ၸုမ်းသိုၵ်းလေႃးလႄး ဢထမ်ႇမ တဵၵ်းၵဵပ်းသိုၵ်းမႂ်ႇ

ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်ၼၼ်ႉ ဢထမ်ႇမ တဵၵ်းၵဵပ်းသိုၵ်းမႂ်ႇ ၼႂ်းဝၢၼ်ႈၵျွၵ်းမႄးလူင် ဢိူင်ႇၵျွၵ်းမႄး ၸႄႈဝဵင်းၵျွၵ်းမႄး ၸိုင်ႈတႆးပွတ်းႁွင်ႇ ၼႆယဝ်ႉ။

မိူဝ်ႈၼႆႉဝၼ်းထီႉ 10 April 2022 (လိူၼ်ႁႃႈမႂ်ႇ 10 ၶမ်ႈ ပီႊတႆး 2116 ၼီႈ) ယၢမ်း 09:28 မူင်း ၸုမ်းသိုၵ်းလေႃးလႄး ဢထမ်ႇမ တဵၵ်းႁွင်ႉဢဝ်ႁူဝ်ၸုမ်း ဝၢၼ်ႈၵျွၵ်းမႄးလူင် ဢိူင်ႇၵျွၵ်းမႄးသေ ႁဵတ်းပၢင်ၵုမ် တီႈဝၢၼ်ႈၶူဝ်ယၢဝ်းလႄႈ ၼႂ်းပၢင်ၵုမ်ၼၼ်ႉ ၶဝ်လႆႈ လၢတ်ႈၵႂႃႇ − 1. ၵဵဝ်ႇလူၺ်ႈလွင်ႈသိုၵ်းမႂ်ႇ၊ 2. လွင်ႈၶွၼ်ႇၵူႈမဵဝ်းမဵဝ်း၊ 3. လွင်ႈၶၢဝ်ႇငၢဝ်း၊ 4. လွင်ႈတေမႄးသိူဝ်ႇတၢင်း ဢၼ်လုၵ်ႉဝၢၼ်ႈၵျွၵ်းမႄးလူင် ၵႂႃႇၸူး ဝၢၼ်ႈၶူဝ်ယၢဝ်းၼၼ်ႉ တေၸႂ်ႉၸဝ်ႈႁႆႈ ဢၼ်ၸမ်တၢင်းၵႃး သိူဝ်ႇၵူႈၸဝ်ႈ တေႃႇပေႃးႁွတ်ႈၽႅဝ် ဝၢၼ်ႈၶူဝ်ယၢဝ်း၊ 5. တႃႇတေၵႂႃႇႁဵတ်းသိုၵ်း ၸိူဝ်းဢၼ်လႆႈ သၢႆမၢႆယဝ်ႉၼၼ်ႉ မိူၼ်ၼင်ႇ − ဝၢၼ်ႈၵျွၵ်းမႄးလူင် 5 ၵေႃႉ၊ ဝၢၼ်ႈၶူဝ်ယၢဝ်း 3 ၵေႃႉ၊ ဝၢၼ်ႈဢေႃႈ 3 ၵေႃႉ၊ ဝၢၼ်ႈပႃႇပူၵ်ႇ 3 ၵေႃႉ၊ 4 လၵ်း 5 လၵ်း ဝၢၼ်ႈၵႃးလႃး 4 ၵေႃႉ၊ ဝၢၼ်ႈၵုင်းၸူင် 5 ၵေႃႉ ႁူမ်ႈတင်းမူတ်း 23 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈ ၸုမ်းသိုၵ်းလေႃးလႄး ဢထမ်ႇမ တဵၵ်းၵဵပ်းသိုၵ်းမႂ်ႇၼႆႉ ၶဝ်ယင်းပၢႆ မီးလွင်ႈ လွၵ်ႇငိူတ်ႈပႃးဝႃႈ ၽူႈလႂ်ၽႂ်သေဢမ်ႇဝႃႈ ဢၼ်ပႃးၼႂ်းသၢႆမၢႆသိုၵ်းယဝ်ႉၼႆႉ ပေႃးပၢႆႈၼႆ တေသိမ်းဢဝ်တိူၵ်ႇႁႆႈလွၵ်းၼႃးတင်းသဵင်ႈ သိုဝ်ႉၶၢႆၵေႃႈဢမ်ႇလႆႈ ပေႃးၽႂ်သိုဝ်ႉၵေႃႈ တေသုမ်းလၢႆတင်းမူတ်း ဝႃႈၼႆ။

တႆးလွတ်ႈလႅဝ်း