ၸုမ်းသိုၵ်းမၢၼ်ႈ 317 ၵေႃႉ ပႃးၽူႈမီးၸၼ်ႉသုင် ဝၢင်းၶိူင်ႈပၼ်ၸုမ်း MNDAA တီႈလႃႈသဵဝ်ႈ

ပၢင်တိုၵ်းၼႂ်းၵႄႈၵၢင်ၸုမ်းသိုၵ်းမၢၼ်ႈ လႄႈသိုၵ်းၵူဝ်းၵၢင်ႉ MNDAA ၼႂ်းၸႄႈဝဵင်းလႃႈသဵဝ်ႈ ၼၼ်ႉ သိုပ်ႇပဵၼ်ႁၢဝ်ႈႁႅင်းလႄႈ ၸုမ်းသိုၵ်းမၢၼ်ႈၵမ်ႈၽွင်ႈ ပႃးၸဵမ်ၽူႈမီးၸၼ်ႉသုင် ဢၼ်ပဵၼ်ၸၼ်ႉၸဝ်ႈသိုၵ်းၸိူဝ်းၼႆႉ ဢဵၼ်ႁႅင်းဢမ်ႇယွမ်း 317 ၵေႃႉ ဝၢင်းၶိူင်ႈပၼ် ၸုမ်းသိုၵ်းၵူဝ်းၵၢင်ႉ MNDAA ၼႆယဝ်ႉ။

မိူဝ်ႈၼႂ်းဝၼ်းထီႉ 21 July 2024 (လိူၼ်ပႅတ်ႇလွင်ႈ 1 ၶမ်ႈ ပီႊတႆး 2118 ၼီႈ) ၶၢဝ်းယၢမ်းၵၢင်ၼႂ် 10:00 မူင်းၼၼ်ႉ ၸုမ်းသိုၵ်းမၢၼ်ႈ ဢၼ်ပဵၼ်ၽူႈမီးၸၼ်ႉ ၸဝ်ႈသိုၵ်း 1 ၵေႃႉ၊ ၸဝ်ႈႁၢၼ် 2 ၵေႃႉ၊ ၶုၼ်သိုၵ်းလူင် 5 ၵေႃႉ ဢွၼ်ဢဝ်သိုၵ်းႁၢၼ်ၵမ်ႈၽွင်ႈ ႁႅင်းၵူၼ်းႁူမ်ႈတင်းမူတ်း 317 ၵေႃႉ (ဢမ်ႇႁူႉမၢႆတပ်ႉ) ဝၢင်းၶိူင်ႈၵွင်ႈၵၢင်ႇပၼ် ၸုမ်းသိုၵ်းၵူဝ်းၵၢင်ႉ MNDAA ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၽၢႆႇတၢင်းသိုၵ်းၵူဝ်းၵၢင်ႉ MNDAA ၸင်ႇႁႃပိုၼ်ၽၢဝ်ႇဢွၵ်ႇမႃး မိူဝ်းဝႃးဝၼ်းထီႉ 23 July 2024 ၼႆႉၵူၺ်းသေ လွင်ႈဝႃႈပဵၼ်သိုၵ်းမၢၼ်ႈ တပ်ႉၸုမ်းလႂ်၊ တပ်ႉမၢႆလႂ် ဢၼ်ဝႃႈၼၼ်ႉတႄႉ ဢမ်ႇႁၼ်ပိုၼ်ၽၢဝ်ႇလၢတ်ႈပႃး၊ ၸုမ်းသိုၵ်းမၢၼ်ႈ ဢၼ်ဝၢင်းၶိူင်ႈၼၼ်ႉၵေႃႈ ၽူႈမီးပုၼ်ႈၽွၼ်းၽၢႆႇတၢင်း MNDAA ၶဝ် တွၼ်ႈသူးပၼ်လႄႈ ၸွႆႈယူတ်းယႃပၼ် ၵူၼ်းသိုၵ်းၸိူဝ်းမီးလွင်ႈမၢတ်ႇၸဵပ်းၸိူဝ်းၼၼ်ႉယူႇ ၼႆယဝ်ႉ။

ဝၢႆးလင်ဢၼ်သိုၵ်းၵူဝ်းၵၢင်ႉၶဝ်ပိုၼ်ၽၢဝ်ႇ လွင်ႈသိုၵ်းမၢၼ်ႈဝၢင်းၶိူင်ႈပၼ်ၶဝ်ယဝ်ႉၼၼ်ႉ ၼႂ်းဝၼ်းထီႉ 22 July 2024 ၶၢဝ်းယၢမ်းတဵင်ႈၶိုၼ်းၼၼ်ႉ သိုၵ်းမၢၼ်ႈဢဝ်ႁိူဝ်းမိၼ်းတိုၵ်း ၵႂႃႇပွႆႇမၢၵ်ႇသႂ်ႇ ၼႂ်ႈၼႃႈလိၼ်သိုၵ်းၵူဝ်းၵၢင်ႉ တီႈတူင်ႈၶျိၼ် ဝဵင်းလဝ်ႉၵႆႇ (လဝ်ႇၵၢႆး) သေ ႁဵတ်းႁႂ်ႈႁိူၼ်းတိူၵ်ႈလူႉၵွႆတင်းၼမ် လႄႈမီးၵူၼ်းလူႉတၢႆၸွမ်း 2 ၵေႃႉ၊ မၢတ်ႇၸဵပ်းၸွမ်း 3 ၵေႃႉ ၼႆယဝ်ႉ။

ပၢင်တိုၵ်းသိုၵ်းမၢၼ်ႈတင်း သိုၵ်းၵူဝ်းၵၢင်ႉ ဢၼ်လႆႈပဵၼ်ယူႇတီႈၼႂ်းၸႄႈဝဵင်းလႃႈသဵဝ်ႈၼႆႉ ၵူၼ်းမိူင်းပိုၼ်ႉတီႈၵေႃႉၼိုင်ႉလၢတ်ႈၼႄဝႃႈ “ယၢမ်းလဵဝ်ပၢင်တိုၵ်းၼႆႉ ၶႂ်ႈလၢမ်းထိုင် ၼႂ်းဝဵင်းလႃႈသဵဝ်ႈယဝ်ႉၶႃႈ ၸွမ်းႁိမ်းႁွမ်းဝၢင်းႁိူဝ်းမိၼ် လႄႈၸွမ်းၵၢတ်ႇလႃႈသဵဝ်ႈၼၼ်ႉ ပၢင်တိုၵ်းပေႃးထိုင်ယဝ်ႉဢေႃႈ ဢမ်ႇႁိုင်သင်ၼႆႉ ၸၢင်ႈထိုင်ၼႂ်းၵၢင်ဝဵင်းလႃႈသဵဝ်ႈၵွၼ်ႇ ယၢမ်းလဵဝ်လႆႈႁူႉဝႃႈ တပ်ႉ 41 လႄႈထႅင်ႈလၢႆလၢႆတပ်ႉၸွမ်းသၢပ်ႇဝဵင်းၼၼ်ႉ သိုၵ်းၵူဝ်းၵၢင်ႉၶဝ် သိမ်းလႆႈၽွင်ႈယဝ်ႉၼႆဢေႃႈ” လၢတ်ႈလႄၼင်ႇၼႆ။

ယွၼ်ႉပၢင်တိုၵ်းသေ ၵူၼ်းမိူင်းၼႂ်းၸႄႈဝဵင်းလႃႈသဵဝ်ႈ လႄႈလၢႆလၢႆပိုၼ်ႉတီႈ ၼပ်ႉႁူဝ်မိုၼ်ႇ လႆႈၸုၼ်ႉပႅတ်ႈသူၼ်ႁႆႈၼႃး ႁိူၼ်းယေးသေ ပၢႆႈၽေးထိုင်ၼႂ်းၸိုင်ႈတႆးပွတ်းၸၢၼ်း မၢင်ၸိူဝ်းပၢႆႈဢွၵ်ႇၼွၵ်ႈမိူင်းလႄႈ ၸိူဝ်းဢၼ်လႆႈမၢတ်ႇၸဵပ်း လူႉတၢႆယွၼ်ႉပၢင်တိုၵ်းၵေႃႈ မီးတင်းၼမ် ၼႆယဝ်ႉ။

တႆးလွတ်ႈလႅဝ်း