ၶႄႇပိုၼ်ၽၢဝ်ႇ ၽွမ်ႉတူဝ်ႈတၼ်းတႃႇၶဝ်ႈပၢင်တိုၵ်းယဝ်ႉ

ဝၢႆးသေ တပ်ႉသိုၵ်းၶႄႇ ၽိုၵ်းၽွၼ်းၵၢၼ်သိုၵ်း လွမ်ႉႁွပ်ႈဢိူမ်ႈၸမ်ၵုၼ်ထႆႇဝၼ်ႇ မိူၼ်ပဵၼ်ပၢင်တိုၵ်းတေႉ တႃႇၶၢဝ်းတၢင်း 3 ဝၼ်း ယဝ်ႉတူဝ်ႈလီငၢမ်းၵႂႃႇၼၼ်ႉ တပ်ႉသိုၵ်းၶႄႇပိုၼ်ၽၢဝ်ႇဝႃႈ ၽွမ်ႉတူဝ်ႈတၼ်းတႃႇၶဝ်ႈပၢင်တိုၵ်းယဝ်ႉ ဝႃႈၼႆ။

ဢွၼ်တၢင်းၼႆႉၵေႃႈ ၽၢႆႇတၢင်းတပ်ႉသိုၵ်းၶႄႇလႆႈလၢတ်ႈဝႃႈ ၵၢၼ်ၽိုၵ်းၽွၼ်ႉသိုၵ်း ဢၼ်ၽွမ်ႉတူဝ်ႈတၼ်းတႃႇႁဵတ်းပၢင်တိုၵ်းၼၼ်ႉ မီးယိူင်းဢၢၼ်းတႃႇပၼ်ၾၢင်ႉ ထႆႇဝၼ်ႇ ဢၼ်ၶႄႇဢၢင်ႈဝႃႈ ပဵၼ်ပွတ်းဢွၼ်ႇတွၼ်ႈၼိုင်ႈၶွင်မိူင်းၶႄႇၼၼ်ႉ ဝႃႈၼႆ။

မိူဝ်ႈဝႃး ဝၼ်းထီႉ 10 April 2023 (လိူၼ်ႁႃႈလွင်ႈ 6 ၶမ်ႈ ပီႊတႆး 2117 ၼီႈ) တပ်ႉသိုၵ်း ၶႄႇ ပိုၼ်ၽၢဝ်ႇလၢတ်ႈဝႃႈ တပ်ႉသိုၵ်းၶႄႇ ၽွမ်ႉတေႃႇသူႈၵူႈၶိင်ႇ၊ ၵူႈၶၢဝ်းယၢမ်း တႃႇယႃႉလႅဝ်ပႅတ်ႈလွၵ်းလၢႆးၶွင်ထႆႇဝၼ်ႇ ဢၼ်ဝူၼ်ႉတႃႇဢဝ်လွတ်ႈလႅဝ်းလႄႈ လွင်ႈၶတ်းၸႂ်သၢင်ႈလွင်ႈၸမ်ၸႂ်ၸွမ်းတၢင်ႇၸိုင်ႈမိူင်းၼၼ်ႉ ဝႃႈၼႆ။

ၸိူင်ႉႁိုဝ်ၵေႃႈလီ သိုဝ်ႇၶၢဝ်ႇ AP လၢႆးငၢၼ်းဝႃႈ ၵၢၼ်ၽိုၵ်းၽွၼ်ႉသိုၵ်းပွၵ်ႈၵမ်းၼႆႉ သၢင်ႈပၼ်လွင်ႈသုၵ်ႉယုင်ႈဢေႇလႄႈ ဢမ်ႇယိုင်ႈယႂ်ႇတၢၼ်ႇ မိူဝ်ႈလိူၼ် August 2022 ဢၼ်ၶႄႇၽိုၼ်းၽွၼ်ႉတႃႇတုမ်ႉတွပ်ႇ Nancy Pelosi ႁူဝ်ပဝ်ႈသၽႃးၵူၼ်းမိူင်း ဢမေႇရိၵၢၼ်ႇ ဢၼ်ဢွၵ်ႇၶၢဝ်းတၢင်းၵႂႃႇထႆႇဝၼ်ႇၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉ မီးၸုမ်းတူဝ်တႅၼ်းသၽႃးဢမေႇရိၵၢၼ်ႇ ၸုမ်းၼိုင်ႈဢွၵ်ႇၶၢဝ်း တၢင်းၵႂႃႇထႆႇဝၼ်ႇ တႃႇႁူပ်ႉထူပ်းၸွမ်းၸွမ်ၸိုင်ႈထႆႇဝၼ်ႇ ဝၢႆးသေမၼ်းၼၢင်း ၵႂႃႇတီႈမိူင်းဢမေႇရိၵၢၼ်ႇသေ ပွၵ်ႈထိုင်ၶိုၼ်းထႆႇဝၼ်ႇၼၼ်ႉ ဝႃႈၼႆ။

ၽၢႆႇတၢင်းတပ်ႉၼမ်ႉဢမေႇရိၵၢၼ်ႇ လၢတ်ႈဝႃႈ ႁိူဝ်းတိုၵ်း USS Milius ဢွၵ်ႇၶၢဝ်းတၢင်းလတ်းၽၢၼ်ႇၵုၼ်ဢွၼ်ႇၵုၼ်ဢိတ်း ၼႂ်းပၢင်ႇလၢႆႇ Mischief Reef တႃႇႁဵတ်းသၢင်ႈ ႁႂ်ႈႁိူဝ်းဢွၵ်ႇၶၢဝ်းတၢင်း မီးလွင်ႈလွတ်ႈလႅဝ်း ဝႃႈၼႆ။

ၵဵဝ်ႇလူၺ်ႈလွင်ႈၼႆႉၵေႃႈ ၽၢႆႇတၢင်းၶႄႇ လၢတ်ႈဝႃႈ လွင်ႈႁဵတ်းသၢင်ႈ ဢမေႇရိၵၢၼ်ႇ ၼႆႉ ပူၼ်ႉပႅၼ်မၢႆမီႈသေ ၶဝ်ႈမႃးၼႂ်းပိုၼ်ႉတီႈၼၼ်ႉ လူၺ်ႈဢမ်ႇလႆႈႁပ်ႉ လွင်ႈပၼ်ၶႂၢင်ႉတီႈၶႄႇ ဝႃႈၼႆ။

တႆးလွတ်ႈလႅဝ်း