ၸဝ်ႈၼႃႈတီႈထႆး တီႉၺွပ်းလႆႈၵူၼ်းမိူင်းႁူမ်ႈတုမ်လၵ်ႉၶဝ်ႈမိူင်းထႅင်ႈတင်းၼမ်

ၵူၼ်းမိူင်းႁူမ်ႈတုမ် လၵ်ႉလွမ်ၶဝ်ႈမိူင်းထႆး ဢမ်ႇထၢတ်ႈဢမ်ႇဝၢႆးသေ ထုၵ်ႇၸဝ်ႈၼႃႈ တီႈထႆး တီႉၺွပ်းလႆႈထႅင်ႈတင်းၼမ်။

မိူဝ်ႈဝႃးဝၼ်းထီႉ 30 June 2024 (လိူၼ်ၸဵတ်းလွင်ႈ 9 ၶမ်ႈ ပီႊတႆး 2118 ၼီႈ) ၸဝ်ႈၼႃႈ တီႈသိုၵ်းထႆး ဢၼ်ဢွၵ်ႇလဵပ်ႈယၢမ်းၼႂ်းပိုၼ်ႉတီႈ ဝၢၼ်ႈမႄႈၻၢဝ်း ပွၵ်ႉ 1 ဢိူင်ႇထႃႉ သၢႆလူတ်ႉ ၸႄႈဝဵင်းမႄႈသွတ်ႇ ၸႄႈတွၼ်ႈတၢၵ်ႇ ဢၼ်ပဵၼ်လႅၼ်လိၼ် ထႆး−မျႃႉဝ တီႇၼၼ်ႉသေ ထူပ်းႁၼ်ၵူၼ်းမိူင်းႁူမ်ႈတုမ် 8 ၵေႃႉ၊ ပဵၼ်ၸၢႆး 6 ၵေႃႉ၊ ယိင်း 2 ၵေႃႉ ၼႂ်းၼၼ်ႉ ပဵၼ်ၵူၼ်းမိူင်းႁူမ်ႈတုမ် လၵ်ႉလွမ်ၶဝ်ႈမိူင်းထႆး လူၺ်ႈၽိတ်းမၢႆမီႈ 7 ၵေႃႉ ထႅင်ႈၵေႃႉၼိုင်ႈသမ်ႉပဵၼ်ၵူၼ်းတေႃႉသူင်ႇ ၼႆယဝ်ႉ။

ၼွၵ်ႈလိူဝ်သေၼႆႉ မိူဝ်ႈၼႂ်းဝၼ်းထီႉ 27 June 2024 ၼၼ်ႉ ၽၢႆႇတၢင်းၸဝ်ႈၼႃႈတီႈ ထႆး လႆႈၵႂႃႇၵူတ်ႇထတ်းၸွမ်းႁိမ်းႁွမ်းၼႂ်းထိူၼ်ႇ ဢၼ်ယူႇတီႈၸပ်းၸွမ်း ၽၢႆလူင် ဝၶျိရႃးလူင်းၵွၼ်း ဝၢၼ်ႈထႃႉလိၼ်လႅင် ပွၵ်ႉ 1 ဢိူင်ႇပရင်းၽေ ၸႄႈဝဵင်းသင်ႇၶလႃႉပူးရီးၼၼ်ႉသေ ၵူတ်ႇထတ်းတီႉၺွပ်းလႆႈ ၵူၼ်းလၵ်ႉလွမ်ၶဝ်ႈမိူင်း လူၺ်ႈၽိတ်းမၢႆမီႈ တင်းမူတ်း 25 ၵေႃႉ၊ ပဵၼ်ၸၢႆး 10 ၵေႃႉ၊ ယိင်း 15 ၵေႃႉ မိူၼ်ၵၼ် ဝႃႈၼႆ။

ၵူၼ်းမိူင်းႁူမ်ႈတုမ် ၸိူဝ်းလၵ်ႉလွမ်ၶဝ်ႈမိူင်းထႆး လူၺ်ႈၽိတ်းမၢႆမီႈသေ ထုၵ်ႇတီႉ ၺွပ်းလႆႈၸိူဝ်းၼၼ်ႉ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် တေႁဵတ်းသၢင်ႈပၼ် တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးယဝ်ႉလႄႈ ၶိုၼ်းတေသူင်ႇပွၵ်ႈ မိူဝ်းၶိုၼ်းၼႂ်းမိူင်းႁူမ်ႈတုမ် ၼႆယဝ်ႉ။

တႆးလွတ်ႈလႅဝ်း