ၶႄႇၽိုၵ်းသိုၵ်း မိူၼ်ၽၢင်ႁၢင်ႈတေႉ ႁွပ်ႈၵုၼ်ထႆႇဝၼ်ႇ ၶၢဝ်းတၢင်းတႃႇ 3 ဝၼ်း

ဝၢႆးသေ ၸွမ်ၸိုင်ႈထႆႇဝၼ်ႇ Tsai Ing-wen ဢွၵ်ႇၶၢဝ်းတၢင်းသူႇၸႂ်း မိူင်းဝၼ်းတူၵ်း လႆႈႁူပ်ႉဢုပ်ႇၸွမ်းၽူႈယႂ်ႇၵူၼ်းလူင် ႁူမ်ႈပႃး Kevin McCarthy ႁူဝ်ပဝ်ႈသၽႃးၵူၼ်းမိူင်း မိူင်းဢမေႇရိၵၢၼ်ႇသေ ၽွင်းပွၵ်ႈထိုင်ၶိုၼ်း ၵုၼ်ထႆႇဝၼ်ႇ ၶၢဝ်းယၢမ်းလၢႆၸူဝ်ႈမူင်းဢွၼ်ႇၵူၺ်း တပ်ႉသိုၵ်းၶႄႇ လႆႈတႄႇၽိုၵ်းၽွၼ်ႉၵၢၼ်သိုၵ်း ႁွပ်ႈၵုၼ်ထႆႇဝၼ်ႇ မိူၼ်ၽၢင်ႁၢင်ႈၶိုၼ်ႈႁုပ်ႈသိမ်းၵုၼ်ထႆႇဝၼ်ႇတေႉ ၼႂ်းဝၼ်းထီႉ 8-10 April 2023 ပိူဝ်ႈတႃႇပဵၼ်လွင်ႈပၼ်ၾၢင်ႉထိုင်ထႆႇဝၼ်ႇ ဝႃႈၼႆ။

ႁွင်ႈၵၢၼ်လူင်ၽၢႆႇၵႅတ်ႇၶႄ ထႆႇဝၼ်ႇ ဢွၵ်ႇမႃးပိုၼ်ၽၢဝ်ႇဝႃႈ ႁိူဝ်းမိၼ်တိုၵ်း ၶႄႇ 71 လမ်း လႄႈတႃႇ 45 လမ်းသမ်ႉ လႆႈမိၼ်ၶၢမ်ႈလႅၼ်ၶႅၼ်ႈပိုၼ်ႉတီႉၵႅပ်ႈထႆႇဝၼ်ႇ ၶဝ်ႈမႃး  ႁိူဝ်းတိုၵ်း 8−9  လမ်း ၼၼ်ႉၵေႃႈ လႆႈလတ်းၶၢမ်ႈလႅၼ်ၶႅၼ်ႈ ပူၼ်ႉၶဝ်ႈမႃးၼႂ်းၼႃႈၼမ်ႉပၢင်ႇလၢႆႇထႆႇဝၼ်ႇ ၼႆယူႇ။  ၸွမ်ၸိုင်ႈထႆႇဝၼ်ႇ Tsai Ing-wen ၵေႃႈလၢတ်ႈဝႃႈ ထႆႇဝၼ်ႇ လႆႈၶဵင်ႇတႃႉဢၢမ်းၼၢတ်ႈမိူင်းၶႄႇမႃး ၶၢဝ်းတၢင်းႁိုင်သေတႃႉ ထႆႇဝၼ်ႇ လႄႈ ဢမေႇရိၵၢၼ်ႇ တေၶတ်းၸႂ်ႁူမ်ႈႁွမ်းၸွမ်းမိူင်း ၸိူဝ်းပဵၼ်ဝႆႉ တီႇမူဝ်ႇၶရေႇသီႇၼၼ်ႉသေ သိုပ်ႇႁူမ်ႈမိုဝ်းႁဵတ်းၵၢၼ်ၵႂႃႇဝႃႈၼႆ။

မိူဝ်ႈဝၼ်းထီႉ 9 April 2023 ၶႄႇလႆႈၽိုၵ်းၽွၼ်ႉၵၢၼ်သိုၵ်း တႃႇၶဝ်ႈတိုၵ်း ဢွင်ႈတီႈဢၼ်လွင်ႈယႂ်ႇလၢႆလၢႆတီႈ မိူၼ်ၼင်ႇ ၼႃႈၼမ်ႉပၢင်ႇလၢႆႇ ဢၼ်ႁွပ်ႈၵုၼ်ထႆႇဝၼ်ႇ ဝႆႉၼၼ်ႉၵေႃႈ လႆႈၸႅၵ်ႇဢဵၼ်ႁႅင်းလွမ်ႉႁွပ်ႈဝႆႉ ဝႃႈၼႆ။ ႁွင်ႈၵၢၼ်လူင်ၽၢႆႇၼွၵ်ႈမိူင်း ဢမေႇရိၵၢၼ်ႇၵေႃႈ လႆႈဢွၵ်ႇမႃးလၢတ်ႈဝႃႈ ႁႂ်ႈၶႄႇၵိုတ်းယိုတ်းလွင်ႈႁဵတ်းသၢင်ႈၸိူဝ်းၼၼ်ႉၵမ်းလဵဝ် ယွၼ်ႉဝႃႈ ဢၼ် Tsai Ing-wen ဢွၵ်ႇၶၢဝ်းတၢင်းသူႇၸႂ်းမိူင်းဝၼ်းတူၵ်းၼႆႉ တႃႇႁႃလွင်ႈပၢႆးမၢၵ်ႈမီးၵူၺ်း ဢမ်ႇလႅၵ်ႈလၢႆႈလွင်ႈထႆႇဝၼ်ႇ ဝႃႈၼႆ။

ၶႄႇႁၢင်ႈႁႅၼ်းပၢင်ၽိုၵ်းၽွၼ်ႉၵၢၼ်သိုၵ်းတႃႇႁုပ်ႈသိမ်းဢဝ်ၵုၼ်ထႆႇဝၼ်ႇ ၸိူင်ႉႁိုဝ် ၼႆၼၼ်ႉ သိုဝ်ႇၶၢဝ်ႇမိူင်းၶႄႇဢွၵ်ႇဝႆႉဝႃႈ ပၢင်ၽိုၵ်းၽွၼ်ႉၵၢၼ်သိုၵ်းပွၵ်ႈၼႆႉ မိူၼ်ၼင်ႇ လႆႈဢွၵ်ႇၸွပ်ႇသွၵ်ႈ လၢႆလၢႆလွၵ်းလၢႆး လႄႈ ႁၢင်ႈႁႅၼ်းတႃႇမုင်ႈၸူး လွမ်ႉႁွပ်ႈပႅတ်ႈၵုၼ်ထႆႇဝၼ်ႇသေ ႁုပ်ႈသိမ်းဢဝ်၊ ၶိူင်ႈၵွင်ႈၵၢင်ႇ ဢၼ်လႆႈဢဝ်မႃးၽိုၵ်းၽွၼ်ႉပွၵ်ႈၼႆႉ တေမီး ၵွင်ႈလူင်သႅၼ်းယိုဝ်းၵႆ၊ ႁိူဝ်းတိုၵ်း၊ ႁိူဝ်းယိုဝ်းမၢၵ်ႇမိတ်ႉသႆး၊ ႁိူဝ်းမိၼ်လိုပ်ႈတိုၵ်း၊ ႁိူဝ်းမိၼ်ပွႆႇမၢၵ်ႇ လႄႈ ႁိူဝ်းမိၼ်တႃႇထႅမ်ၼမ်ႉမၼ်း ဢိၵ်ႇပႃးၶိူင်ႈၶိုတ်းၵၢပ်ႈလၢႆလၢႆသႅၼ်း ၸဵမ်ၸိူဝ်းၼႆႉဝႃႈၼႆ။

ပၼ်ႁႃ ၵႄႈၵၢင်မိူင်းၶႄႇလႅင် လႄႈ ၵုၼ်ထႆႇဝၼ်ႇၼႆႉ တႄႇၸဵမ်မိူဝ်ႈပီႊ 1949 မႃး ယွၼ်ႉဝႃႈ မဝ်ႇၸိုဝ်ႇတုင်း ဢၼ်ပဵၼ်ၶႄႇလႅင်ၶွမ်ႇမိဝ်ႇၼိတ်ႉ လႆႈယုၵ်ႉတပ်ႉသိုၵ်း ၶဝ်ႈတိုၵ်း တပ်ႉသိုၵ်းၸွမ်ၸိုင်ႈ ၸျဵင်းၵၢႆႇၶျဵၵ်ႉ Chiang Kai-shek ဢၼ်ပဵၼ်ၶႄႇၽိူၵ်ႇ ၼၼ်ႉသေ ထိုင်တီႈၶႄႇၽိူၵ်ႇ ပေႃးလႆႈထွႆႁူၼ် ပၢႆႈၵႂႃႇယူႇတီႈၵုၼ်ထႆႇဝၼ်ႇၼႆယူႇ၊ တႄႇၸဵမ်မိူဝ်ႈၼၼ်ႉမႃး ၵူၼ်းမိူင်းထႆႇဝၼ်ႇ လႆႈမၵ်းမၼ်ႈ ပဵၼ်မိူင်းႁင်းၶေႃယဝ်ႉ၊ ၵူၺ်းၽၢႆႇမိူင်းၶႄႇလႅင်တႄႉဝႃႈ ထႆႇဝၼ်ႇ ပဵၼ်ၸႄႈတွၼ်ႈ ဢၼ်ၽၢတ်ႇမိူင်းၶႄႇဢွၵ်ႇၵႂႃႇၵူၺ်းၼႆယူႇ၊ သျီႇ ၵျိၼ်းၽိင်ႇ Xi Jinping ၸွမ်ၸိုင်ႈမိူင်းၶႄႇ ယင်းလၢတ်ႈဝႃႈ တႃႇထႆႇဝၼ်ႇ တေမႃးႁူမ်ႈပဵၼ်မိူင်းလဵဝ်ၵၼ်ၼၼ်ႉ တိုၼ်းတေႁဵတ်းႁႂ်ႈပေႃးလႆႈ ဝႃႈၼႆ။

တႆးလွတ်ႈလႅဝ်း