ၶႄႇလၢတ်ႈ ဢမ်ႇယၢမ်ႈၵူဝ် ဢမေႇရိၵၢၼ်ႇ လႄႈ ထႆႇဝၼ်ႇတေလႆႈပွၵ်ႈၶိုၼ်းႁိူၼ်း ယူႇႁူမ်ႈတင်းၶႄႇၵူၺ်း

မိူဝ်ႈဝၼ်းထီႉ 20 December 2021 (လိူၼ်ၸဵင်လွင်ႈ 2 ၶမ်ႈ ပီႊတႆး 2116 ၼီႈ) ဝင် ဢီႉ ၽွင်းလူင်ၽၢႆႇၼွၵ်ႈမိူင်း မိူင်းၶႄႇ လၢတ်ႈတီႈၼႂ်းဝဵင်းလူင် ပေႇၵျိၼ်း ၵဵဝ်ႇလူၺ်ႈလွင်ႈသုၵ်ႉယုင်ႈၼႂ်းၵႄႈၵၢင် ၶႄႇလႄႈထႆႇဝၼ်ႇၼၼ်ႉ ယွၼ်ႉလူင်ပွင်ၸိုင်ႈ ထႆႇဝၼ်ႇ ပိုင်ႈဢိင်ဢမေႇရိၵၢၼ်ႇ တွၼ်ႈတႃႇလွင်ႈလွတ်ႈလႅဝ်း မိူဝ်ႈၽွင်း ဢမေႇရိၵၢၼ်ႇ လႄႈ မိူင်းဢူၺ်းလီၶတ်းၸႂ် ၸႂ်ႉထႆႇဝၼ်ႇပဵၼ်ၶိူင်ႈမိုဝ်းတွၼ်ႈတႃႇၵုမ်းၵမ်ၶႄႇ ဝႃႈၼႆ။

သိုပ်ႇလၢတ်ႈထႅင်ႈဝႃႈ လွင်ႈႁဵတ်းသၢင်ႈၸိူဝ်းၼႆႉ တေတုမ်ႉတိူဝ်ႉတေႃႇ တူင်ႇဝူင်းဢၼ်ပဵၼ်ယူႇလႄႈ ႁဵတ်းႁၢႆႉလွင်ႈၵတ်းယဵၼ်ၼိမ်သဝ်းၼႂ်းပိုၼ်ႉတီႈၵႅပ်ႈ ထႆႇဝၼ်ႇ ႁူမ်ႈပႃး ပူၼ်ႉပႅၼ်ၼိူဝ် လွင်ႈသၢင်ႈတၢင်းႁၼ်ထိုင်ပဵၼ်ပိူင်လူင် ဢိၵ်ႇတင်း ပိူင်ၽႅၼ်လွင်ႈၸမ်ၸႂ်ၵၼ် ၼႂ်းၵႄႈၵၢင် မိူင်းၼိုင်ႈလႄႈမိူင်းၼိုင်ႈၼႆယူႇ။

ၵဵဝ်ႇလူၺ်ႈလွင်ႈၼႆႉသေ ၶႄႇတိုၼ်းတေတုမ်ႉတွပ်ႇၶိုၼ်း ႁူမ်ႈပႃး ၸႂ်ႉလွၵ်းလၢႆး တွပ်ႇၸူးၶိုၼ်းႁၢဝ်ႈႁႅင်း ၼင်ႇႁိုဝ်ၸုမ်းဢၼ်ၶႂ်ႈႁႂ်ႈ ထႆႇဝၼ်ႇၽၢတ်ႇဢွၵ်ႇမိူင်းၶႄႇၼၼ်ႉ ႁႂ်ႈပေႃးလႆႈတူၵ်းၸႂ်တိုၼ်ႇၵူဝ်ၵႂႃႇ ၼႆယူႇ။

ဝင် ဢီႉ သိုပ်ႇလၢတ်ႈထႅင်ႈဝႃႈ “ထႆႇဝၼ်ႇၼၼ်ႉ မိူၼ်ပဵၼ်ၵူၼ်းဢွၵ်ႇၶၢဝ်းတၢင်းၵူၺ်းလႄႈ လိုၼ်းသုတ်းတေလႆႈပွၵ်ႈၶိုၼ်းႁိူၼ်းၵူၺ်း ဢမ်ႇၸႂ်ႈဝႃႈ ပဵၼ်မၢၵ်ႇဢၼ်ၽႂ်တေၸႂ်ႉတိုဝ်းၵေႃႈလႆႈ လိုၼ်းသုတ်းယဝ်ႉ ၶႄႇတေႁူမ်ႈၸိူဝ်ႉၸၢတ်ႈၵၼ်ၶိုၼ်းထႅင်ႈပွၵ်ႈၼိုင်ႈ” ၼႆသေ ၶႄႇတေဢမ်ႇၵူဝ် တႃႇႁူပ်ႉၸူး ဢမေႇရိၵၢၼ်ႇ လႄႈ ယိၼ်းလီပၼ်တၢင်းႁူမ်ႈမိုဝ်းၸွမ်း ဢမေႇရိၵၢၼ်ႇယူႇ သင်ဝႃႈလႆႈႁဵတ်းၽွၼ်းလီႁူမ်ႈၵၼ်၊ ပေႃးဝႃႈမီးလွင်ႈၶႄႉၶဵင်ႇၵၼ်ၵေႃႈ ထုၵ်ႇလီပဵၼ်ၽၢႆႇလီၵူၺ်း ၼႆယဝ်ႉ။

ၽၢႆႇတင်းလူင်ပွင်ၸိုင်ႈထႆႇဝၼ်ႇၵေႃႈ ၵၢဝ်ႇလၢတ်ႈဝႃႈ ၶႄႇပၼ်ႁႅင်းမိပ်ႇငႅၼ်းၸူးပွၵ်ႈၼိုင်ႈယဝ်ႉပွၵ်ႈၼိုင်ႈ လႄႈ လိူဝ်သေၵူၼ်းၼႂ်းထႆႇဝၼ်ႇၼၼ်ႉၵူၺ်း မီးပုၼ်ႈၽွၼ်းတႅပ်းတတ်း လွင်ႈပဵၼ်ယူႇ ၼႂ်းၶၢဝ်းတၢင်းမိူဝ်းၼႃႈလႆႈသေ တေဢမ်ႇယွမ်းသုမ်းတေႃႇ လွင်ႈဢၼ်ၶႄႇလွၵ်ႇငိူတ်ႈၼၼ်ႉ ဝႃႈၼႆ။

တႆးလွတ်ႈလႅဝ်း