ၸုမ်းသိုၵ်းမၢၼ်ႈတင်း KNDF ပဵၼ်ပၢင်တိုၵ်းၵၼ် ၼႂ်းဝူင်ႈလိုၼ်းသုတ်း ၶွင်လိူၼ် March ၼႆႉ ၽၢႆႇသိုၵ်းမၢၼ်ႈလူႉတၢႆ ဢမ်ႇယွမ်း 23 ၵေႃႉ

တင်ႈတႄႇဝၼ်းထီႉ 24-31 March 2022 (လိူၼ်သီႇလွင်ႈ 8 ၶမ်ႈ ထိုင် ဝၼ်းလိူၼ်သီႇလပ်း ပီႊတႆး 2116 ၼီႈ) ၼႂ်းဝူင်ႈလိုၼ်းသုတ်း ၶွင်လိူၼ် March ၼႆႉ ၸုမ်းသိုၵ်းမၢၼ်ႈတင်း တပ်ႉၵႅတ်ႇၶႄၸိူဝ်ႉၸၢတ်ႈယၢင်းလႅင် ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းပၢႆး တီႈလႅၼ်လိၼ်ၸၢပ်ႈ မိူင်းတႆးလႄႈ မိူင်းယၢင်းလႅင် ဝဵင်းလွႆၵေႃႇ၊ ၽလူႇသူဝ်ႇ၊ တီႇမေႃႉသူဝ်ႇ ၸိူဝ်းၼႆႉသေ ၽၢႆႇသိုၵ်းမၢၼ်ႈလူႉတၢႆ ဢမ်ႇယွမ်း 23 ၵေႃႉ ၽၢႆႇ KNDF တပ်ႉၵွင် 15 လူႉတၢႆ 1 ၵေႃႉ ၼႆယဝ်ႉ။

မိူဝ်ႈဝၼ်းထီႉ 24 March 2022 ၼၼ်ႉ ဝၢႆးသေၸုမ်းသိုၵ်းမၢၼ်ႈ ဢၼ်ပၵ်းတပ်ႉဝႆႉ တီႈဝၢၼ်ႈထူႇလီးပီႇလႃႇ ၸႄႈဝဵင်းတီႇမေႃႉသူဝ်ႇ လႆႈပဵၼ်ပၢင်တိုၵ်းၵၼ်တင်း တပ်ႉၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ယဝ်ႉၼၼ်ႉ ၸုမ်းသိုၵ်းမၢၼ်ႈ ၸုတ်ႇၽဝ်ႁိူၼ်းၵူၼ်းဝၢၼ်ႈၼႂ်းဝၢၼ်ႈထူႇလီးပီႇလႃႇ 6 လင်၊ ၸုမ်းသိုၵ်းမၢၼ်ႈ ဢၼ်ထူဝ်းသိုၵ်းၶဝ်ႈမႃး တီႈႁိမ်းဝၢၼ်ႈငူၺ်ႇတွင်ႇ ၸႄႈဝဵင်းၽလူႇသူဝ်ႇ ၼၼ်ႉၵေႃႈ လႆႈပဵၼ်ပၢင်တိုၵ်းၵၼ်တင်း KNDF ထႅင်ႈသေ ၽၢႆႇသိုၵ်းမၢၼ်ႈမီး လွင်ႈတူၵ်းသုမ်းတင်းၼမ် ၽၢႆႇ KNDF တပ်ႉၵွင် 15 လူႉတၢႆ 1 ၵေႃႉ ဝႃႈၼႆ။

မိူဝ်ႈဝၼ်းထီႉ 25 March 2022 ယၢမ်းၵၢင်ၼႂ်ၼၼ်ႉ ၸုမ်းသိုၵ်းမၢၼ်ႈ ဢၼ်ပၵ်းတပ်ႉဝႆႉ တီႈႁိမ်းဝၢၼ်ႈလိင်ႇၽူင်ႇလေး ၸႄႈဝဵင်းလွႆၵေႃႇၼၼ်ႉ လႆႈထုၵ်ႇတင်း KNDF ၶဝ်ႈတိုၵ်းလႄႈ ၽၢႆႇသိုၵ်းမၢၼ်ႈထွႆဢွၵ်ႇသေ KNDF သိမ်းလႆႈ တပ်ႉပၢင်သဝ်း ဢမ်ႇၵႃး မိူဝ်ႈယၢမ်း 16:00 မူင်း ၼၼ်ႉၵေႃႈ ၸုမ်းသိုၵ်းမၢၼ်ႈ ဢၼ်ထူဝ်းသိုၵ်းၶဝ်ႈမႃးတၢင်း ဝၢၼ်ႈ 5 လၵ်း လႄႈ ဝၢၼ်ႈ 6 လၵ်း၊ တေႃႇပူဝ်းသီႇ၊ ၸႄႈဝဵင်းတီႇမေႃႉသူဝ်ႇၼၼ်ႉ ပဵၼ်ပၢင်တိုၵ်းၵၼ်တင်း တပ်ႉၵႅတ်ႇၶႄ ၸိူဝ်ႉၸၢတ်ႈယၢင်းလႅင်သေ ဝၢႆးၼၼ်ႉ ၸုမ်းသိုၵ်းမၢၼ်ႈ ၸုတ်ႇၽဝ်ႁိူၼ်းၵူၼ်းဝၢၼ်ႈ တီႈဝၢၼ်ႈ 5 လၵ်းထႅင်ႈ 5 လင် ဝႃႈၼႆ။

မိူဝ်ႈဝၼ်းထီႉ 26 −27 March 2022 ၼၼ်ႉ ၸုမ်းသိုၵ်းမၢၼ်ႈတပ်ႉ ၶမယ 428 ဢၼ်ငဝ်ႈတပ်ႉပၵ်းဝႆႉတီႈ ၽလူႇသူဝ်ႇၼၼ်ႉ လႆႈထုၵ်ႇတင်း တပ်ႉၵႅတ်ႇၶႄၸိူဝ်ႉၸၢတ်ႈယၢင်းလႅင် KNDF ၶဝ်ႈတိုၵ်းသေ ၽၢႆႇသိုၵ်းမၢၼ်ႈ မီးလွင်ႈတူၵ်းသုမ်းတင်းၼမ် ဢမ်ႇၵႃး မိူဝ်ႈယၢမ်းၵၢင်ၶိုၼ်းမွၵ်ႈ 20:00 မူင်း ၼၼ်ႉၵေႃႈ KNDF ၶဝ်ႈတိုၵ်း ၸုမ်းသိုၵ်းမၢၼ်ႈ တပ်ႉ ၶမယ 422 ဢၼ်ငဝ်ႈတပ်ႉ ပၵ်းဝႆႉတီႈမိူင်းပၢႆး ၼၼ်ႉထႅင်ႈသေ ၽၢႆႇသိုၵ်းမၢၼ်ႈလူႉတၢႆ  5 ၵေႃႉ ဝႃႈၼႆ။

ၼႂ်းဝၼ်းထီႉ 27 March 2022 ယၢမ်းၵၢင်ၼႂ်ၼၼ်ႉ ၸုမ်းသိုၵ်းမုတ်း တပ်ႉၵႅတ်ႇၶႄၸိူဝ်ႉၸၢတ်ႈယၢင်းလႅင် ၶဝ်ႈတိုၵ်းၸုမ်းသိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ဝၢၼ်ႈၵုၼ်းတႃႇ ၸႄႈဝဵင်းတီႇမေႃႉသူဝ်ႇ ၼၼ်ႉသေ ၽၢႆႇသိုၵ်းမၢၼ်ႈလူႉတၢႆ 6 ၵေႃႉ။

ထိုင်မႃး ဝၼ်းထီႉ 28 March 2022 ၼႆႉသမ်ႉ KNDF ၶဝ်ႈတိုၵ်း တီႈသွၼ်ၵၢၼ်သိုၵ်း မၢႆ 14 ၸုမ်းသိုၵ်းမၢၼ်ႈဢၼ်မီးတီႈ ဝၢၼ်ႈတေႃႇငၢၼ်ႇၶႃး ၼၼ်ႉသေ ၽၢႆႇသိုၵ်းမၢၼ်ႈလူႉတၢႆ 2 ၵေႃႉ ၼႂ်းၼၼ်ႉပႃး ၽူႈမီးၸၼ်ႉသိုၵ်းမၢၼ်ႈ 1 ၵေႃႉ ဝႃႈၼႆ။

မိူဝ်ႈဝၼ်းထီႉ 30 March 2022  ၸုမ်းသိုၵ်းမၢၼ်ႈ တပ်ႉ ၶမယ 428 ဢၼ်ပၵ်းတပ်ႉဝႆႉ တီႈၽလူႇသူဝ်ႇၼၼ်ႉ လႆႈထုၵ်ႇတင်း KNDF ၶဝ်ႈတိုၵ်းထႅင်ႈ ပွၵ်ႈၼိုင်ႈသေ ၽၢႆႇသိုၵ်းမၢၼ်ႈလူႉတၢႆ 8 ၵေႃႉဝႃႈၼႆ။

ၵႃးသိုၵ်း ၸုမ်းသိုၵ်းမၢၼ်ႈ 40 လမ်း ဢၼ်လုၵ်ႉတၢင်းမိူင်းတႆးသေ ထူဝ်းသိုၵ်းၶဝ်ႈမႃးတၢင်း မိူင်းယၢင်းလႅင် ၼႆႉၵေႃႈ လႆႈပဵၼ်ပၢင်တိုၵ်းၵၼ်တင်း တပ်ႉၵႅတ်ႇၶႄၸိူဝ်ႉၸၢတ်ႈယၢင်းလႅင် တီႈႁိမ်းဝၢၼ်ႈမႂ်ႇငူၺ်ႇတွင်ႇလႄႈ ထူးလီးပီႇလႃႇ၊ ၸႄႈဝဵင်းတီႇမေႃႉသူဝ်ႇ ၼၼ်ႉသေ ၽၢႆႇသိုၵ်းမၢၼ်ႈ မီးလွင်ႈတူၵ်းသုမ်းတင်း ၼမ်ၼႆ ၽၢႆႇ KNDF ပိုၼ်ၽၢဝ်ႇၼႄဝႆႉၼင်ႇၼႆ ။

တႆးလွတ်ႈလႅဝ်း