ၸုမ်းသိုၵ်းလေႃးလႄး SSPP တဵၵ်းၶၢၼ်းႁွင်ႉထူဝ်ႈၵႃးၵူၼ်းမိူင်းသေ ထႅမ်ႁႅင်းသိုၵ်း မုင်ႈၼႃႈၸူးပွတ်းၸၢၼ်းႁၢဝ်ႈႁႅင်း

ဝၢႆးသေပဵၼ်ပၢင်တိုၵ်းပွတ်းပိုၼ်ႉတီႈမိူင်းၼွင်၊ လၢႆးၶႃႈ ႁၢဝ်ႈႁႅင်းၼႆႉ ယူႇတီႈၸုမ်းသိုၵ်းလေႃးလႄး ဢၼ်ၸႂ်ႉတိုဝ်းမိၵ်ႈမၢႆ SSPP တဵၵ်းၶၢၼ်းႁွင်ႉဢဝ်ထူဝ်ႈ/ၵႃးၵူၼ်းမိူင်းသေ ထႅမ်ႁႅင်းမုင်ႈၼႃႈၸူး ပွတ်းတိုၵ်ႉပဵၼ်ပၢင်တိုၵ်းၼၼ်ႉႁၢဝ်ႈႁႅင်းဝႆႉ ၼႆယူႇ။.

မိူဝ်ႈၼႆႉ 14 April 2023 (လိူၼ်ႁႃႈလွင်ႈ 10 ၶမ်ႈ ပီႊတႆး 2117 ၼီႈ) ၵူၼ်းမိူင်းပိုၼ်ႉတီႈလၢႆးငၢၼ်းၶၢဝ်ႇၼႄဝႃႈ “ၼႂ်းဝၼ်းမိူဝ်ႈၼႆႉၵူၺ်း ၶူဝ်းၶဵဝ် SSPP လုၵ်ႉတီႈဝၢၼ်ႈလုၵ်းလိူဝ်ႇ၊ ၺွင်ႇသွႆႈ၊ ၼႃးမတ်းသေ ၸႂ်ႉၵႃးၵူၼ်းဝၢၼ်ႈသူင်ႇပၼ် ထိုင်ပွတ်းဝၢၼ်ႈသၢင်းလူင်ၼႆယဝ်ႉ ဢဵၼ်ႁႅင်းၸုမ်းသိုၵ်းလေႃးလႄးၶဝ် ‌တေမီးတႃႇၵႃး 3-4 လမ်းလႄႈ လႅပ်ႈတေထႅမ်ႁႅင်းၵႂႃႇတၢင်းပွတ်းၸၢၼ်း ပိုၼ်ႉတီႈပဵၼ်ပၢင်တိုၵ်းဝႆႉၼၼ်ႉထႅင်ႈယူႇ တူၺ်းတႄႉၵမ်ႈၽွင်ႈလုၵ်ႉတၢင်းသၢႆတႃႈတေႈၼၼ်ႉ ၶိုၼ်ႈမႃးၸူႉၵၼ်သေယဝ်ႉ မိူဝ်ႈၼႆႉ လုၵ်ႉတီႈဝၢၼ်ႈလုၵ်းလိူဝ်ႇ ၵႂႃႇတၢင်းဝၢၼ်ႈၼမ်ႉယၢဝ်း မိူဝ်းၸူး တၢင်းဝၢၼ်ႈသၢင်းလူင်ပူႇတႃႇ” ဝႃႈၼႆဝႆႉ။

ၼႂ်းဝၼ်းမိူဝ်ႈၼႆႉၵူၺ်းၼင်ႇၵဝ်ႇ ၵူၼ်းမိူင်းပွင်ႇၶၢဝ်ႇမႃးဝႃႈ “ၶမ်ႈဝႃးဝၼ်းထီႉ 13 April 2023 တၢမ်းၶမ်ႈၼႆႉ လႆႈႁၼ်သိုၵ်းဝ UWSA လုၵ်ႉၽၢႆႇၸၢၼ်း တၢင်ႉယၢၼ်းလူင်းမႃးပွတ်းႁၢႆးပႃ ထိုင်ပွတ်းမိူင်းၸၢင်သေ တေမုင်ႈၼႃႈၶဝ်ႈၸူးတၢင်း မိူင်းသွင်၊ ၼွင်တဝ်း၊ မိူင်းလိုမ်း ၸိူဝ်းၼႆႉ၊ သိုၵ်း ဝ UWSA ၸုမ်းၼႆႉ ပဵၼ် ဢၼ်ထႅမ်ႁႅင်းမႃးမႂ်ႇမႂ်ႇၵူၺ်း ဢဵၼ်ႁႅင်းတေမီးမွၵ်ႈ 200 ၵေႃႉသေ မႃးယွၼ်းၶဝ်ႈသၢၼ် ၵူၼ်းမိူင်းၼႂ်းဝဵင်းတၢင်ႉယၢၼ်း 1 ပွၵ်ႉလႂ် 300 ထူင် တေလႆႈသႂ်ႇဝၼ်းလႂ်ပႆႇႁူႉလႄႈ မုင်ႈၼႃႈၸူးဝၢၼ်ႈႁႆး ၵမ်းလဵဝ်ၼႆယူႇ၊ ၼွၵ်ႈလိူဝ်သေၼႆႉၵေႃႈ တေႃႈလဵဝ်ၼႆႉ မီးၶၢဝ်ႇမႃးထႅင်ႈဝႃႈၸုမ်း ဝ မႃးထႅမ်ႁႅင်းသိုၵ်း တီႈၶူဝ်ၼမ်ႉတွၼ် ႁိမ်းမၢၵ်ႇလၢင်းလၢႆးၶႃႈထႅင်ႈတႃႇၵႃး 5 လမ်း” ၼႆ ယူႇတီႈလႅင်ႇၶၢဝ်ႇၼႂ်းပိုၼ်ႉတီႈ လၢႆးငၢၼ်းၼႄၼင်ႇၼႆ။

လႆႈႁူႉမႃးထႅင်ႈဝႃႈ ၼႂ်းဝၼ်းထီႉ 14 April 2023 မိူဝ်ႈၼႆႉၵူၺ်း ယၢမ်းၵၢင်ၼႂ်ၸဝ်ႉၼၼ်ႉ ၸုမ်းလေႃးလႄးၶူဝ်းၶဵဝ် SSPP ၶဝ် ဢဝ်တၢႆၵူၼ်းဝၼ်ၵုင်းယိုဝ်ႉပွၵ်ႉတူၵ်း ၵူၼ်းၸၢႆး 3 ၵေႃႉ၊ မႄႈယိင်း 1 ၵေႃႉ ၵဵဝ်ႇလူၺ်ႈလွင်ႈၼႆႉ လၢႆးႁူဝ်ယွႆႈယမ်းမၼ်းတႄႉ ယူႇတီႈသိုဝ်ႇၶၢဝ်ႇတိုၵ်ႉလမ်းၸွမ်းယူႇ။

တႆးလွတ်ႈလႅဝ်း