ၶႄႇသူင်ႇႁိူဝ်းမိၼ်တင်းၼမ်လွမ်ႉႁွပ်ႈထႆႇဝၼ်ႇ

ႁိူဝ်းမိၼ်ၶႄႇ မိၼ်လွမ်ႉႁွပ်ႈၵုၼ်ထႆႇဝၼ်ႇ ၼမ်လိူဝ်သေပိူၼ်ႈၼႂ်းပီႊၼႆႉ လွင်ႈၼႆႉၵေႃႈ ၵိူတ်ႇပဵၼ်မႃးဝၢႆးၶႄႇပိုၼ်ၽၢဝ်ႇၽႅၼ်ၵၢၼ်ၽိုၵ်းၽွၼ်ႉသိုၵ်း ၼႂ်းပၢင်ႇလၢႆႇဢၼ်ဢမ်ႇပေႃးၵႆတင်းၵုၼ်ထႆႇဝၼ်ႇၼၼ်ႉ ၼႆယူႇ။

မိူဝ်ႈဝၼ်းထီႉ 11 July 2024 (လိူၼ်ပႅတ်ႇမႂ်ႇ 6 ၶမ်ႈ ပီႊတႆး 2118 ၼီႈ) ႁွင်ႈၵၢၼ်ၽၢႆႇၵႅတ်ႇၶႄထႆႇဝၼ်ႇ ပိုတ်ႇလၢတ်ႈၼႄဝႃႈ ထူပ်းႁၼ်ႁိူဝ်းမိၼ်တပ်ႉသိုၵ်းၶႄႇ 66 လမ်း လႄႈ ႁိူဝ်းတိုၵ်း PLAN 7 လမ်း ပၼ်ႇလဵပ်ႈယူႇၸွမ်းႁိမ်းႁွမ်းၵုၼ်ထႆႇဝၼ်ႇၼၼ်ႉယူႇ ဝႃႈၼႆ။

မိူဝ်ႈၼႂ်းဝၼ်းထီႉ 10 July 2024 ၼၼ်ႉၵေႃႈ ထႆႇဝၼ်ႇ ထူပ်းႁၼ်ႁိူဝ်းမိၼ်တပ်ႉသိုၵ်းၶႄႇမိူၼ်ၵၼ်လႄႈ ၽၢႆႇတၢင်းၶႄႇၼၼ်ႉၵေႃႈ ဢၢင်ႈဝႃႈ ပဵၼ်ႁိူဝ်းမိၼ် ဢၼ်တေၶဝ်ႈႁူမ်ႈၽိုၵ်းၽွၼ်ႉသိုၵ်း ၼႂ်းပိုၼ်ႉတီႈပႄႇသိၾိၵ်ႇပွတ်းဝၼ်းတူၵ်း ယွၼ်ႉႁိူဝ်းတေႃႉတၢင်ႇႁိူဝ်းမိၼ် Shandong ၶွင်တပ်ႉသိုၵ်းၶႄႇ ပႂ်ႉဝႆႉယူႇၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ႁွင်ႈၵၢၼ်ၽၢႆႇၵႅတ်ႇၶႄထႆႇဝၼ်ႇၼၼ်ႉၵေႃႈ လႆႈလၢတ်ႈဝႃႈ မီးႁိူဝ်းမိၼ် 56 လမ်း ပူၼ်ႉၶၢမ်ႈလႅၼ်ၶႅၼ်ႈၼႃႈၾႃႉ ၼႂ်းပိုၼ်ႉတီႈၵႅပ်ႈထႆႇဝၼ်ႇလႄႈ လႆႈပၵ်းတႃတူၺ်းၸွမ်းငဝ်းလၢႆးသေတုမ်ႉတွပ်ႇၵႂႃႇၶိုၼ်းယဝ်ႉ၊ မၢင်လမ်းၼၼ်ႉ ယင်းၶဝ်ႈၵႂႃႇၸမ်ထႆႇဝၼ်ႇႁႅင်းၼႃႇ ႁၢင်ႇၵႆမွၵ်ႈ 61 ၵီႇလူဝ်ႇမီႇတိူဝ်ႇၼၼ်ႉၵူၺ်း ဝႃႈၼႆ။

ၼႂ်းဝၼ်းထီႉ 9 July 2024 ၼၼ်ႉၵေႃႈ ၽၢႆႇတၢင်းလူင်ပွင်ၸိုင်ႈၵျႃႇပၢၼ်ႇ ဢွၵ်ႇမႃးယိုၼ်ယၼ်ဝႃႈ ႁိူဝ်းတပ်ႉသိုၵ်းၶႄႇ 4 လမ်း ႁူမ်ႈပႃးႁိူဝ်း Shandong ဢွၵ်ႇၶၢဝ်းတၢင်းၵႂႃႇ တီႈႁၢင်ႇၵႆၵၼ်တင်ၵုၼ် Miyakojima မီးယူႇတၢင်းၸဵင်ႇၸၢၼ်းဝၼ်းဢွၵ်ႇၵျႃႇပၢၼ်ႇၼၼ်ႉ မွၵ်ႈ 520 ၵီႇလူဝ်ႇမီႇတိူဝ်ႇ လႄႈ ထူပ်းႁၼ်ဝႃႈ မီးႁိူဝ်းမိၼ်တိုၵ်း ဢိၵ်ႇတင်း ႁိူဝ်းမိၼ်မႅင်းမီႈ ၵမ်ႈၽွင်ႈ ၵိုတ်းဝႆႉတီႈၼိူဝ်ႁိူဝ်း Shandong ၼၼ်ႉ ဝႃႈၼႆ။

တႆးလွတ်ႈလႅဝ်း