ၸုမ်းသိုၵ်းလေႃးလႄး ၵဵပ်းသိုၵ်းမႂ်ႇ ၼႂ်းၸႄႈဝဵင်းမိူင်းၵိုင်

ၸုမ်းသိုၵ်းလေႃးလႄး ဢၼ်မီးသိုၵ်း SSPP၊ TNLA ၼၼ်ႉ ၵႂႃႇတဵၵ်းၵဵပ်းသိုၵ်းမႂ်ႇ တီႈၼႂ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ၼႆယဝ်ႉ။

မိူဝ်ႈၼႆႉဝၼ်းထီႉ 9 April 2022 (လိူၼ်ႁႃႈမႂ်ႇ 9 ၶမ်ႈ ပီႊတႆး 2116 ၼီႈ) ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်ၼၼ်ႉ ၵႂႃႇတဵၵ်းၵဵပ်းသိုၵ်းမႂ်ႇ တီႈၼႂ်းထုင်ႉမိူင်းၵိုင် ၼိူဝ်သၼ်လွႆလမ် ၸိူဝ်းဢၼ် ပဵၼ် ပီႈၼွင်ႉ ၸၢဝ်းလွႆတင်းမူတ်း တႄႇဢဝ်ၼႂ်းဢိူင်ႇၼွင်သၢမ်ပူး တေႃႇထိုင် သၼ်လွႆၸၢင်ႉၼႆႉ ၸုမ်းသိုၵ်းလေႃးလႄးၶဝ် ယွၼ်းၵူၼ်းတႃႇ 1,000 ၵေႃႉၼႆလႄႈ ၵူၼ်းဝၢၼ်ႈမၢင်ဝၢၼ်ႈတေႉ ၵႂႃႇပၼ်ယဝ်ႉဝႃႈၼႆသေတႃႉ ၵူၺ်းၵႃႈ ဝၢၼ်ႈဢၼ်ဢမ်ႇပႆႇၵႂႃႇၵေႃႈ ယင်းတိုၵ်ႉမီး ဝႃႈၼႆ။

ဝၢၼ်ႈဢၼ်လႆႈပၼ်ၵႂႃႇယဝ်ႉၼၼ်ႉ တေမီးမိူၼ်ၼင်ႇ − ဝၢၼ်ႈပၢင်ပူႇယီႈ 3 ၵေႃႉ၊ ဝၢၼ်ႈပူင်ႇယႃႈသႆး 5 ၵေႃႉ၊ ဝၢၼ်ႈပၢင်ၶၢမ်း 25 ၵေႃႉသေ ၸိူဝ်းၼႆႉတေႉဢဝ်ၵႂႃႇဢၢပ်ႈပၼ်ၶဝ်ယဝ်ႉ ဝႃႈၼႆ။

ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ၸုမ်းသိုၵ်းလေႃးလႄးၶဝ်ၵေႃႈ လူင်းၵႂႃႇၵဵပ်းသိုၵ်းမႂ်ႇ တီႈၼႂ်းဝၢၼ်ႈလွႆၶေႃ ဢိူင်ႇၼႃးႁွင်ႈႁႅင်ႈ ၸႄႈဝဵင်းၵျွၵ်ႉမႄး ႁိူၼ်းဢၼ်မီးၸၢႆးသွၼ်ႉသွင်ၼၼ်ႉ တေဢဝ်တင်းမူတ်းၼႆသေ ၵူၼ်းဝၢၼ်ႈသမ်ႉဢမ်ႇၽွမ်ႉလႄႈ လႆႈပၼ်ငိုၼ်းဢဝ် ၼိုင်ႈႁိူၼ်းလႂ် 200,000 ပျႃး ႁူမ်ႈတင်းမူတ်း တူၵ်းမႅၼ်ႈသင်ႉငိုၼ်းမၢၼ်ႈ 340 သႅၼ်ပျႃး ၼႆယဝ်ႉ။

ၼွၵ်ႈလိူဝ်သေၼႆႉ တီႈၼႂ်းၸႄႈဝဵင်းၵျွၵ်ႉမႄး ၵူၺ်းၼင်ႇၵဝ်ႇ ၸုမ်းသိုၵ်းလေႃးလႄးၶဝ် ယင်းပၢႆမီးလွင်ႈယုၵ်ႉၶၢႆႉ ႁႅင်းသိုၵ်း တီႈဝၢၼ်ႈၶူဝ်ယၢဝ်း တႃႇၼိုင်ႈၶိုင်ႈ ၵႂႃႇတၢင်းမိူင်းငေႃႉယဝ်ႉ ၼႆလႄႈ တီႈဝၢၼ်ႈၶူဝ်ယၢဝ်းၼႆႉ ႁႅင်းသိုၵ်းၶဝ်ၵိုတ်း 60 ပၢႆၵူၺ်းယဝ်ႉသေ တီႈၼမ်ႉလိၼ်း ၶူဝ်တႅၼ်ႈ ၼမ်ႉၽၢတ်ႇၸိူဝ်းၼၼ်ႉတေႉ ဢမ်ႇမီးယဝ်ႉ ဝႃႈၼႆ။

မိူၼ်ၼင်ႇၼၼ် ၶိင်းၸေႃးလမ်ၼမ်ႉႁင်ႈၶိုင်ႈ သိုၵ်း SSPP ၼၼ်ႉ ဢွၼ်ဢဝ်ႁႅင်းသိုၵ်း 100 ပၢႆသေ ၵႂႃႇပႂ်ႉၸွမ်း ဝၢၼ်ႈတႃႈၵွင်းမူးၶၼ်၊ တႃႈဢုမ်းၼူၺ်း၊ တႃႈႁွမ်း ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ဝႃႈၼႆ။ ပေႃးယဝ်ႉတီႈတၢင်းၼွင်ဝူဝ်းငႄႉၸႅၼ်ႇၼၼ်ႉ ယွၼ်ႉၸုမ်းသိုၵ်းမၢၼ်ႈ ဢဝ်ႁိူဝ်းမိၼ် ၵႂႃႇပၼ်ႇလဵပ်ႈၼႆလႄႈ ၵူၼ်းဝၢၼ်ႈငႄႉၸႅၼ်ႇ လႆႈဢွၼ်ၵၼ်ငိူင်ႉဝႄႈ ၵႂႃႇယူႇသွၼ်ႈ သဝ်းဝႆႉ တီႈဝဵင်းၼမ်ႉလၼ်ႈ တင်းၼမ် ဝႃႈၼႆ။

တႆးလွတ်ႈလႅဝ်း