ၸဝ်ႈသိုၵ်းလူင် ၸၢႆးၸၢမ်ႇ ၽူႈၵွၼ်းတပ်ႉၸုမ်း 198 ႁွတ်ႈၽႅဝ်ၶိုၼ်းတီႈမုၵ်ႉၸုမ်း RCSS/SSA ယဝ်ႉလႄႈ ယိၼ်းၸူမ်းယႂ်ႇၼမ်ထိုင်ပႃး ၵူၼ်းမိူင်းၵေႃႉၼိုင်ႈ

ၽွင်းၵူၼ်းပႂ်ႉယၢမ်းၶွၵ်ႈၶင် (သိုၵ်း SSPP) ၼင်ႈတေႃႇၽၢႆႉၵၼ်ယူႇၼၼ်ႉ ၸဝ်ႈသိုၵ်းလူင် ၸၢႆးၸၢမ်ႇ လႆႈဢဝ်တိုဝ်ႉတၢင်းလီၼႆႉသေ ဢွၼ်ဢဝ်လုၵ်ႈလၢင်းၼၢင်းမေး လၵ်ႉမူပ်ႇမူပ်ႇၵၢၼ်းၵၢၼ်း ၸွမ်းမႆႉၼၢမ်ၸွမ်းႁူဝ်ႉလဵၵ်း ၸွမ်းတပ်ႉလၢႆလၢႆထၢပ်ႈ လႄႈ ၶၢမ်ႈပူၼ်ႉလွတ်ႈဢွၵ်ႇမႃးလႆႈ ၼႂ်းတူင်ႇႁႅဝ်ႉလူင် ငဝ်ႈငုၼ်းဝၢၼ်ႈႁႆး ၼၼ်ႉယူႇယဝ်ႉ။

မိူဝ်ႈလဵဝ် ၸဝ်ႈသိုၵ်းလူင် ၸၢႆးၸၢမ်ႇ ၽူႈၵွၼ်းတပ်ႉၸုမ်း 198 ႁွတ်ႈထိုင်ဢွင်ႈတီႈလွတ်ႈၽေး လႄႈ ၼႂ်းမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ယဝ်ႉလီငၢမ်းသေ မၼ်းၸဝ်ႈလႆႈၶႆႈၼႄ လွင်ႈယၢပ်ႇၽိုတ်ႇၵိၼ်းၸႂ် ၽွင်းထုၵ်ႇၵုမ်းၶင် လႄႈ ၽွင်းလၵ်ႉပၢႆႈ ဢွၵ်ႇမႃးၼႂ်းတူင်ႇႁႅဝ်ႉလူင် ငဝ်ႈငုၼ်းဝၢၼ်ႈႁႆး ၼၼ်ႉယူႇ၊ ယူႇတီႈ တႆးလွတ်ႈလႅဝ်း ႁဝ်းၶႃႈတေဢဝ်လွင်ႈပိူင်ပဵၼ်တႄႉ မႃးပိုၼ်ၽႄႈပၼ် ႁႂ်ႈၵေႃႉသိုၵ်းၵေႃႉႁၢၼ် ၼႂ်းၼႃႈသိုၵ်း/ၼႂ်းၼႃႈတီႈ ဢိၵ်ႇတင်း ပေႃႈမႄႈၵူၼ်းမိူင်း ၸိူဝ်းမႆႈၸႂ်ၸွမ်းၼၼ်ႉ ပေႃးလႆႈႁပ်ႉႁူႉၵႂႃႇမိူၼ်ၵၼ် ယူႇယဝ်ႉ။

ၸဝ်ႈသိုၵ်းလူင် ၸၢႆးၸၢမ်ႇ ၽူႈၵွၼ်းတပ်ႉၸုမ်း 198 တပ်ႉသိုၵ်းၸိုင်ႈတႆး RCSS/SSA လၢတ်ႈၼႄဝႃႈ −

“ဢၼ်ၶဝ်ႁၢင်ႈတူင်ႇသေလႄႈ ပႂ်ႉယိုဝ်းၵႃးႁဝ်း ၺွပ်းလႆႈတူဝ်ႁဝ်းပေႃႈမႄႈလုၵ်ႈ၊ ၵမ်ႈၽွင်ႈၵေႃႈၺႃးမၢတ်ႇ မႄႈၶဝ်မၢတ်ႇၺႃးတီႈၵွၵ်းႁူဝ်မၼ်း ၊ လုၵ်ႈဢွၼ်ႇသမ်ႉၺႃး သီႇတီႈ တီႈၶႃမၼ်း ၵွၵ်းႁူဝ်မၼ်း တီႈပုမ်မၼ်းႁႄ (ၵေႃႉပဵၼ်လုၵ်ႈၸၢႆး တိူဝ်ႉၺႃးမၢၵ်ႇၵွင်ႈ 3 လုၵ်ႈ လႄႈ ၸၢၵ်ႇမၢၵ်ႇ 79)၊ လႆႈယႃတီႈႁူင်းယႃ ပၢင်ႇလေႃႉ ဝၢၼ်ႈႁႆး၊ ၶႅၼ်းမႃးယဝ်ႉၼႆၵေႃႈ ၶႃႈတႄႉမႃးယူႇဝႆႉတီႈတပ်ႉ ၸဝ်ႈသႅင်ဝ ၵႆႈၵုင်းၽၵ်းၵီးၼၼ်ႉ၊ ၶဝ်ၶႅၼ်းယဝ်ႉၵေႃႈလႆႈလိူၼ်ပၢႆ ၶိုၼ်းလႆႈမႃးယူႇၸွမ်းၶႃႈ တီႈၼၼ်ႉ၊ ယူႇဝႆႉႁဵတ်းၼၼ်ၵူၺ်းၶႃႈ ယူႇဝႆႉၵႆႈၵုင်းၽၵ်းၵီးသေ ဢဝ်ႁူမ်ႇလူမ်ႈ ထိင်းဝႆႉယူႇႁဵတ်းၼၼ်၊ မိူဝ်ႈၽွင်းယူတ်းယႃတူဝ်တီႈ ႁူင်းယႃၼၼ်ႉၵေႃႈ ၶဝ်ၵေႃႈလုမ်းလႃး ယူတ်းယႃပၼ်လီလီယူႇၵူၺ်းၼင်ႇၵဝ်ႇ ၵႆႈႁူင်းယႃၼၼ်ႉတႄႉ ၽိူဝ်ႇၶႅၼ်းယဝ်ႉ တႃႇတေယွၼ်းမႃးယူႇၸွမ်းၵၼ်ၼႆႉၵေႃႈ လႆႈယွၼ်းၶႂၢင်ႉ တီႈၼိုင်ႈယဝ်ႉတီႈၼိုင်ႈ ႁဵတ်းတႄႉႁဵတ်းဝႃႈၼင်ႇၵဝ်ႇဢိူဝ်ႈ ၶိုၼ်းမႃးယူႇ တီႈလဵဝ်ၵၼ်သေ ဢဝ်ၶင်ဝႆႉယူႇႁဵတ်းၼၼ် တိၵ်းတိၵ်းယဝ်ႉ။

ၶဝ်တီႉၺွပ်းၵႂႃႇဝႆႉသေ ၶႃႈႁဝ်းသမ်ႉပဵၼ်ဝႆႉၽူႈၵွၼ်းတပ်ႉၸုမ်း 198 ၼၼ်ႉၼႃႇၼႆ သမ်ႉႁႂ်ႈႁွင်ႉၵူၼ်းတၢင်းလင် ၼႂ်းတပ်ႉၵွင်/တပ်ႉၸုမ်း ၵူၼ်းဢၼ်မိုတ်ႈၵိုဝ်းၼႂ်း မုၵ်ႉၸုမ်း (RCSS/SSA) ၵႂႃႇၸွမ်း မၼ်းတေသႃႇၸဝ်ႈႁဝ်းၶဝ်ဝႃႈၼႆ၊ ပွင်ႇဝႃႈ ပေႃးဢမ်ႇႁွင်ႉၵႂႃႇၼႆႉ မၼ်းတေဢမ်ႇသႃႇ မၼ်းတေၼႃႇမႃး ပုင်ႇၸၢမ်ႇမၼ်း တေပဵၼ်ၸိူင်ႉၼၼ်။

မိူဝ်ႈၼၼ်ႉတႄႉၶဝ်ပၼ်ယိပ်းဝႆႉ ၾူင်းလုၵ်ႈၼိုင်ႈၼၼ်ႉၼႃႇၼႆ ၶႃႈႁမ်ႉဝႃႈ သမ်ႉဢမ်ႇႁူႉၸၵ်းမၢႆၾူင်းၽႂ် ၼႂ်းၾူင်းႁဝ်းၵေႃႈ ၶဝ်ႁမ်ႉသိမ်းၵႂႃႇမူတ်းသေ ဢမ်ႇတွင်းမၢႆၾူင်းၽႂ်ယဝ်ႉ ဢမ်ႇၸၢင်ႈႁွင်ႉၽႂ် ၊ယူႇၶၢဝ်းယၢမ်းတႃႇလိူၼ်ၼိုင်ႈ လိူၼ်ပၢႆယူဝ်ႉ ၶဝ်ၶိုၼ်းမႃးသိမ်းၾူင်းၵႂႃႇၶိုၼ်း၊ ပွင်ႇဝႃႈပၢႆးဢဝ်တၢင်းလင် ပေႃးဝႃႈ တၢင်းလင်ဢမ်ႇၵႂႃႇၵေႃႈ မၼ်းတေၼႃႇၵႂႃႇၼႃႇၵႂႃႇတိၵ်းတိၵ်းယဝ်ႉ ႁဝ်းၶႃႈၵေႃႈဝူၼ်ႉ တေႁဵတ်းႁိုဝ်ဢွၵ်ႇႁႂ်ႈပေႃးဢွၵ်ႇပူၼ်ႉ လႆႈၵျၢမ်ႇၺၢၼ်ႇတိၵ်းတိၵ်း ၼၼ်ႉၼႃႇၼႆ ၊ တႃႇတေလွတ်ႈဢွၵ်ႇမႃးၶိုၼ်းၼႆႉၵေႃႈ ႁဵတ်းႁႂ်ႈၶဝ်ၵူၼ်းႁူမ်ႇလူမ်ႈႁဝ်းဝႆႉၸိူဝ်းၼၼ်ႉ ႁႂ်ႈၶဝ်ယုမ်ႇယမ်ဝႆႉၼၼ်ႉၼႃႇၼႆ ဢွၼ်ၵၼ်ႁဵတ်းသူၼ်ၽၵ်း မၢၵ်ႇၽိတ်ႉ၊ မၢၵ်ႇၶိူဝ် ၽၵ်းပၵ်ႉ၊ ၽၵ်းၼွႆး၊ မၢၵ်ႇၼမ်ႉတဝ်ႈ ဢွၼ်ၵၼ်ၸွၼ်ႉၽုၵ်ႇ ၶဝ်မႄႈလုၵ်ႈၼႆႉ ဢွၼ်ၵၼ်ႁဵတ်း ၽုၵ်ႇၵႆႈၼၼ်ႉ ၶဝ်ၵေႃႈတေဝႆႉဝႃႈ ႁဝ်းဢမ်ႇၸၢင်ႈၵႂႃႇတၢင်းလႂ် ၼၼ်ႉၼႃႇၼႆ ၶဝ်ၵေႃႈၵုမ်ႇတေႃႇၽၢႆႉၵၼ်ႁဵတ်းၼၼ်။

ႁဝ်းၶႃႈၵေႃႈလၵ်ႉၵၢၼ်းဢွၵ်ႇမႃး ၶဝ်တႂ်ႈၾႆးဝႆႉၼင်ႇၵဝ်ႇဢိူဝ်ႈ လၵ်ႉၵၢၼ်းမႃး ၸွမ်းငဝ်းၾႆး ၶၢဝ်းယၢမ်း 7 မူင်းၶိူင်ႈ (ႁူဝ်ၶမ်ႈ) ၸိူဝ်းၼႆႉၵႃႈ ႁဝ်းၶႃႈဢွၵ်ႇမႃးတႄႉ ၶႅပ်းတိၼ်ၵေႃႈဢမ်ႇလႆႈတိုဝ်း ပႆတိၼ်လၢႆတၢင်းၶိုၼ်း လတ်းမႃးႁႂ်ႈပေႃးပွင်ႇတၢင်းၵႃး ၶိုၼ်ႈမိူင်းသူႈ လၢမ်းဢဝ်ၼၼ်ႉဢႃႈ တပ်ႉတၢင်းၼွၵ်ႈတႄႉ မၼ်းမီးလၢႆတပ်ႉဝႆႉ မႃးမူၼ်ႉႁူဝ်ႉလဵၵ်းတီႈၼိုင်ႈယဝ်ႉတီႈၼိုင်ႈ 5−6 တီႈယူဝ်ႉ ဢၼ်ႁူဝ်ႉလဵၵ်းၼႆႉၼႃ ၶဝ်ၵေႃႈပႂ်ႉၵူၺ်းၶဝ်ဢမ်ႇႁၼ်ႁဝ်း မၢင်တီႈလတ်းၶိုၼ်းၵၢၼ်းမႃးၼႂ်းၵႄႈၶဝ် ၼၢမ်ၼႆႉတႄႉထူၼ်ႈယဝ်ႉ ၽႃႇတိၼ်ႁဝ်းပေႃးလွၵ်ႈပေႃးလႅင်မူတ်း ၵူႈၵေႃႉၼင်ႇ ၵဝ်ႇဢိူဝ်ႈတၢင်းလုၵ်ႈဢွၼ်ႇသေ ၶိုၼ်းမႃးပွင်ႇတၢင်းၵႃးၶိုၼ်ႈမိူင်းသူႈ၊ လတ်းတိၵ်းတိၵ်းဢိူဝ်ႈ တၢင်းၶိုၼ်းတၢင်းဝၼ်း တၢင်းၶိုၼ်းၵေႃႈဢမ်ႇလႆႈၼွၼ်း သမ်ႉထႅင်ႈတၢင်းဝၼ်း ၵႂႃႇၸွမ်းယုမ်းတိၵ်းတိၵ်း ဢမ်ႇပၼ်ၵူၼ်းႁၼ်သေၵေႃႉ၊ တေႃႇထိုင်ပေႃးမႃးႁိမ်လႆႈ မႃးဢႃးၵူဝ်းလႆႈ ၾူင်းၸဝ်ႈထေႃႈ ၵူၼ်းတေယူႇတၢင်း သၢႆမိူင်းၼွင်ၼႆႉ ၸဝ်ႈထေႃႈပိူၼ်ႈၵႂႃႇႁဵတ်းၵၢၼ် ယွၼ်းၾူင်းသေၵပ်း၊ ၵပ်းလႆႈၵူၼ်းႁဝ်းသေ ၵေႃႈၸႂ်လီဢိတ်းၼႃႇၼႆ ၶဝ်ၵေႃႈဢဝ်ၵႃး ၵႂႃႇႁပ်ႉတၢင်းပုၼ်ႉ၊ တၢင်းၽၢႆႇတႂ်ႈမိူင်းၼွင်ၸိူဝ်းၼၼ်ႉ  ၵပ်းလႆႈၵူၼ်းႁဝ်းၵေႃႈ ၵူၼ်းႁဝ်းပႂ်ႉႁပ်ႉ ၵူႈတီႈၼၼ်ႉၼႃႇၼႆ ႁဝ်းၵေႃႈထူၺ်ႈၸႂ်လူမ်မႃးဢိတ်းၼိုင်ႈ။

ပေႃးတူၺ်းၸိူင်ႉၼၼ် ပေႃးႁဝ်းဢမ်ႇႁဵတ်းၺၢၼ်ႇသေၸဵၼ်းၸႃးသေ လၵ်ႉၶၢမ်ႇယၢပ်ႇဢွၵ်ႇမႃးၵေႃႈ တေၵိၼ်းၵႂႃႇတိၵ်းတိၵ်းယဝ်ႉ တူၺ်းလၢႆးၶဝ်၊ ပေႃးဢဝ်ပၵ်းပိူင်ၵူၼ်းယွမ်းသိုၵ်းတႄႉ ႁဝ်းၶႃႈၵေႃႈၺွပ်းလႆႈၵူၼ်းၶဝ်ယူႇ ထၢမ်ၵၢင်ၸႂ်သေ ပၵ်းပိူင်ႁဝ်းမီးၸိူင်ႉႁိုဝ်ၵေႃႈ ႁဝ်းၶႃႈၵေႃႈပွႆႇပၼ်သေ၊ ၼႆႉလၢႆးၶဝ် ႁဝ်းတူၺ်းတူၺ်းမၼ်းဢမ်ႇၸႂ်ႈယဝ်ႉ မၼ်းတေဢမ်ႇၸွမ်းပိူင်ၸွမ်းပၢင်သင်ယဝ်ႉ လၢႆးၶဝ်ၶႂ်ႈႁဵတ်းၸိူင်ႉၼၼ်၊ ႁဝ်းပေႃႈမႄႈလုၵ်ႈၵေႃႈ သွပ်ႉသႅပ်ႉၵၼ် ၸူဝ်းၵၼ်ႁေၵေႃႈ ၶႂ်ႈယဝ်ႉၶၢမ်ႇယၢပ်ႇဢဝ်လႃႈ ႁဵတ်းၼႆသေ ပၢႆႈဢွၵ်ႇမႃး။

မိူဝ်ႈလဵဝ်တႄႉၵေႃႈမႃးႁွတ်ႈၽႅဝ် တီႈၵတ်းတီႈယဵၼ် တီႈၵူၼ်းႁဝ်းၶႃႈၵေႃႈ ၼႂ်းတပ်ႉဝႃႇ  သိုၵ်းႁၢၼ် ၽူႈမီးၸၼ်ႉတၢင်းသဵင်ႈၵေႃႈ ႁူမ်ၸူမ်းၸွမ်းႁဝ်းၶႃႈ ဢၼ်လႆႈလွတ်ႈဢွၵ်ႇမႃး တီႈလိူတ်ႇတီႈမႆႈၼၼ်ႉၼႃႇ၊ ၽိူဝ်ႇဝႃႈထိုင် ၼႂ်းမုၵ်ႉၸုမ်းႁဝ်းၵေႃႈ ၸႂ်ႁဝ်းၶႃႈၵေႃႈၶိုၼ်းမိူၼ်ၵဝ်ႇၼၼ်ႉၼႃႇၼႆ မၼ်းဢမ်ႇမီး ၼႂ်းဢူမ်ႈမိုဝ်းပိူၼ်ႈယဝ်ႉ တႃႇၵၢၼ်ၸိူဝ်ႉၸၢတ်ႈႁဝ်းၶႃႈၵေႃႈ တိုၼ်းဢမ်ႇၽႃႈဝၢင်း တိုၼ်းတေႁဵတ်းၵႂႃႇၸွမ်း သဵၼ်ႈတၢင်းဢၼ် ပေႃႇလသီႇ ႁဝ်းၶႃႈမီးဝႆႉၼၼ်ႉ။

ၼႂ်းမုၵ်ႉၸုမ်း ပႃႇတီႇမႂ်ႇသုင်ဝၢၼ်ႈႁႆးၼႆႉ ႁဝ်းၶႃႈဢမ်ႇယုမ်ႇမၼ်း တႄႉတႄႉၼၼ်ႉၼႃႇၼႆ ပၵ်းပိူင်ၶဝ်ၸိူင်ႉၼၼ်ၼႆႉ ႁဵတ်းတီႈႁဝ်းၼႆႉ ၶၢဝ်းတၢင်း 4 လိူၼ် ၸမ် 5 လိူၼ်၊ ၸိူင်ႉႁိုဝ်ၵေႃႈလီတႅပ်းတတ်းသေ ပေႃးဢမ်ႇဢၢၼ်း ဢဝ်ၵၼ်တၢႆၵေႃႈ ၼႆႉသမ်ႉဢဝ်ႁဵတ်းၼၼ်ၵႂႃႇတိၵ်းတိၵ်း သႂ်ႇသႂ်ႇမႃး ၵမ်းလိုၼ်းမႃး ၶႂ်ႈၵိၼ်းမႃးၵိၼ်းမႃးၼၼ်ႉၼႃႇ၊ ပေႃးၺႃးၶဝ်ၺွပ်းၵႂႃႇၼႆႉ မၼ်းတေဢမ်ႇပေႃးသႃႇ ၼၼ်ႉယဝ်ႉ ပေႃးလၢတ်ႈသိုဝ်ႈသိုဝ်ႈမၼ်းတႄႉ ၸဵမ်ၵူၼ်းမိူင်းၵူၼ်းသိုၵ်း လႆႈၾၢင်ႉ တႄႉတႄႉၼၼ်ႉၼႃႇ ၊ ၸဵမ်ၵူၼ်းသိုၵ်းၵူၼ်းမိူင်း ဢၼ်ၶဝ်ထၢင်ႇထိူမ်ဝႃႈ ၵပ်းသိုပ်ႇ ၶူဝ်းလၢႆး ၼႆႉႁဝ်းၶႃႈသမ်ႉ ပဵၼ်တူဝ်မၼ်း ၼၼ်ႉၼႃႇၼႆ ပေႃးပႆႇပူၼ်ႉလွတ်ႈ ဢွၵ်ႇမႃးႁႄတႄႉ  လႆႈၼၵ်းၸႂ်ဝူၼ်ႉယၢပ်ႇ မိူၼ်ၸိူင်ႉၼႂ်းထမ်ႈ ၼၼ်ႉယဝ်ႉ၊ တႄႇဢဝ်ၼႆႉၵႃႇတႄႉၵေႃႈ ၵႃႈတေလႆႈၾၢင်ႉပၼ် ၸဵမ်ၵူၼ်းမိူင်း ၵူၼ်းသိုၵ်းႁဝ်း ယႂ်ႇယႂ်ႇၼမ်ၼမ်ယူႇ၊ ပေႃးလၢႆးပၵ်းပိူင်ၶဝ် မွၵ်ႈၵႃႈၼၼ်ႉၵူၺ်းတႄႉ ႁဝ်းၵေႃႈပေႃး လၢမ်းႁူႉယဝ်ႉၼၼ်ႉၼႃႇၼႆ ပၵ်းပိူင်ၸိူင်ႉၼၼ်၊ ပၵ်းပိူင်ၼႆႉ ပဵၼ်ပၵ်းပိူင် ၶွမ်ႇမိဝ်ႇၼိတ်ႉလူင် မဵဝ်းၼၼ်ႉဢႃႈ မၼ်းလီၵူဝ်ႁေဢိူဝ်ႈပၵ်းပိူင်မဵဝ်းၼၼ်။

ပူၼ်ႉဢွၵ်ႇမႃးသေ ၸင်ႇလၢတ်ႈတႄႉဢမ်ႇၸႂ်ႈၼင်ႇၵဝ်ႇ မၼ်းတိုၼ်းပဵၼ် ဢၼ်တႄႉမၼ်းၵမ်းလဵဝ်ၼၼ်ႉၼႃႇၼႃ ပၵ်းပိူင်ၶဝ်ၼႆႉ၊ တီႈတႄႉတႄႉႁဝ်းၶႃႈ ပဵၼ်တႆးၼင်ႇၵၼ် ဢဝ်ၵႂႃႇမွၵ်ႈၵႃႈၼၼ်ႉၼႆႉ ထုၵ်ႇႁဵတ်းႁိုဝ်ၵေႃႈၼေႃႈ ႁႂ်ႈပေႃးပၼ်ၸႂ်ဢုၼ်ႇၸႂ်လီၵၼ် တေတႅပ်းတတ်းၸိူင်ႉႁိုဝ်ၵေႃႈ၊ ၼႆႉပေႃးဢမ်ႇႁွင်ႉ ၵူၼ်းတၢင်းလင်ၵႂႃႇ ဢၢပ်ႈတေဢဝ်တၢႆ ပေႃးတူၺ်းၶဝ်ၶႂ်ႈႁဵတ်းၼၼ်” လၢတ်ႈၼႄၼင်ႇၼႆ။

မိူဝ်ႈဝၼ်းထီႉ 7−8−9 Feburary 2022 ၶၢဝ်းတၢင်း 3 ဝၼ်းၼၼ်ႉ ၸုမ်းသိုၵ်း SSPP ဢၼ်ဢွၼ် သိုၵ်းဝ လႅၵ်ႈသႂ်ႇသိူဝ်ႈၶူဝ်း SSPP သေ ဢဝ်ႁႅင်းသိုၵ်းတၢင်းၼမ်တၢင်းလၢႆ ဝႅတ်ႉႁူဝ်ဝႅတ်ႉႁၢင်သေလေႃႇတိုၵ်း တပ်ႉၸုမ်း 198 ဢၼ်ယူႇၽၢႆႇတႂ်ႈၵုမ်းၵမ် RCSS/SSA ႁၢဝ်ႈႁၢဝ်ႈႁႅင်းႁႅင်း တီႈၼႂ်းဢိူင်ႇၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇ။

ၸဝ်ႈသိုၵ်းလူင် ၸၢႆးၸၢမ်ႇ လႄႈ လုၵ်ႈတပ်ႉၵမ်ႈၽွင်ႈ (ၵူၼ်းမၢတ်ႇၵေႃႈမီးၼမ်) ၶမ်ဝႆႉၼႂ်းပၢင်တိုၵ်းသေ လႆႈၸမ်ပဵၼ်ယွမ်းဝၢင်းၶိူင်ႈပၼ် SSPP လႄႈ ယွၼ်ႉဝႃႈ ၽူႈႁတ်းႁၢၼ်ၼႂ်း တပ်ႉသိုၵ်းၸိုင်ႈတႆး RCSS/SSA တိုၼ်းတေလႆႈသိုပ်ႇမီးသၢႆၸႂ် လႄႈ ႁွမ်ႁႅင်းဝႆႉတႃႇဢဝ်ၽႅၼ်ႇလိၼ်ၸိုင်ႈတႆး ပူတ်းပွႆႇတႂ်ႈမိုဝ်းၽူႈၶဵၼ် ၼႆယူႇယဝ်ႉ။

မိူဝ်ႈလဵဝ် ၸဝ်ႈသိုၵ်းလူင် ၸၢႆးၸၢမ်ႇ လႄႈ လုၵ်ႈလၢင်းၼၢင်းမေး လႆႈႁွတ်ႈထိုင်တီႈ မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး လီငၢမ်းယဝ်ႉသေ ၵေႃႉသိုၵ်း ၵေႃႉႁၢၼ် ၼႂ်းတပ်ႉၵွင်/တပ်ႉၸုမ်း၊ သၢႆသိုၵ်း ဢိၵ်ႇပႃး ၽူႈယႂ်ႇၵူၼ်းလူင် ၼႂ်း RCSS/SSA ၵေႃႈ ပဵၼ်ဢၼ်ယိၼ်းႁူမ်ၸူမ်းတႄႉတႄႉဝႃႈဝႃႈ လႄႈ ထႅင်ႈလွင်ႈၼိုင်ႈၵေႃႈ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၵူၼ်းမိူင်းၵေႃႉၼိုင်ႈ (ၸဝ်ႈထေႃႈ) တႄႉတႄႉဝႃႈဝႃႈ တီႈပၼ်ၸဝ်ႈသိုၵ်းၸၢမ်ႇ ယိမ်ၾူင်းသေ ၵပ်းသိုပ်ႇၸူးၵူၼ်းသိုၵ်း RCSS/SSA ယူႇၼႆယဝ်ႉ။

တႆးလွတ်ႈလႅဝ်း