ၶႆမၼ်းၼႂ်းလိူတ်ႈသုင် မီးၽေးၸိူင်ႉႁိုဝ် လႄႈ လွၵ်းလၢႆးယူတ်းယႃ

ၶႆမၼ်းၼႂ်းလိူတ်ႈသုင်ၼႆႉ မၼ်းပဵၼ်ငဝ်ႈႁၢၵ်ႈ ႁဵတ်းႁႂ်ႈပဵၼ်မႃးတၢင်းပဵၼ်လၢႆလၢႆမဵဝ်း မႃးလႆႈ ၵွပ်ႈၼၼ် ထုၵ်ႇလီယူတ်းယႃ မိူဝ်ႈပႆႇတူၵ်းလိုၼ်းၼၼ်ႉယူႇယဝ်ႉ။

မေႃယႃၶဝ်ပိုတ်ႇလၢတ်ႈၼႄဝႃႈ တၢင်းပဵၼ်ၶႆမၼ်းၼႂ်းလိူတ်ႈ မီးလွင်ႈၽိတ်းပိူင်ႈ ဢမ်ႇၼၼ် Dyslipidemia ၼႆႉ ပဵၼ်တၢင်းပဵၼ်မဵဝ်းၼိုင်ႈ ဢၼ်မီးယူႇၼႂ်းတၢင်းပဵၼ် NCDs ၵွပ်ႈၼၼ် ၽူႈၵေႃႉပဵၼ်ၼၼ်ႉ ၶႆမၼ်းၼႂ်းလိူတ်ႈတေမီးလွင်ႈၽိတ်းပိူင်ႈသေ ၵိူတ်ႇပဵၼ်လွင်ႈၸဵပ်းယဵၼ်းၼႂ်းလွတ်ႇလိူတ်ႈ၊ တေမီးၶႆမၼ်းၼႂ်းလိူတ်ႈၼမ်သေ သူင်ႇၽွၼ်းတုမ်ႉယွၼ်ႈတေႃႇၶူင်ႉသၢင်ႈႁူဝ်ၸႂ် မိူၼ်ၼင်ႇ− လွတ်ႇလိူတ်ႈႁူဝ်ၸႂ်ၵႅပ်ႈ၊ လွတ်ႇလိူတ်ႈဢွၵ်းဢေႃပိၵ်ႉတၼ် ၸိူဝ်းၼႆႉယဝ်ႉ။

ၶႆမၼ်းၼႂ်းလိူတ်ႈ ဢၼ်ထူပ်းႁၼ်လႆႈၼၼ်ႉ မီးယူႇ 2 မဵဝ်း

1. Cholesterol

ၽႄဢွၵ်ႇပဵၼ် 2 ဢၼ်-

• LDL (Low Density Lipoprotein) ၼႆႉ ပဵၼ်ၶႆမၼ်းမဵဝ်းဢၼ်ဢမ်ႇလီသေ ပေႃးၼႂ်းတူဝ်ၶိင်းမီးၼမ်ၵေႃႈ တေႁဵတ်းႁႂ်ႈသိုပ်ႇပဵၼ်တၢင်းပဵၼ်ၵႂႃႇ လႄႈ ၼိုင်ႈၶႅၼ်းတေႁၢႆႉႁႅင်းမႃး ၼၼ်ႉယဝ်ႉ။
• HDL (High Density Lipoprotein) ၼႆႉသမ်ႉ ပဵၼ်ၶႆမၼ်းဢၼ်လီသေ ၸွႆႈႁႄႉၵင်ႈပၼ် ၸဵပ်းယဵၼ်းလႄႈ လွင်ႈပိၵ်ႉတၼ်ၶွင်လွတ်ႇလိူတ်ႈ ၼႆယူႇ။

2. Triglycerides

လွင်ႈယူတ်းယႃၶႆမၼ်းၼႂ်းလိူတ်ႈသုင်ၼႆႉ မေႃယႃၶဝ်တေၸၢင်ႈမႄးပိၼ်ႇလႅၵ်ႈလၢႆႈ ၼႂ်းလွင်ႈၵိၼ်တၢင်းၵိၼ်တၢင်းယႅမ်ႉ ႁႂ်ႈလူတ်းယွမ်းလွင်ႈၵိၼ်ဢႃႇႁႃႇရမဵဝ်းမီးၶႆမၼ်း သုင်၊ လူတ်းလွင်ႈၵိၼ်ၶဝ်ႈပႅင်ႈလႄႈ  မဵဝ်းမီးထၢတ်ႈၵိူဝ်ဝၢၼ်ၼမ်သေ ယင်းတေမီး ၶေႃႈၼႄႉၼမ်း ႁႂ်ႈဢွၵ်ႇလဵၼ်ႈဢဵၼ်ႁႅင်း၊ မႄးပိၼ်ႇလႅၵ်ႈလၢႆး လွင်ႈႁဵတ်းသၢင်ႈ ၸွမ်းဝၼ်း ႁႂ်ႈတူဝ်ၶိင်းမီးလွင်ႈတူင်ႉၼိုင်ၼမ်ၶိုၼ်ႈ ၸိူဝ်းၼႆႉ တေၸွႆႈလူတ်းယွမ်း ၶႆမၼ်းၼႂ်းလိူတ်ႈ တွၼ်ႈတႃႇၽူႈၸိူဝ်းဢၼ်မီးၶႆမၼ်း ဢမ်ႇပေႃးသုင်ႁႅင်းပူၼ်ႉတီႈ ၼၼ်ႉယဝ်ႉ။

ၵူၺ်းၵႃႈ တွၼ်ႈတႃႇၸိူဝ်းမီးၶႆမၼ်းၼႂ်းလိူတ်ႈသုင်ႁႅင်းပူၼ်ႉတီႈၼၼ်ႉ တေၸၢင်ႈလႆႈၵိၼ်ယႃၵုမ်းထိင်းၶႆမၼ်းၼႂ်းလိူတ်ႈ လႄႈ တိုၼ်းတေလႆႈၸႂ်ႉဢီႈယႃ ၵုမ်းထိင်းတၢင်းပဵၼ်ၵႂႃႇတႃႇသေႇၵေႃႈပဵၼ်လႆႈ။ ယွၼ်ႉတၢင်းပဵၼ်ၸိူဝ်းၼႆႉ ပေႃးလႆႈပဵၼ်ယဝ်ႉၼႆ တၢင်းပဵၼ်တေၼႃႇၶိုၼ်ႈမႃးၵမ်းလွႆးလွႆးယူႇသေတႃႉၵေႃႈ တေဢမ်ႇပေႃးမီးၽၢင်းႁၢင်ႈၼႄဢွၵ်ႇမႃး။ ၵွပ်ႈၼၼ် မၼ်းၸင်ႇႁဵတ်းႁႂ်ႈမၢင်ၸိူဝ်း ဝူၼ်ႉၽိတ်းဝႃႈ ႁၢႆလီယဝ်ႉၼႆသေ ၵိုတ်းယိုတ်းလွင်ႈၵိၼ်ယႃႁင်းၵူၺ်းလႄႈ မၼ်းၸင်ႇႁဵတ်းႁႂ်ႈတၢင်းပဵၼ်ႁၢႆႉႁႅင်းလိူဝ်သေၵဝ်ႇယဝ်ႉ ဢမ်ႇၵႃး တေၸၢင်းၵိူတ်ႇပဵၼ် ၽၢင်ႁၢင်ႈတၢင်ႇၸိူဝ်းၶဝ်ႈမႃးၸွမ်းၽၢႆႇလင်ၵေႃႈပဵၼ်လႆႈ ၼၼ်ႉယဝ်ႉ။

လွၵ်းလၢႆးယူတ်းယႃၶႆမၼ်းၼႂ်းလိူတ်ႈသုင် လူၺ်ႈၸႂ်ႉတိုဝ်းဢီႈယႃ ၽႄဢွၵ်ႇပဵၼ် 2 ၶၵ်ႉ

• ၶၵ်ႉၵမ်းဢွၼ်တၢင်းၼႆႉ တေပဵၼ်လွင်ႈၸႂ်ႉတိုဝ်းယႃ တွၼ်ႈတႃႇႁႄႉၵင်ႈ ယႃႇႁႂ်ႈပဵၼ်တၢင်းပဵၼ်တၢင်ႇမဵဝ်းထႅင်ႈ။
• မိူဝ်ႈမီးတၢင်းပဵၼ်တၢင်းမဵဝ်းၶဝ်ႈမႃးယဝ်ႉၼၼ်ႉသမ်ႉ တေၸႂ်ႉတိုဝ်း ယႃႁႄႉၵင်ႈ ယႃႇပေႁႂ်ႈလႆႈၶိုၼ်းၵႂႃႇပဵၼ်ထႅမ်ႈၵမ်းၼိုင်ႈ ၼၼ်ႉယဝ်ႉ။

ဢီႈယႃဢၼ်ၸႂ်ႉတိုၼ်းၼႂ်းလွင်ႈယူတ်းယႃတၢင်းပဵၼ်ၶႆမၼ်းၼႂ်းလိူတ်ႈ မီးလွင်ႈ ၽိတ်းပိူင်ႈၼၼ်ႉ ပဵၼ်ယႃသႅၼ်း Statin ၊ ယွၼ်ႉမၼ်းတေၸွႆႈလူတ်းယွမ်းၶႆမၼ်း ဢၼ်ဢမ်ႇလီလႄႈ လူတ်း Triglycerides သေဢမ်ႇၵႃး ၶိုၼ်းၽိူမ်ႉထႅမ်ပၼ် ၶႆမၼ်းဢၼ်လီယဝ်ႉ မၼ်းယင်းၸွႆႈၸႅၵ်ႇယႅၵ်ႈလွင်ႈပဵၼ်လိူတ်ႈၶေႃႇတီႈလဵဝ်သေ တေႃႇသူႈလွင်ႈၸဵပ်းယဵၼ်း လႄႈ ၽိူမ်ႉ Antioxidants လႆႈၼၼ်ႉယဝ်ႉ။ ၵမ်ႈၼမ်ယဝ်ႉ ၼႄႉၼမ်းႁႂ်ႈၵိၼ်ပၼ်ၼိုင်ႈဝၼ်း 1 မဵတ်ႉ ဢွၼ်တၢင်းတေၶဝ်ႈၼွၼ်း ယွၼ်ႉပိူဝ်ႈလွင်ႈသၢင်ႈ Cholesterol တေႁဵတ်းဢွၵ်ႇၼမ် မိူဝ်ႈယၢမ်းၵၢင်ၶိုၼ်း၊ ထုၵ်ႇလီၵိၼ်ဢီႈယႃၸွမ်းၼင်ႇ မေႃယႃၶဝ်သင်ႇလၢတ်ႈၼၼ်ႉ လီတီႈသုတ်းယဝ်ႉ။

သင်ၸိူဝ်ႉဝႃႈ လိုမ်းၵိၼ်ယႃလူတ်းၶႆမၼ်း မိူဝ်ႈတေၶဝ်ႈၼွၼ်းၼၼ်ႉသေ ၶိုၼ်းၶုၵ်းၸႂ်လႆႈ မိူဝ်ႈတိုၼ်ႇမႃးယၢမ်းၵၢင်ၼႂ်ၼၼ်ႉၼႆၵေႃႈ ႁႂ်ႈၵိၼ်ယႃၸွမ်းဝၼ်းၼႆႉ ၵႂႃႇမိူၼ်ၵဝ်ႇၵူၺ်း တေဢမ်ႇလႆႈၵိၼ်ၽိူမ်ႉ ယွၼ်ႉလွင်ႈလူတ်းၶႆမၼ်းၼၼ်ႉ မၼ်းတေဢမ်ႇတုမ်ႉယွၼ်ႈၵႃႈႁိုဝ် ၵူၺ်းၵႃႈ သင်ၸိူဝ်ႉၵိၼ်ၼမ်ပူၼ်ႉတီႈၸိုင် တေႁဵတ်းႁႂ်ႈလႆႈႁပ်ႉၽွၼ်းတုမ်ႉယွၼ်ႈ တီႈဢီႈယႃၼမ်လိူဝ် ၼၼ်ႉယဝ်ႉ။

လွၵ်းလၢႆးလူတ်းယွမ်းၶႆမၼ်းၼႂ်းလိူတ်ႈ

1. ဢွၵ်ႇလဵၼ်ႈဢဵၼ်ႁႅင်းတႃႇသေႇ တီႈဢေႇသုတ်းၼိုင်ႈဝူင်ႈ 3 ဝၼ်း၊ ၼိုင်ႈဝၼ်း လႂ် မွၵ်ႈ 30 မိၼိတ်ႉ။
2. ၵိၼ်ဢီႈယႃလူတ်းယွမ်းၶႆမၼ်းလႄႈ ဢမ်ႇထုၵ်ႇလီၵိုတ်းယိုတ်းလွင်ႈၵိၼ်ယႃ ႁင်းၵူၺ်း။
3. ၵိၼ်ဢႃႇႁႃႇရ မဵဝ်းပဵၼ်ၽၵ်းယိူဝ်ႈၼၢင်းၶဵဝ်း၊ မၢၵ်ႇမႆႉမၢၵ်ႇတွၵ်ႇ လႄႈ တၢင်းၵိၼ်ယႅမ်ႉမဵဝ်းမီးၶႆမၼ်းတႅမ်ႇ။
4. ၵုမ်းထိင်းၼမ်ႉၼၵ်းတူဝ်။
5. တိုတ်းလွင်ႈလုတ်ႇလႅၼ်းယႃႈ၊ ယွၼ်ႉလွင်ႈလုတ်ႇလႅၼ်းယႃႈၼႆႉသေ မၼ်းတေႁဵတ်းႁႂ်ႈ လွင်ႈၸဵပ်းယဵၼ်းၶွင်တူဝ်ၶိင်းႁၢႆႉႁႅင်းၶိုၼ်ႈၼၼ်ႉယဝ်ႉ။

ပိၼ်ႇတႅမ်ႈ − ၸၢႆးဢႅၼ်

တႆးလွတ်ႈလႅဝ်း

ဢၢင်ႈဢိင် − https://www.sanook.com/health/32313/