ၸုမ်းသိုၵ်းမၢၼ်ႈထူဝ်းသိုၵ်းၶဝ်ႈၼႂ်းၸႄႈဝဵင်းယႂႃႇငၢၼ်ႇ ဝၢႆးသေမီးလွင်ႈ ပိုတ်းယိုဝ်းတၢႆ ၽူႈမီးၸၼ်ႉသိုၵ်းမၢၼ်ႈ

မိူဝ်ႈဝၼ်းထီႉ 10 April 2022 ( လိူၼ်ႁႃႈမႂ်ႇ 10 ၶမ်ႈ ပီႊတႆး 2116 ၼီႈ) ပူၼ်ႉမႃးၼႆႉ ၸွမ်းၼင်ႇ ၵူၼ်းၼႂ်း ပိုၼ်ႉတီႈၵေႃႉၼိုင်ႈ လၢတ်ႈၼႄသိုဝ်ႇၶၢဝ်ႇ MeKong News ဝႃႈ ဝၢႆးၸုမ်းသိုၵ်းမၢၼ်ႈ 4 ၵေႃႉထုၵ်ႇယိုဝ်းတၢႆဢၼ်ပႃးၸၼ်ႉ   ၸဝ်ႈႁၢၼ် ၼိုင်ႈၵေႃႉၼၼ်ႉယဝ်ႉ ၶွင်ႇသီႇသိုၵ်းမၢၼ်ႈ မီးလွင်ႈႁၢင်ႈႁႅၼ်းတႃႇတေ ထူဝ်းသိုၵ်းၶဝ်ႈၼႂ်း ၸႄႈဝဵင်းယႂႃႇငၢၼ်ႇ  မိူင်းတႆးပွတ်းၸၢၼ်း ၊ ၼႃႈတီႈၵုမ်းၵမ် ၸၢဝ်းၶိူဝ်းထၼူႉ ဝႃႈၼႆ။

ၸုမ်းသိုၵ်းမၢၼ်ႈ တႃႇတေထူဝ်းသိုၵ်း ၶဝ်ႈၼႂ်းၸႄႈဝဵင်းယႂႃႇငၢၼ်ႇၼၼ်ႉ လူတ်ႉၵႃး 3 လမ်းလႄႈဢဵၼ်ႁႅင်းၵူၼ်းမွၵ်ႈ 60 ၵေႃႉၼႆႉ မႃးတမ်းဝၢင်းပၢင်ၶဝ်တီႈ ဝၢၼ်ႈဝႃးယွတ်ႉဝႆႉလႄႈ ထႅင်ႈၸုမ်းၼိုင်ႈသမ်ႉ ၶျႃႉပၢင်သဝ်းဝႆႉတၢင်း ဝၢၼ်ႈတႄးလူႉသေ ပေႃးထိုင်ယၢမ်းၵၢင်ၶမ်ႈမႃး တေထူဝ်းသိုၵ်း ၼႆယဝ်ႉ။

ၸုမ်းသိုၵ်းမၢၼ်ႈ ၸုမ်းၼႆႉၶွတ်ႇၽွတ်ႈဝႆႉပၼ်ပႃး ၸုမ်းပျူႇၸေႃးထီးသေ မိူဝ်ႈဝၼ်းထီႉ 10 April 2022  ယၢမ်းႁူဝ်ၶမ်ႈၼၼ်ႉၵေႃႈ ၸုမ်းသိုၵ်းမၢၼ်ႈလႄႈတင်း ၸုမ်းၵႅတ်ႇၶႄၵူၼ်းမိူင်း မီးလွင်ႈပိုတ်းယိုဝ်းၵၼ် ၼႂ်းၵႄႈၵၢင် ဝၢၼ်ႈလႂႃႉသိၼ်ႇလႄႈ ဝၢၼ်ႈတွင်ႇပူဝ်ႉၵွၺ်း ၼႂ်းၸႄႈဝဵင်းယႂႃႇငၢၼ်ႇသေ ၽၢႆႇသိုၵ်းမၢၼ်ႈ လုတၢႆ 4 ၵေႃႉ ပႃးၸဝ်ႈႁၢၼ်ၵေႃႉၼိုင်ႈ ဝႃႈၼႆ။  တပ်ႉၵႅတ်ႇၶႄၵူၼ်းမိူင်း ဢၼ်တင်းၸုမ်းသိုၵ်းမၢၼ်ႈ ပဵၼ်ပၢင်တိုၵ်းၵၼ်ၼႆႉ တေပဵၼ်တပ်ႉၵႅတ်ႇၶႄၵူၼ်းမိူင်း တူၼ်ႈတီး၊ တပ်ႉသိုၵ်းမုတ်း ဝဵင်းယႂႃႇငၢၼ်ႇ၊ ၸုမ်းၵႅတ်ႇၶႄၵူၼ်းမိူင်း မိူင်းတႆး ႁူမ်ႈႁွမ်းၵၼ်သေ တိုၵ်းယိုဝ်းသိုၵ်းမၢၼ်ႈ မႃး တီႈပၢင်တိုၵ်းယိုဝ်းၵၼ်ပွၵ်ႈၵမ်းၼႆႉ ၽၢႆႇတပ်ႉၵႅတ်ႇၶႄၵူၼ်းမိူင်း ဢမ်ႇမီးလွင်ႈလူႉတၢႆ မၢတ်ႇၸဵပ်းသင်သေ ထွႆဢွၵ်ႇမႃးလႆႈ လီငၢမ်း ဝႃႈၼႆ။

ဢၢင်ႈဢိင် – https://web.facebook.com

တႆလွတ်ႈလႅဝ်း