ၶႄႇသူင်ႇတပ်ႉႁိူဝ်းၶဝ်ႈလွၵ်ႇငိူတ်ႈထႆႇဝၼ်ႇ

မိူဝ်ႈဝၼ်းထီႉ 5 April 2023 (လိူၼ်ႁႃႈလွင်ႈ 1 ၶမ်ႈ ပီႊတႆး 2117 ၼီႈ) ၶႄႇသူင်ႇ တပ်ႉႁိူဝ်းတၢင်ႇႁိူဝ်းမိၼ် ၶဝ်ႈၸမ်ၼႃႈၼမ်ႉၽင်ႇပၢင်ႇလၢႆႇထႆႇဝၼ်ႇ ပွတ်းၸဵင်ႇ ၸၢၼ်းဝၼ်းဢွၵ်ႇ တႃႇပဵၼ်ၵၢၼ်ပၼ်ၾၢင်ႉ ဢွၼ်တၢင်းၸွမ်ၸိုင်ႈထႆႇဝၼ်ႇ Tsai Ing-wen တေႁူပ်ႉထူပ်းၸွမ်း Kevin McCarthy ႁူဝ်ပဝ်ႈသၽႃးတႅၼ်းၽွင်းၵူၼ်းမိူင်း ဢမေႇရိၵၢၼ်ႇ ဝႃႈၼႆ။

ၽၢႆႇတၢင်းၶႄႇယိုၼ်ယၼ်မႃးတႃႇသေႇဝႃႈ မိူင်းထႆႇဝၼ်ႇ ပဵၼ်ပွတ်းဢွၼ်ႇတွၼ်ႈ ၼိုင်ႈၶွင်မိူင်းၶႄႇလႄႈ လႆႈဢွၵ်ႇပၼ်ၾၢင်ႉမိူဝ်ႈလၢႆဝၼ်းပူၼ်ႉမႃးၼၼ်ႉဝႃႈ သင်ၸိူဝ်ႉ Tsai Ing-wen လႄႈ Kevin McCarthy မီးလွင်ႈႁူပ်ႉထူပ်းၵၼ်ၼႆ ၶႄႇတေတုမ်ႉတွပ်ႇ သေဢမ်ႇၵႃး မိူဝ်ႈပူၼ်ႉမႃးၼၼ်ႉၵေႃႈ ၶႄႇလႆႈၽိုၵ်းၽွၼ်ႉသိုၵ်း ယႂ်ႇလူင် ဝၢႆးသေ Nancy Pelosi ႁူဝ်ပဝ်ႈသၽႃးဢမေႇရိၵၢၼ်ႇၵေႃႉၵဝ်ႇ ဢွၵ်ႇၶၢဝ်းတၢင်းၵႂႃႇ ထႆႇဝၼ်ႇၼၼ်ႉ ဝႃႈၼႆ။

ၽၢႆႇတၢင်းႁွင်ႈၵၢၼ်လူင်ၽၢႆႇၵႅတ်ႇၶႄထႆႇဝၼ်ႇ လၢတ်ႈဝႃႈ တပ်ႉႁိူဝ်းၶွင်ၶႄႇ ဢၼ်မီး ႁိူဝ်းတၢင်ႇႁိူဝ်းမိၼ် Shandong ၼမ်းၼႃႈၼၼ်ႉ ဢွၵ်ႇၶၢဝ်းတၢင်းၽၢၼ်ႇပိုၼ်ႉတီႈ ၵႅပ်ႈ ပႃးသျီႇ (Bashi Channel) ဢၼ်ပဵၼ်လႅၼ်ၶႅၼ်ႈၵၢင်ၵုၼ်ထႆႇဝၼ်ႇလႄႈ ၾီႇလိပ်ႇ ပိၼ်ႇ ဢွၼ်တၢင်းတေၶဝ်ႈထိုင်ၼႃႈၼမ်ႉထႆႇဝၼ်ႇပွတ်းၸဵင်ႇၸၢၼ်းဝၼ်းဢွၵ်ႇ တႃႇၽိုၵ်းၽွၼ်ႉၵၢၼ်သိုၵ်း ၼႂ်းပႄႇသိၾိၵ်ႇပွတ်းဝၼ်းတူၵ်း ဝႃႈၼႆ။

သိုပ်ႇလၢတ်ႈဝႃႈ တပ်ႉႁိူဝ်းလႄႈ တပ်ႉၵၢင်ႁၢဝ်ထႆႇဝၼ်ႇ ႁူမ်ႈထိုင်ပႃး ၶိူင်ႈရေႇတႃႇ  (Radar) ၵူတ်ႇထတ်းၼိူဝ်ပိုၼ်ႉလိၼ် တေပႂ်ႉတူၺ်းလွင်ႈတူင်ႉၼိုင် တပ်ႉႁိူဝ်းၶႄႇ ၼင်ႇၶိုတ်းၶိုတ်းၸမ်ၸမ် ဝႃႈၼႆ။

ၵဵဝ်ႇလူၺ်ႈၼႆႉၵေႃႈ လႆႈမီးမႃးၼႂ်းၶၢဝ်းယၢမ်းဢၼ် ၸွမ်ၸိုင်ႈၾရင်ႇသဵတ်ႈ လႄႈ ႁူဝ်ပဝ်ႈၶွမ်ႇမသျိၼ်ႇယူးရူပ်ႇ (EU) ဢွၵ်ႇၶၢဝ်းတၢင်းထိုင် ဝဵင်းလူင် Beijing မိူင်းၶႄႇ တႃႇႁူပ်ႉထူပ်းၸွမ်း ၸွမ်ၸိုင်ႈၶႄႇ သျီႇ ၵျိၼ်းၽိင်ႇ လႄႈ ဢုပ်ႇဢူဝ်းၵဵဝ်ႇလူၺ်ႈလွင်ႈ ပၢင်တိုၵ်းယူႇၶရဵၼ်း ဝႃႈၼႆ။

တႆးလွတ်ႈလႅဝ်း