင်ႇသီႇသိုၵ်းမၢၼ်ႈ ပၼ်ၶႂၢင်ႉၸႂ်ႉတိုဝ်း ပၢတ်ႉၵျႅတ်ႉၽၢႆႇၵႅတ်ႇၶႄ ၶွင်တပ်ႉသိုၵ်းမၢၼ်ႈ ၼမ်လိူဝ်သေ ၵူႈႁွင်ႈၵၢၼ်လူင် တႃႇၶၢဝ်းတၢင်း 1 ပီႊ၊ မိူဝ်ႈပီႊပူၼ်ႉမႃး 2022–2023 ၼၼ်ႉ ပၼ်ၶႂၢင်ႉၸႂ်ႉတိုဝ်းငိုၼ်း တႃႇၼႂ်းတပ်ႉသိုၵ်းၵႂႃႇ Ks 3,700 ပီႇလီႇယၼ်ႇပၢႆၵူၺ်းၼႆယဝ်ႉ။

ၼႂ်းပၵ်းပိူင်ၽၼ်ႇတႃႇငိုၼ်းတွင်း ဢၼ်ၶွင်ႇသီႇသိုၵ်းမၢၼ်ႈ ၸႂ်ႉတိုဝ်းဝႆႉၼၼ်ႉ ၽၼ်ႇတႃႇငိုၼ်းတွင်း တႃႇၸႂ်ႉတိုဝ်းၼႂ်းပီႊ 2023−2024 ၼႂ်းမိူင်းႁူမ်ႈတုမ်ပတ်းပိုၼ်ႉၼၼ်ႉ ပၼ်ၶႂၢင်ႉၸႂ်ႉတိုဝ်းငိုၼ်းၸမ်ထိုင် Ks 20,000 ပီႇလီႇယၼ်ႇသေ ၼႂ်းၼၼ်ႉ ၸႂ်ႉတိုဝ်းပုၼ်ႈတႃႇၽၢႆႇၵႅတ်ႇၶႄၼႂ်းတပ်ႉသိုၵ်းၶဝ် တင်ႈတႄႇလိူၼ် April ၼႆႉၵႂႃႇ ဢၼ်မီးဢႃႇယု တႃႇၶၢဝ်းတၢင်း 1 ပီႊဝႃႈၼႆ။

ဢၼ်ၸႂ်ႉတိုဝ်းပၢတ်ႉၵျႅတ်ႉသုင်ၼၼ်ႉ လိူဝ်သေၽၢႆႇၵႅတ်ႇၶႄၶွင်သိုၵ်းမၢၼ်ႈယဝ်ႉ ထီႉသွင်သမ်ႉပဵၼ် ၽွင်းလူင်ၽၢႆႇငိုၼ်းလႄႈၽႅၼ်ၵၢၼ် ဢၼ်ထုၵ်ႈပၼ် ငိုၼ်းလိူၼ် ၵူၼ်းႁဵတ်းၵၢၼ်တင်းသဵင်ႈ တေၸႂ်ႉတိုဝ်းၵႂႃႇ Ks 4,300 ပီႇလီႇယၼ်ႇပၢႆသေ ပုၼ်ႈတႃႇ တွၼ်ႈပၢႆးပၺ်ႇၺႃႇ ပၼ်ၶႂၢင်ႉၸႂ်ႉတိုဝ်း Ks 2,000 ပီႇလီႇယၼ်ႇပၢႆလႄႈ တွၼ်ႈပၢႆးယူႇလီသမ်ႉ တေၸႂ်ႉတိုဝ်း Ks 800 ပီႇလီႇယၼ်ႇပၢႆၼႆယဝ်ႉ။

ပုၼ်ႈတႃႇတွၼ်ႈၾႆးၾႃႉၼၼ်ႉ ပၼ်ၶႂၢင်ႉၸႂ်ႉတိုဝ်း Ks 680 ပီႇလီႇယၼ်ႇ ၼႆသေတႃႉ တႃႇတေပၼ်ၾႆးၾႃႉ ၼႂ်းတိူင်းတႃႈၵုင်ႈၼၼ်ႉ တေႁႃပၢတ်ႉၵျႅတ်ႉတၢင်းၼွၵ်ႈ မႃးၽိူမ်ႉထႅမ်ထႅင်ႈ တႃႇသၢင်ႉငိုၼ်း Ks 1,000 ပီႇလီႇယၼ်ႇပၢႆၼႆယဝ်ႉ။

တႆးလွတ်ႈလႅဝ်း