ၶႄႇၵေႃႇတင်ႈတပ်ႉတရူၼ်းၸွပ်ႇၶၢဝ်ႇ ဢၼ်ဝႆးၽႂ်းလိူဝ်သဵင်

ၶေႃႈမုၼ်းလပ်ႉဢမေႇရိၵၢၼ်ႇ ဢၼ်လႆႈႁူဝ်ႈဢွၵ်ႇမႃးၼၼ်ႉ ၼႄႁႂ်ႈႁၼ်ဝႃႈ တပ်ႉသိုၵ်းၶႄႇ ႁၢင်ႈႁႅၼ်းၵေႃႇတင်ႈတပ်ႉတရူၼ်းၸွပ်ႇၶၢဝ်ႇ ဢၼ်မိၼ်ဝႆးၽႂ်း လိူဝ်သဵင်ပဵၼ် 3 ပုၼ်ႈၼၼ်ႉ ဝႃႈၼႆ။

ၸွမ်းၼင်ႇသိုဝ်ႇၶၢဝ်ႇ Washington Post လၢႆးငၢၼ်း မိူဝ်ႈဝၼ်းထီႉ 18 April 2023 (ဝၼ်း လိူၼ်ႁႃႈလပ်း ပီႊတႆး 2117 ၼီႈ) လႆႈဢၢင်ႈဢိင် တီႈၶေႃႈမုၼ်းလပ်ႉ ၶွင်ၸုမ်းၶၢဝ်ႇ National Geospatial-Intelligence Agency – NGA ဢၼ်ႁူဝ်ႈဢွၵ်ႇမႃးၼၼ်ႉ ထူပ်းႁၼ်ၶႅပ်းႁၢင်ႈ ဢၼ်ထုၵ်ႇထၢႆႇလူၺ်းလၢဝ်ပွမ် မိူဝ်ႈဝၼ်းထီႉ 9 August 2022 ပူၼ်ႉမႃးၼၼ်ႉ ၼႄႁႂ်ႈႁၼ်ထိုင်တရူၼ်းၸွပ်ႇၶၢဝ်ႇ ဢၼ်လႆႈၸႂ်ႉမၢၵ်ႇၼူၾႆး WZ-8 သေမိၼ် တႃႇ 2 လမ်း တီႈၼႂ်းတပ်ႉၵၢင်ႁၢဝ်ၶႄႇ ဢၼ်မီးယူႇတီႈမိူင်းၶႄႇပွတ်းဝၼ်း ဢွၵ်ႇ ယူႇႁၢင်ႇၵႆဝဵင်းလူင် Shanghai မွၵ်ႈ 560 ၵီႇလူဝ်ႇမီႇတိူဝ်ႇ ဝႃႈၼႆ။

ၸိူင်ႉႁိုဝ်ၵေႃႈလီ မိူဝ်ႈၽွင်းမီးလွင်ႈလၢႆးငၢၼ်းၶၢဝ်ႇယူႇၼၼ်ႉ ၽၢႆႇတၢင်း ဢမေႇရိၵၢၼ်ႇ လႄႈ ၶႄႇ ၵေႃႈ ဢမ်ႇပႆႇလႆႈဢွၵ်ႇမႃးလၢတ်ႈၸွမ်းလွင်ႈသင် ဝႃႈၼႆ။

သိုဝ်ႇၶၢဝ်ႇ Washington Post ယင်းလၢႆးငၢၼ်း လွင်ႈၶဝ်ႈထိုင်ႁူင်းၵၢၼ်တရူၼ်းၼႆႉ လုၵ်ႉမႃးတီႈ ၶႅပ်းႁၢင်ႈ ၼႂ်းၶေႃႈမုၼ်းလပ်ႉ ဢၼ်ပိုၼ်ၽႄႈတီႈၼိူဝ်ဢႅပ်း Discord ဢၼ်လုၵ်ႈၸၢင်ႈတပ်ႉၵၢင်ႁၢဝ်ဢမေႇရိၵၢၼ်ႇၵေႃႉၼိုင်ႈ ဢဝ်မႃးပိုၼ်ၽႄႈ လႄႈ ထုၵ်ႇတီႉၺွပ်း ၼႂ်းလွင်ႈတၢင်း ၵဵဝ်ႇၶွင်ႈၸွမ်းၵၢၼ်ပိုၼ်ၽႄႈၶေႃႈမုၼ်းလပ်ႉ ၽၢႆႇလွင်ႈမၼ်ႈၼိမ်သဝ်းၸိူဝ်ႉၸၢတ်ႈ လူၺ်ႈဢမ်ႇလႆႈႁပ်ႉလွင်ႈပၼ်ၶႂၢင်ႉၼၼ်ႉ ဝႃႈၼႆ။

ၵဵဝ်ႇလူၺ်ႈလွင်ႈၶေႃႈမုၼ်းလပ်ႉဢမေႇရိၵၢၼ်ႇႁူဝ်ႈဢွၵ်ႇမႃးၼႆႉ ႁဵတ်းႁႂ်ႈဢမေႇရိ ၵၢၼ်ႇ ယူႇၼႂ်းငဝ်းလၢႆးဢၼ်မီးတိုဝ်ႉတၢင်း သၢင်ႈလွင်ႈလူႉသုမ်း ၽၢႆႇလွင်ႈမၼ်ႈၼိမ် သဝ်းၸၼ်ႉလုမ်ႈၾႃႉလႄႈ သၢင်ႈလွင်ႈတၢင်းဢၢႆပၼ်ဢမေႇရိၵၢၼ်ႇ ဢၼ်ၵဵဝ်ႇၶွင်ႈ ၸွမ်းလွင်ႈဢဝ်ၶၢဝ်ႇ မိူင်းဢူၺ်းလီ ဢိၵ်ႇတင်း ပိုတ်ႇၼႄတီႈဢူၼ်ႈဢွၼ်ႇ ၶွင်တပ်ႉသိုၵ်းယူႇၶရဵၼ်းၼၼ်ႉ ဝႃႈၼႆ။

တႆးလွတ်ႈလႅဝ်း