ၸဝ်ႈၼႃႈတီႈထႆး တီႉၺွပ်းလႆႈၵူၼ်းမိူင်းႁူမ်ႈတုမ် လၵ်ႉၶဝ်ႈမိူင်းတင်းၼမ်

ၵူၼ်းမိူင်းႁူမ်ႈတုမ် ဢၢၼ်းၸႂ်ႉမိူင်းထႆး ပဵၼ်သဵၼ်ႈတၢင်းလတ်းၽၢၼ်ႇ တႃႇၵႂႃႇႁဵတ်း ၵၢၼ်ၼႂ်းမိူင်းမလေးသျႃးၼၼ်ႉ ထုၵ်ႇတီႉၺွပ်းတင်းၼမ်။

မိူဝ်ႈဝၼ်းထီႉ 4 July 2024 (လိူၼ်ၸဵတ်းလွင်ႈ 13 ၶမ်ႈ ပီႊတႆး 2118 ၼီႈ) ၼၼ်ႉ ပလိၵ်ႈ ထႆး ႁူမ်ႈတင်း ၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ တီႉၺွပ်းလႆႈ ၵူၼ်းမိူင်းႁူမ်ႈတုမ် လၵ်ႉလွမ်ၶဝ်ႈမိူင်း လူၺ်ႈၽိတ်းမၢႆမီႈ တီႈၼိူဝ်သဵၼ်ႈတၢင်းဢေးသျႃး ဢိူင်ႇၵမ်း ၽႅင်းၽဵတ်း ၸႄႈဝဵင်းရတ်ႉတၽုမ်း ၸႄႈတွၼ်ႈသူင်ၶလႃ ၼၼ်ႉတင်းမူတ်း 13 ၵေႃႉ၊ ပဵၼ်ၸၢႆး 9 ၵေႃႉ၊ ယိင်း 4 ၵေႃႉ ၼႂ်းၼၼ်ႉ ပဵၼ်လုၵ်ႈဢွၼ်ႇ 2 ၵေႃႉ ႁူမ်ႈပႃးၵူၼ်း တေႃႉသူင်ႇထႅင်ႈ 1 ၵေႃႉ ၼႆယဝ်ႉ။

ၵူၼ်းမိူင်းႁူမ်ႈတုမ် ဢၼ်လၵ်ႉၶဝ်ႈမိူင်းသေ ထုၵ်ႇတီႉၺွပ်းလႆႈပွၵ်ႈၵမ်းၼႆႉ လႆႈသဵင်ႈ ၵႃႈၵႃးတင်းမူတ်း 45 သႅၼ်ပျႃး ဢမ်ႇၼၼ်မွၵ်ႈ 40,000 ဝၢတ်ႇသေ ၸၢႆႇပၼ်တီႈၼၢႆး ၼႃႈယဝ်ႉၶိုင်ႈၼိုင်ႈ ဢၼ်လိူဝ်ၼၼ်ႉ တေပႂ်ႉၸၢႆႇမိူဝ်ႈထိုင်တီႈၼႂ်းမိူင်းမလေးသျႃး လႄႈ ဢၼ်ပဵၼ်ၸဝ်ႈၵႃး ၵူၼ်းတေႃႉသူင်ႇၼၼ်ႉသမ်ႉ လႆႈငိုၼ်းၵႃႈၸၢင်ႈ 10,000 ဝၢတ်ႇသေ လႆႈႁပ်ႉငိုၼ်းဝႆႉလူင်ႈၼႃႈပဵၼ် 4,500 ဝၢတ်ႇ ဝႃႈၼႆ။

ၼွၵ်ႈလိူဝ်သေၼႆႉ မိူဝ်ႈၼႂ်းဝၼ်းထီႉ 4 July 2024 ၵူၺ်းၼင်ႇၵဝ်ႇ ၽၢႆႇတၢင်းပလိၵ်ႈ ထႆး လူင်းၵူတ်ႇထတ်းၼႂ်းပိုၼ်ႉတီႈ ဢိူင်ႇၵေႃႇၽႃႉငၼ်း ၸႄႈဝဵင်းၵေႃႇၽႃႉငၼ်း ၸႄႈတွၼ်ႈသူႇရၢတ်ႉထႃးၼီး ၼၼ်ႉသေ တီႉၺွပ်းလႆႈၵူၼ်းမိူင်းႁူမ်ႈတုမ် ဢၼ်ႁဵတ်းၵၢၼ် မဵဝ်းဢၼ်လူင်ပွင်ၸိုင်ႈထႆး သင်ႇႁၢမ်ႈဢမ်ႇပၼ် ၵူၼ်းတၢင်ႇၸိုင်ႈမိူင်းႁဵတ်းၼၼ်ႉတင်းမူတ်း 5 ၵေႃႉ၊ ယင်းတီႉၺွပ်းပႃးၵူၼ်းထႆးထႅင်ႈ 1 ၵေႃႉ လူၺ်ႈလွင်ႈတၢင်း ပဵၼ်ၼၢႆးၸၢင်ႈ (ပေႃႈလဵင်ႉမႄႈလဵင်ႉ) ဢၼ်ပၼ်ႁႅင်းၵၢၼ် ႁဵတ်းၵၢၼ်ပူၼ်ႉလိူဝ်သေ ဢၼ်မီးသုၼ်ႇလႆႈႁဵတ်းယဝ်ႉဢမ်ႇၵႃး တီႉၺွပ်းလႆႈပႃး ထႅင်ႈၵူၼ်းမိူင်းႁူမ်ႈတုမ် လၵ်ႉၶဝ်ႈမိူင်းလူၺ်ႈၽိတ်းမၢႆမီႈ 1 ၵေႃႉ ၼႆယဝ်ႉ။

ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ဢၼ်ႁဵတ်းၵၢၼ်မဵဝ်းဢၼ်လူင်ပွင်ၸိုင်ႈထႆး သင်ႇႁၢမ်ႈဢမ်ႇပၼ်ႁဵတ်းသေ ထုၵ်ႇတီႉၺွပ်းၼၼ်ႉ ၸိူဝ်းၶဝ်ႁဵတ်းၵၢၼ် ပိုတ်ႇလၢၼ်ႉၶဝ်ႈၽၵ်း၊ လၢၼ်ႉၼမ်ႉၼဵင်ႈ၊ လၢၼ်ႉၶၢႆၶူဝ်းယွႆႈ၊ ႁေႃႈလူတ်ႉလႄႇၶၢႆၶူဝ်း လႄႈ လၢၼ်ႉၶၢႆပူႉ ၸိူဝ်းၼႆႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၽၢႆႇတၢင်းၸဝ်ႈၼႃႈတီႈၽူႈမီးပုၼ်ႈၽွၼ်းထႆးၶဝ် တေႁဵတ်း သၢင်ႈပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ၼႆယဝ်ႉ။

တႆးလွတ်ႈလႅဝ်း