ၶႄႇ−ရၢတ်ႉသျႃး ၽိုၵ်းၽွၼ်ႉသိုၵ်းႁူမ်ႈၵၼ်

တႃႇပႂ်ႉပႃးလွင်ႈမၼ်ႈၼိမ်သဝ်းၼႆလႄႈ တပ်ႉသိုၵ်းၶႄႇ တင်း တပ်ႉသိုၵ်းရၢတ်ႉသျႃး လႆႈၽိုၵ်းၽွၼ်းသိုၵ်းႁူမ်ႈၵၼ် တီႈႁိမ်းၼႃႈၼမ်ႉပၢင်ႇလၢႆႇ လႄႈ ၼႃႈၾႃႉ ဢၼ်ယူႇ ၸမ်ၵၼ်တင်း ဝဵင်း Zhanjiang ၸႄႈတွၼ်ႈ Guangdong မိူင်းၶႄႇပွတ်းၸၢၼ်း။

မိူဝ်ႈၼႆႉဝၼ်းထီႉ 13 July 2024 (လိူၼ်ပႅတ်ႇမႂ်ႇ 8 ၶမ်ႈ ပီႊတႆး 2118 ၼီႈ) သိုဝ်ႇၶၢဝ်ႇ VOA ဢွၵ်ႇဝႆႉ ၵဵဝ်ႇလူၺ်ႈလွင်ႈႁွင်ႈၵၢၼ်လူင်ၽၢႆႇၵႅတ်ႇၶႄ မိူင်းၶႄႇ လႆႈလၢတ်ႈဝႃႈ တပ်ႉသိုၵ်းၶႄႇ လႄႈ တပ်ႉသိုၵ်းရၢတ်ႉသျႃး လႆႈၽိုၵ်းၽွၼ်ႉသိုၵ်း ဢၼ်မီးၸိုဝ်ႈဝႃႈ Joint Sea-2024 တႄႇဢဝ်မိူဝ်ႈႁူဝ်လိူၼ် July 2024 သေ တေၽိုၵ်းၽွၼ်ႉတေႃႇထိုင် ၼႂ်းၵၢင်လိူၼ် July 2024 တႃႇၼႄတၢင်းၶတ်းၸႂ် လႄႈ ၼမ်ႉၵတ်ႉတပ်ႉသိုၵ်းတင်း သွင်ၽၢႆႇ ၼႂ်းၵၢၼ်ႁူမ်ႈမိုဝ်းၵၼ် တေႃႇသူႈႁႄႉၵင်ႈ လွင်ႈပူၼ်ႉပႅၼ်ၽၢႆႇလွင်ႈမၼ်ႈ ၼိမ်သဝ်းၼႂ်းပၢင်ႇလၢႆႇ ဢိၵ်ႇတင်း ပႂ်ႉပႃးလွင်ႈမၼ်ႈၼိမ်သဝ်း လႄႈ လွင်ႈၵတ်းယဵၼ် ၼႂ်းပွတ်းတွၼ်ႈၼႆႉ ၼႆယဝ်ႉ။

ၵၢၼ်ၽိုၵ်းၽွၼ်ႉသိုၵ်းၼႆႉၵေႃႈ သမ်ႉလႆႈမီးမႃးၼႂ်းဝူင်ႈလဵဝ်ၵၼ်တင်း ပၢင်ၵုမ်ၸုမ်း NATO ဢၼ်ၸတ်းႁဵတ်းတီႈမိူင်းဢမေႇရိၵၢၼ်ႇ တႃႇၵမ်ႉထႅမ်ယူႇၶရဵၼ်း ဢၼ်ထုၵ်ႇရၢတ်ႉသျႃးပူၼ်ႉပႅၼ်ၼၼ်ႉ ဝႃႈၼႆ။

မိူဝ်ႈၼႂ်းဝၼ်းထီႉ 10 July 2024 ၼၼ်ႉ ၽၢႆႇတၢင်းၸုမ်း NATO လႆႈသပ်းၸႅင်ႈၶၢဝ်ႇဝႃႈ ၶႄႇပဵၼ်ၽူႈၵမ်ႉထႅမ်ရၢတ်ႉသျႃး ဢၼ်ပူၼ်ႉပႅၼ်ယူႇၶရဵၼ်း လူၺ်ႈၽၢၼ်ႇၵၢၼ်ၵႃႉ ၶၢႆ ဢၼ်ပၼ်ၽွၼ်းလႆႈ ၽၢႆႇၵၢၼ်သိုၵ်းရၢတ်ႉသျႃးၼၼ်ႉ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉၵေႃႈ ၽၢႆႇတၢင်းၶႄႇ လႆႈဢွၵ်ႇမႃးပၢၵ်ႈပႅတ်ႈသေ ပၼ်ၾၢင်ႉၸုမ်း NATO ဝႃႈ ယင်းတိုၵ်ႉသူၼ်းၵဝ်းႁႂ်ႈမီးလွင်ႈၶဵင်ႈၶႅင်ၵၼ်သေ လၢတ်ႈထႅင်ႈဝႃႈ လိူဝ်သေၶႄႇ တေၽိုၵ်းၽွၼ်ႉသိုၵ်းၸွမ်းရၢတ်ႉသျႃးယဝ်ႉ ၶႄႇၵေႃႈယင်းလႆႈၽိုၵ်း ၽွၼ်ႉသိုၵ်းၸွမ်းပေႇလႃႇရုတ်ႉထႅင်ႈ မိူၼ်ၵၼ် ဝႃႈၼႆ။

ထႅင်ႈၽၢႆႇၼိုင်ႈတၢင်းၼိုင်ႈၵေႃႈ လွင်ႈၶႄႇ လႄႈ ရၢတ်ႉသျႃး ၽိုၵ်းၽွၼ်ႉသိုၵ်းႁူမ်ႈ ၵၼ်ပွၵ်ႈၵမ်းၼႆႉ မၼ်းၸမ်ၵၼ်တင်းလႅၼ်လိၼ်မိူင်းၵျႃႇပၢၼ်ႇသေ ႁဵတ်းႁႂ်ႈၽၢႆႇ တၢင်းၵျႃႇပၢၼ်ႇ မႆႈၸႂ်တေႃႇလွင်ႈမၼ်ႈၼိမ်သဝ်းၸိုင်ႈမိူင်း ၼႆယူႇယဝ်ႉ။

တႆးလွတ်ႈလႅဝ်း