ၸဝ်ႈၼႃႈတီႈထႆး ၵူတ်ႇထတ်းတီႉၺွပ်းလႆႈယႃႈမဝ်းၵမ်း လႄႈ ၵူၼ်းတေႃႉသူင်ႇ

ၸဝ်ႈၼႃႈတီႈထႆး ဢွၵ်ႇၵူတ်ႇထတ်းၸွမ်း ၵၢၼ်တေႃႉသူင်ႇယႃႈမဝ်းၵမ် ၸွမ်းလႅၼ် လိၼ်မႄႈသၢႆသေ တီႉၺွပ်းလႆႈတင်းၵူၼ်းတင်းယႃႈမဝ်းၵမ် ၼႆယဝ်ႉ။

မိူဝ်ႈဝၼ်းထီႉ 30 July 2024 (လိူၼ်ပႅတ်ႇလွင်ႈ 10 ၶမ်ႈ ပီႊတႆး 2118 ၼီႈ) ၼၼ်ႉ ယူႇတီႈပလိၵ်ႈထႆး လႄႈ သိုၵ်းထႆး ႁူမ်ႈပႃးၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ ႁူမ်ႈၵၼ်ၵူတ်ႇထတ်းတီႉၺွပ်းလႆႈ ယႃႈမ 6,000,000 မဵတ်ႉ လႄႈ ၵူၼ်းတေႃႉသူင်ႇ 2 ၵေႃႉ၊ လူတ်ႉၶိူင်ႈ 1 လမ်း၊ ၵႃး 1 လမ်း တီႈႁိမ်းဝၢၼ်ႈႁူဝ်လွႆ ဢိူင်ႇထႃႉသၢႆ ၸႄႈဝဵင်းၵဵင်း ႁၢႆး ၸႄႈတွၼ်ႈၵဵင်းႁၢႆးၼၼ်ႉ ဝႃႈၼႆ။

ၵဵဝ်ႇလူၺ်ႈယႃႈမဝ်းၵမ်ဢၼ်တီႉၺွပ်းလႆႈၼႆႉ ၽၢႆႇတၢင်းၽူႈမီးပုၼ်ႈၽွၼ်းၶဝ် လႆႈၸွမ်းၵူတ်ႇထတ်း ၸုမ်းတေႃႉသူင်ႇယႃႈမဝ်းၵမ်ၸွမ်းလႅၼ်လိၼ် ၼႂ်းပိုၼ်ႉတီႈ ၸႄႈဝဵင်းမႄႈသၢႆသေ တေႃႉၵႂႃႇၵဵပ်းသိမ်းဝႆႉၼႂ်း ၸႄႈဝဵင်းၵဵင်းႁၢႆးၼၼ်ႉ ဝႃႈၼႆ။

ယွၼ်ႉမီးၵၢၼ်တေႃႉသူင်ႇယႃႈမဝ်းၵမ် ၶဝ်ႈၵႂႃႇၼႂ်းမိူင်းထႆး ဢမ်ႇထၢတ်ႇဢမ်ႇဝၢႆး လႄႈ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ်ၵေႃႈ တေတိူဝ်းၵူတ်ႇထတ်းႁႂ်ႈၼႅၼ်ႈၼႃ မႃးလိူဝ်သေၵဝ်ႇ ၼႆယဝ်ႉ။