ၸုမ်းသိုၵ်းမၢၼ်ႈ ႁူမ်ႈပိဝ်ႇၸေႃးထီးသေ ၸုတ်ႇၽဝ်ႁိူၼ်းၵူၼ်းဝၢၼ်ႈတင်းၼမ် ၼႂ်းၸႄႈဝဵင်းပုတလိၼ်ႇ လႄႈ ၸႄႈဝဵင်းဢယႃႇတေႃႇ

မိူဝ်ႈဝၼ်းထီႉ 8 April 2022 (လိူၼ်ႁႃႈမႂ်ႇ 8 ၶမ်ႈ ပီႊတႆး 2116 ၼီႈ) ၸုမ်းသိုၵ်းမၢၼ်ႈႁူမ်ႈ ပိဝ်ႇၸေႃးထီး ၶဝ်ႈၼႂ်းဝၢၼ်ႈၵူႇတေႃး ၸႄႈဝဵင်းပုတလိၼ်ႇ တိူင်းၸႄႈၵႅင်းယဝ်ႉ ၸုတ်ႇၽဝ်ႁိူၼ်းၵူၼ်းဝၢၼ်ႈလႄႈ ၵူၼ်းဝၢၼ်ႈလႆႈဢွၼ်ၵၼ် ဢွၵ်ႇပၢႆႈတင်းၼမ် ၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇဝႃႈ “ၶဝ်တႄႇၸုတ်ႇၽဝ်ႁိူၼ်းၵူၼ်းဝၢၼ်ႈ မိူဝ်ႈယၢမ်းၵၢင်ၶိုၼ်း 24:00 မူင်းသေ ပိုတ်းယိုဝ်းပႃးၵွင်ႈ ႁၢဝ်ႈႁႅင်းလႄႈ ၵူၼ်းဝၢၼ်ႈလႆႈဢွၵ်ႇပၢႆႈတင်းၼမ်။ ဝၢႆးၼၼ်ႉ မိူဝ်ႈယၢမ်း 24:29 သမ်ႉ ဢဝ်ႁိူဝ်းမိၼ်တိုၵ်းသေ ၶဝ်ႈမႃးပိုတ်းယိုဝ်းထႅင်ႈႁိုင်မွၵ်ႈ 15 မိၼိတ်ႉလႄႈ လင်ႁိူၼ်းၵူၼ်းဝၢၼ်ႈလႆႈထုၵ်ႇ ၾႆးမႆႈတင်းၼမ်သေ ၵူၼ်းဝၢၼ်ႈဢၼ်လႆႈတၢင်းမၢတ်ႇၸဵပ်းၵေႃႈ လႅပ်ႈတေမီးယူႇ၊ မိူဝ်ႈၽွင်းႁဝ်းၶႃႈ တိုၵ်ႉလႅၼ်ႈယူႇၼၼ်ႉ ၾႆးပေႃးမႆႈႁိူၼ်း 15 လင်ယဝ်ႉ” ဝႃႈၼႆ။

ၼႂ်းဝၢၼ်ႈၵူႇတေႃးၼႆႉ လင်ႁိူၼ်းမီးယူႇမွၵ်ႈ 250 လင်သေ ၵဵဝ်ႇလူၺ်ႈလွင်ႈလူႉသုမ်းလႄႈ ၵူၼ်းဝၢၼ်ႈဢၼ်လႆႈတၢင်းမၢတ်ႇၸဵပ်း ၼၼ်ႉတႄႉ ပႆႇလႆႈႁပ်ႉႁူႉၸွမ်းႁူဝ်ယွႆႈမၼ်း ဝႃႈၼႆ။

လႆႈႁူႉထႅင်ႈဝႃႈ ၼႂ်းဝၼ်းလဵဝ်ၵၼ်ၼႆႉၵူၺ်းၼင်ႇၵဝ်ႇ ၸုမ်းသိုၵ်းမၢၼ်ႈ ၸုတ်ႇၽဝ်ႁိူၼ်းၵူၼ်းဝၢၼ်ႈထႅင်ႈ တီႈဝၢၼ်ႈသျွၵ်ႉၶႃး ၸႄႈဝဵင်းဢယႃႇတေႃႇ တိူင်းၸႄႈၵႅင်း 67 လင် သေဢမ်ႇၵႃး ယွၼ်ႉၸုမ်းသိုၵ်းမၢၼ်ႈ ပိုတ်းယိုဝ်းၵွင်ႈလူင်ပႃးထႅင်ႈလႄႈ တိူဝ်ႉမႅၼ်ႈၵူၼ်းဝၢၼ်ႈ ဢႃႇယု 25 ပီႊ လူႉတၢႆ 1 ၵေႃႉ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄတီႈသိုဝ်ႇၶၢဝ်ႇဝႃႈ “ လင်ႁိူၼ်းဢၼ် ထုၵ်ႇၾႆးမႆႈတႄႉ မီးယူႇ 67 လင်သေ ၵဵဝ်ႇလူၺ်ႈလွင်ႈ ႁူဝ်ယွႆႈဢၼ်လႆႈလူႉသုမ်းၼၼ်ႉတႄႉ မိူဝ်ႈလဵဝ်ၵေႃႈတိုၵ်ႉႁႃ ၵဵပ်းသဵၼ်ႈသၢႆမၢႆမၼ်းယူႇ ယၢမ်းလဵဝ်တႄႉ ၾႆးမွတ်ႇယဝ်ႉလႄႈ ၵူၼ်းဝၢၼ်ႈၸိူဝ်းဢၼ်ဢွၵ်ႇပၢႆႈၼၼ်ႉ ၵမ်ႈၽွင်ႈၵေႃႈ ပွၵ်ႈမႃးၶိုၼ်းသေတႃႉ ၵမ်ႈၽွင်ႈၵေႃႈ ပႆႇပွၵ်ႈမႃးၶိုၼ်း” ဝႃႈၼႆ။

သိုပ်ႇလၢတ်ႈထႅင်ႈဝႃႈ “မိူဝ်ႈၶဝ်ပႆႇၸုတ်ႇၽဝ်ၼၼ်ႉၵေႃႈ ၶဝ်တီႉၺွပ်းဢဝ်ၵူၼ်းဝၢၼ်ႈ ၵမ်ႈၽွင်ႈၵႂႃႇ ႁဵတ်းႁူဝ်ႉတၢင်သိုၵ်းၶဝ်သေ ဝၢႆးၶဝ်ၸုတ်ႇၽဝ်ႁိူၼ်းၵူၼ်းဝၢၼ်ႈယဝ်ႉၼၼ်ႉ ၸင်ႇပွႆႇပၼ်ၶိုၼ်း” ဝႃႈၼႆ။

မိူဝ်ႈဝၼ်းထီႉ 29 March 2022 ပူၼ်ႉမႃးၼၼ်ႉၵေႃႈ ၸုမ်းသိုၵ်းမၢၼ်ႈ ၸုတ်ႇၽဝ်ႁိူၼ်းၵူၼ်းဝၢၼ်ႈ ၼႂ်းၸႄႈဝဵင်းဢယႃႇတေႃႇ 3 လင်လႄႈ ၵူၼ်းထဝ်ႈဢႃႇယုယႂ်ႇ ဢၼ်တၢႆၽၢၵ်ႇသေ မီးဝႆႉၼႂ်းႁိူၼ်းၼၼ်ႉၵေႃႈ လႆႈထုၵ်ႇၾႆးမႆႈၵႂႃႇပႃး ဝႃႈၼႆ။

တင်ႈတႄႇမိူဝ်ႈဝၼ်းထီႉ 1 February 2022 တေႃႇထိုင် ဝၼ်းထီႉ 31 March 2022 ၼႂ်းၶၢဝ်းတၢင်း 1 လိူၼ်ၼႆႉၵူၺ်း လင်ႁိူၼ်းၼႂ်းမိူင်းႁူမ်ႈတုမ် ဢၼ်လႆႈထုၵ်ႇတင်းၸုမ်းသိုၵ်းမၢၼ်ႈ ၸုတ်ႇၽဝ်ၼၼ်ႉ မီးယူႇ 7973 လင်သေ ၼႂ်းတိူင်းၸႄႈၵႅင်းမီးယူႇ 4954 လင်ၼႆ Data For Myanmar ပိုၼ်ၽၢဝ်ႇဢွၵ်ႇၼႄဝႆႉ ၼင်ႇၼႆ။

တႆးလွတ်ႈလႅဝ်း