ၶႄႇဢမ်ႇႁၢၼ်ႉၸႂ် လွင်ႈဢမေႇရိၵၢၼ်ႇ ယိုဝ်းမၢၵ်ႇပွင်းလူမ်းလူင်

ဢမေႇရိၵၢၼ်ႇ ထၢင်ႇပိူင်ႈဝႃႈ လွင်ႈဢၼ်ၶႄႇပွႆႇမၢၵ်ႇပွင်းလူမ်းလူင်(Balloon)ၼၼ်ႉ တေပဵၼ်မၢၵ်ႇပွင်းလူမ်းဢဝ်ၶၢဝ်ႇၼႆသေ လႆႈပွႆႇမၢၵ်ႇမိတ်ႉသႆးယိုဝ်းၵွႆၵႂႃႇယူႇယဝ်ႉ။

ယွၼ်ႉၼၼ်လႄႈ ႁွင်ႈၵၢၼ်လူင်ၽၢႆႇၼွၵ်ႈမိူင်း မိူင်းၶႄႇၵေႃႈ ပဵၼ်ဢၼ်ဢမ်ႇႁၢၼ်ႉၸႂ်မႃးတေႉတေႉယဝ်ႉ ဢွၵ်ႇမႃးသၢၼ်ၶတ်း တေႃႇဢမေႇရိၵၢၼ်ႇ ဢၼ်သူင်ႇႁိုဝ်းမိၼ် ယိုဝ်းမၢၵ်ႇမိတ်ႉသႆး သႂ်ႇမၢၵ်ႇပွင်းလူမ်းဢဝ်ၶၢဝ်ႇ တီႈၼႃႈၾႃႉ ဢမေႇရိၵၢၼ်ႇလႄႈၶႅၼ်ႇၼေႇတႃႇၼၼ်ႉ ၼႆယဝ်ႉ။

မိူဝ်ႈဝၼ်းထီႉ 5 February 2023 (လိူၼ်သၢမ်လွင်ႈ 1 ၶမ်ႈ ပီႊတႆး 2117 ၼီႈ) ၽူႈမီးပုၼ်ႈၽွၼ်းၽၢႆႇၶႄႇၵေႃႈ လႆႈပွင်ႇလႅင်းပၼ်တီႈဢမေႇရိၵၢၼ်ႇယူႇ လၢႆပွၵ်ႈလၢႆၵမ်းဝႃႈ မၢၵ်ႇပွင်းလူမ်း ပဵၼ်ၶွင်ၵူၼ်းမိူင်း တႃႇၵူတ်ႇထတ်းတူၺ်း ၾိင်ႈၾႃႉၵူၺ်း၊ ဢၼ်လႆႈပူၼ်ႉပႅၼ်ၶဝ်ႈၼႂ်းဢမေႇရိၵၢၼ်ႇၼၼ်ႉၵေႃႈ ဢမ်ႇလႆႈတင်ႈၸႂ်၊ ၵူၺ်းဢမေႇရိၵၢၼ်ႇသမ်ႉ ဢဝ်မၢၵ်ႇမိတ်ႉသႆးပိုတ်းယိုဝ်းၸိူင်ႉၼႆ ႁဵတ်းပူၼ်ႉလိူဝ်ၼႃႇယဝ်ႉလႄႈ ပဵၼ်ၵၢၼ်ပူၼ်ႉပႅၼ် ငဝ်ႈၶၢမ်ႇပိုၼ်ႉပိူင်ၵၢၼ် ၼႂ်းၵႄႈၵၢင်မိူင်းတေႃႇမိူင်း ယွၼ်ႉၼၼ် ၶႄႇတေသိုပ်ႇႁဵတ်းသၢင်ႈၵႂႃႇ ၸွမ်းပၵ်းပိူင်ဢၼ်မီးၼၼ်ႉ တဵမ်တဵမ်ထူၼ်ႈထူၼ်ႈၼႆယဝ်ႉ။

ၽၢႆႇတၢင်းႁွင်ႈၵၢၼ်လူင်ၽၢႆႇၵႅတ်ႇၶႄဢမေႇရိၵၢၼ်ႇၵေႃႈ လႆႈပိုတ်ႇၼႄထိုင် လွင်ႈဢၼ်ယိုဝ်းမၢၵ်ႇပွင်းလူမ်းၼႆႉ ၸႂ်ႉႁိူဝ်းမိၼ် F-22 ယိုဝ်းလူၺ်ႈ မၢၵ်ႇမိတ်ႉသႆး AIM-9X ၼိုင်ႈလုၵ်ႈ တူၵ်းလူင်းၵႂႃႇတီႈႁၢင်ႇၵႆၵၼ်တင်းၽင်ႇပၢင်ႇလၢႆႇ ဢမေႇရိၵၢၼ်ႇ 6 လၵ်း ၼႆႉၼႆယဝ်ႉ။

ၽၢႆႇတၢင်းဢမေႇရိၵၢၼ်ႇၼၼ်ႉၵေႃႈ ထူပ်းႁၼ်မၢၵ်ႇပွင်းလူမ်းၶႄႇ ပူၼ်ႉၶဝ်ႈၼိူဝ်ၼႃႈၾႃႉ ပွၵ်ႈဢွၼ်တၢင်းသုတ်းၼၼ်ႉ ၸဵမ်မိူဝ်ႈဝၼ်းထီႉ 28 January 2023 ၼၼ်ႉလႄႈ ဝၢႆးသေၼၼ်ႉၵေႃႈ လႆႈမိၼ်ၶၢမ်ႈၵႂႃႇၼိူဝ်ၼႃႈၾႃႉၶႅၼ်ႇၼေႇတႃႇ ဢွၼ်တၢင်းတေထူပ်းႁၼ်ၶိုၼ်းထႅင်ႈ ၼႂ်းၼႃႈၾႃႉဢမေႇရိၵၢၼ်ႇ မိူဝ်ႈဝၼ်းထီႉ 31 January ၼၼ်ႉ ထူပ်းႁၼ်ပိဝ်ယူႇၼိူဝ်ၼႃႈၾႃႉ ဢၼ်ပဵၼ်ပိုၼ်ႉတီႈၵဵပ်း မၢၵ်ႇမိတ်ႉသႆး လႄႈ ၼိဝ်းၶလီးယႃးတီႈၼိုင်ႈ ၼႂ်းမိူင်းဢမေႇရိၵၢၼ်ႇၼၼ်ႉ ၼႆယဝ်ႉ။

တႆးလွတ်ႈလႅဝ်း