ၶႄႇၽိုၵ်းၽွၼ်ႉသိုၵ်း လွမ်ႉႁွပ်ႈၵုၼ်ထႆႇဝၼ်ႇထႅင်ႈ လူၺ်ႈၸႂ်ႉမၢၵ်ႇၵွင်ႈတေႉ

ဝၢႆးသေၶႄႇၽိုၵ်းၽွၼ်ႉၵၢၼ်သိုၵ်း ၽၢႆႇတၢင်းၵၢင်ႁၢဝ် ၶၢဝ်းတၢင်း 3 ဝၼ်း ယဝ်ႉတူဝ်ႈ ၵႂႃႇၼၼ်ႉ တပ်ႉၼမ်ႉၶႄႇ ၶိုၼ်းသိုပ်ႇၽိုၵ်းၽွၼ်ႉ ပိုတ်းယိုဝ်းလွမ်ႉႁွပ်ႈၵုၼ်ထႆႇဝၼ်ႇ လူၺ်ႈၸႂ်ႉတိုဝ်းမၢၵ်ႇၵွင်ႈတေႉ ဝႃႈၼႆ။

မိူဝ်ႈဝၼ်းထီႉ 11 April 2023 (လိူၼ်ႁႃႈလွင်ႈ 7 ၶမ်ႈ ပီႊတႆး 2117 ၼီႈ) တပ်ႉၼမ်ႉၶႄႇ လႆႈၽိုၵ်းၽွၼ်ႉသိုၵ်း လူၺ်ႈၸႂ်ႉတိုဝ်းမၢၵ်ႇၵွင်ႈတေႉ ၼႂ်းပိုၼ်ႉတီႈၵႅပ်ႈထႆႇဝၼ်ႇ ႁိမ်း ႁွမ်းၵုၼ်ၽိင်ထၢၼ် (Pingtan Island) ပွတ်းတွၼ်ႈၾူၸဵၼ်ႉ (Fujian) ဢၼ်မီးၸမ်ၵုၼ် ထႆႇဝၼ်ႇတီႈသုတ်းၼၼ်ႉ ဝႃႈၼႆ။

ၸွမ်းၼင်ႇ လွင်ႈမၵ်းတမ်းၶၢဝ်းယၢမ်းၽိုၵ်းၽွၼ်ႉၵၢၼ်သိုၵ်း ႁိမ်းၸမ်ၵုၼ်ထႆႇဝၼ်ႇ တႃႇ 12 ဝၼ်းၼၼ်ႉသေ ၽၢႆႇတၢင်းၶႄႇၵေႃႈ လႆႈၽိုၵ်းၽွၼ်ႉသိုၵ်း ဢမ်ႇထၢတ်ႈ ဢမ်ႇဝၢႆး တႃႇပၼ်ၾၢင်ႉထႆႇဝၼ်ႇ ဝႃႈၼႆ။

ၵၢၼ်ၽိုၵ်းၽွၼ်ႉသိုၵ်း ၼႂ်းၶၢဝ်းတၢင်း 3 ဝၼ်း ဢွၼ်တၢင်းသုတ်းၼၼ်ႉ ၽိုၵ်းၽွၼ်ႉ လူၺ်ႈၽၢႆႇတပ်ႉၵၢင်ႁၢဝ် ၼႂ်းၵၢၼ်ၸၢမ်းယိုဝ်းပဝ်ႉမၢႆလႄႈ ၽိုၵ်းလွမ်ႉႁွပ်ႈၵုၼ်ထႆႇ ဝၼ်ႇသေ ယဝ်ႉတူဝ်ႈၵႂႃႇမိူဝ်ႈဝၼ်းထီႉ 10 April 2023 လႄႈ မီးႁိူဝ်းမိၼ်တိုၵ်း၊ ႁိူဝ်းမိၼ်ပွႆႇမၢၵ်ႇၶွင်ၶႄႇ ၶဝ်ႈႁူမ်ႈ 20 လမ်းပၢႆ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ထိုင်မႃးမိူဝ်ႈဝႃး ဝၼ်းထီႉ 11 April 2023 ၼၼ်ႉ ပဵၼ်ဝၼ်း ၽိုၵ်းၽွၼ်ႉသိုၵ်း ဝၼ်းထီႉ 4 ၼႂ်းၽႅၼ်ၵၢၼ်ၽိုၵ်းၽွၼ်ႉၵၢၼ်သိုၵ်းၶၢဝ်းတၢင်း 12 ဝၼ်းလႄႈ ၽိုၵ်းၽွၼ်ႉလူၺ်ႈၽၢႆႇတပ်ႉၼမ်ႉ ၼႂ်းၵၢၼ်ၸႂ်ႉတိုဝ်းမၢၵ်ႇၵွင်ႈတေႉ ႁိမ်းႁွမ်းၼွၵ်ႈၽင်ႇပၢင်ႇလၢႆႇ ၼႂ်းပွတ်းတွၼ်ႈၾူၸဵၼ်ႉ (Fujian) မိူင်းၶႄႇပွတ်းၸဵင်ႇ ၸၢၼ်းဝၼ်းတူၵ်း ဢၼ်ယူႇၸမ်ၵုၼ်ထႆႇဝၼ်ႇၼၼ်ႉ ဝႃႈၼႆ။

တႆးလွတ်ႈလႅဝ်း