ၸုမ်းသိုၵ်းလေႃးလႄး ႁွင်ႉၵူၼ်းမိူင်းႁဵတ်းပၢင်ၵုမ် ၼႂ်းၸႄႈဝဵင်းလၢႆးၶႃႈ လႄႈ ဝဵင်းၸႄႈမိူင်းၼွင်

ၸုမ်းသိုၵ်းလေႃးလႄး ဢၼ် SSPP ဢွၼ်ႁူဝ်ဝႆႉၼၼ်ႉ ႁွင်ႉၵူၼ်းမိူင်းႁဵတ်းပၢင်ၵုမ် ၼႂ်းၸႄႈဝဵင်းလၢႆးၶႃႈ လႄႈ ၸႄႈဝဵင်းမိူင်းၼွင် ၸိုင်ႈတႆးပွတ်းၸၢၼ်း ဝႃႈၼႆ။

မိူဝ်ႈဝၼ်ထီႉ 7 April 2022 (လိူၼ်ႁႃႈမႂ်ႇ 7 ၶမ်ႈ ပီႊတႆး 2116 ၼီႈ) ယၢမ်း 09:00 မူင်း ၸုမ်းသိုၵ်းလေႃးလႄး ၶိင်းၵျေႃႇလႃႉ သိုၵ်း SSPP ဢွၼ်ဢဝ်ႁႅင်းသိုၵ်း 30 ၵေႃႉ မႃးဢဝ်ႁူမ်ႇလူမ်ႈသေ ႁွင်ႉၵူၼ်းမိူင်း ၼႂ်းဢိူင်ႇဝၢၼ်ႈၸေႈ လႄႈ ဢိူင်ႇဝၢၼ်ႈသၢင်း ၸႄႈဝဵင်းလၢႆးၶႃႈ ႁဵတ်းပၢင်ၵုမ် တီႈဝၢၼ်ႈမွၼ်း တႂ်ႈႁူမ်ႈမႆႉမၢၵ်ႇလၢင်း ထိုင်ယၢမ်း 11:00 မူင်းသေ မီးၽူႈၶိုၼ်ႈႁွတ်ႈတင်းမူတ်း 107 ၵေႃႉ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၶိင်းၵျေႃႇလႃႉ လႆႈလၢတ်ႈၵႂႃႇတီႈ ၼႂ်းပၢင်ၵုမ်ၼၼ်ႉဝႃႈ − 1. လွင်ႈယၢမ်ႈတူင်ႉၼိုင် ပွတ်းတွၼ်ႈဝၢၼ်ႈဢိူင်ႇၼႆႉ မိူဝ်ႈပၢၼ်ၸဝ်ႈမိူင်ႈၸိုၼ်ႈ၊ 2. ႁႂ်ႈတီႇၽဵဝ်ႈပၼ် ၸွမ်းတၢင်းၵႃး ဝၢၼ်ႈတေႃႇဝၢၼ်ႈ၊ 3. ၵဵဝ်ႇလွင်ႈၵၢၼ်ၶၢဝ်ႇငၢဝ်း တေဢမ်ႇလႆႈဢဝ်ၵႂႃႇဢုပ်ႇလၢတ်ႈ ၵႂႃႇတိူင်ႇတီႈလႂ်၊ 4. လွင်ႈၶွတ်ႇၽွတ်ႈၵၢၼ်ဢုပ်ႉ ပိူင်ႇတႄႉ ၸင်ႇၵွႆႈမႃးဢုပ်ႇၵုမ်ၵၼ်ထႅင်ႈပွၵ်ႈၼိုင်ႈ ဝႃႈၼႆ။

မိူၼ်ၼင်ႇၼၼ် ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈၼႂ်းၸႄႈဝဵင်းမိူင်းၼွင်ၼၼ်ႉ ၵေႃႈ ၸုမ်းသိုၵ်းလေႃးလႄး ၸဝ်ႈၸိင်ႇမိူင်း သိုၵ်း SSPP ႁွင်ႉၵူၼ်းမိူင်း ၼႂ်းဢိူင်ႇၼွင်ဢေ သေ ႁဵတ်းပၢင်ၵုမ် တီႈဝၢၼ်ႈၵျွင်း တႄႇယၢမ်း 10:00 မူင်း ထိုင် 12:00 မူင်းလႄႈ မီးၽူႈၶိုၼ်ႈႁွတ်ႈတင်းသဵင်ႈ 61 ၵေႃႉ ၼႂ်းပၢင်ၵုမ်ၼၼ်ႉ လႆႈလၢတ်ႈၵႂႃႇလွင်ႈ − 1. ယွၼ်းမိုတ်ႈၵိုဝ်းၸမ်ၸႂ်ပေႃႈမႄႈၵူၼ်းမိူင်း၊ 2. တွၼ်ႈတႃႇ သိုၵ်းသွင်မူႇ/ၸုမ်း တေဢမ်ႇလႆႈတိုၵ်းယိုဝ်းၵၼ်ၼၼ်ႉ ၵၢၵ်ႇသေႃးမၼ်း ယူႇတီႈပေႃႈမႄႈၵူၼ်းမိူင်း၊ 3. ၵဵဝ်ႇလူၺ်ႈလွင်ႈယၢပ်ႇၽိုတ်ႇ တႃႇပူၵ်းပွင်ၼႂ်းဝၢၼ်ႈ/ ဢိူင်ႇၼၼ်ႉ တေဢဝ်ပုၼ်ႈၽွၼ်းၸွႆႈထႅမ်ၵႂႃႇ ဝႃႈၼႆ။

တႆးလွတ်ႈလႅဝ်း