ၶႄႇႁၢင်ႈႁႅၼ်းၸတ်းႁဵတ်းပၢင်ၵုမ်လူင်ပႃႇတီႇၶွမ်ႇမိဝ်ႇၼိတ်ႉမိူင်းၶႄႇ ပွၵ်ႈၵမ်း 20

ၶႄႇႁၢင်ႈႁႅၼ်းၸတ်းႁဵတ်းပၢင်ၵုမ်လူင်ပႃႇတီႇၶွမ်ႇမိဝ်ႇၼိတ်ႉမိူင်းၶႄႇ ပွၵ်ႈၵမ်း 20 ၼႂ်းဝၼ်းထီႉ 16 October 2022 ဢၼ်တေမႃးထိုင်ၼႆႉသေ တေၸတ်းႁဵတ်းၵႂႃႇၶၢဝ်းတၢင်း 1 ဝူင်ႈ လႄႈ တေမီးၽူႈၶဝ်ႈၸုမ်း ၶိုၼ်ႈႁွတ်ႈပၢင်ၵုမ်တင်းမူတ်း 2,300 ၵေႃႉသေ တေၸတ်းႁဵတ်းတီႈႁူင်းႁေႃလူင် ဢၼ်မီးယူႇတီႈႁိမ်းႁွမ်း Tiananmen ၼႂ်းဝဵင်းလူင် Beijing ၸိုင်ႈမိူင်းၶႄႇ ဝႃႈၼႆ။

ၵဵဝ်ႇလူၺ်ႈလွင်ႈပၢင်ၵုမ် ဢၼ်ဢွၼ်ၵၼ်လၢမ်းၶၢတ်ႈဝႆႉဝႃႈ ၸွမ်ၸိုင်ႈ သျီႇၵျိၼ်းၽိင်ႇ တေလႆႈႁပ်ႉလွင်ႈယုၵ်ႉယွင်ႈၶိုၼ်ႈပဵၼ်ၸွမ်ၸိုင်ႈ ပွၵ်ႈၵမ်း 3 ၵႂႃႇထႅင်ႈၶၢဝ်းတၢင်း 5 ပီႊလႄႈ တေမီးလွင်ႈလႅၵ်ႈလၢႆႈ ၼႃႈတီႈပုၼ်ႈၽွၼ်း ၽူႈၸတ်းၵၢၼ်မၢင်ၵေႃႉ တွၼ်ႈတႃႇဝၢင်းၽႅၼ်ၸတ်းၵၢၼ် ၽၢႆႇၵၢၼ်ပၢႆးမၢၵ်ႇမီး၊ လွင်ႈတူင်ႇဝူင်းၵူၼ်း၊ ၵၢၼ်ၽွင်းတၢင် ဢိၵ်ႇတင်း လွင်ႈမၼ်ႈၼိမ်သဝ်းၵႂႃႇ ၼႂ်းၶၢဝ်းတၢင်း 5 ပီႊ ဝႃႈၼႆ။

သိုဝ်ႇၶၢဝ်ႇ Reuters လၢႆးငၢၼ်းဝႃႈ သျီႇၵျိၼ်းၽိင်ႇ လႆႈႁွမ်းဢဵၼ်ႁႅင်းဢႃႇၼႃႇဢၢမ်း ၼၢတ်ႈၼိမ်သဝ်းဝႆႉ တႄႇၸဵမ်မိူဝ်ႈလႆႈၶိုၼ်ႈႁပ်ႉတၼ်းႁဵင်း ပဵၼ်ၽူႈၼမ်းၼႂ်း ပႃႇတီႇၶွမ်ႇမိဝ်ႇၼိတ်ႉမိူင်းၶႄႇ မိူဝ်ႈပူၼ်ႉမႃး 10 ပီႊၼၼ်ႉ ဝႃႈၼႆ။

ပႅၵ်ႉသမ်ႉဝႃႈတေမီးပၼ်ႁႃတေႃႇ လွင်ႈသိုပ်ႇႁပ်ႉတၼ်းႁဵင်း ၽူႈဢွၼ်ႁူဝ်ၶႄႇ ၼႂ်း ပွၵ်ႈၵမ်း 3 မိူၼ်ၼင်ႇ ပၼ်ႁႃပၢႆးမၢၵ်ႇမီး၊ လွင်ႈၽႄႈလၢမ်းၸိူဝ်ႉမႅင်းတၢင်းပဵၼ် COVID-19 ႁူမ်ႈပႃး ပၼ်ႁႃလွင်ႈၶဵင်ႈၶႅင် မိူင်းဝၼ်းတူၵ်းလႄႈ ပိုၼ်ႉတီႈၵႅပ်ႈထႆႇဝၼ်ႇ ၵမ်ႈၽွင်ႈယူႇသေတႃႉ မၼ်းၵေႃႈယင်းတိုၵ်ႉတေလႆႈႁပ်ႉတၼ်းႁဵင်းၸွမ်ၸိုင်ႈ တွၼ်ႈတႃႇပူၵ်းပွင်ၸိုင်ႈမိူင်းၵႂႃႇထႅင်ႈလၢႆပီႊၵွၼ်ႇ ဝႃႈၼႆ။

ဝၢႆးသေသျီႇၵျိၼ်းၽိင်ႇ ၶိုၼ်ႈပဵၼ်ၸွမ်ၸိုင်ႈမိူင်းၶႄႇၼႆႉ တေလႆႈဝႃႈ ၶႄႇမီးၼႃႈမီး တႃၼႂ်းလုမ်ႈၾႃႉမႃး ၼႂ်းထႃႇၼၽူႈဢွၼ်ႁူဝ်လုမ်ႈၾႃႉ ဢၼ်တိုၵ်ႉပွင်သၢင်ႈ ၶိုၼ်ႈမႃး လႄႈ ပဵၼ်မိူင်းမႁႃႇဢၢမ်းၼၢတ်ႈမိူင်းၼိုင်ႈ ဝၢႆးသေပၢၼ်သိုၵ်းလုမ်ႈၾႃႉ ပွၵ်ႈၵမ်း 2 ယဝ်ႉတူဝ်ႈၵႂႃႇ ဢၼ်မီးမိူင်းမႁႃႇဢၢမ်းၼၢတ်ႈ မိူၼ်ႇၼင်ႇ ဢမေႇရိၵၢၼ်ႇ ပဵၼ်ၽူႈဢွၼ်ႁူဝ်ၼၼ်ႉ ဝႃႈၼႆ။

တႆးလွတ်ႈလႅဝ်း