ၸုမ်းသိုၵ်းလေႃးလႄး SSPP တဵၵ်းၸႂ်ႉၵူၼ်းမိူင်းတဝ်ထိူၼ်ႇ လႄႈယွၼ်းၶဝ်ႈယွၼ်းငိုၼ်းၵူၼ်းမိူင်း

မိူဝ်ႈဝၼ်းထီႉ 19 January 2025 ၶၢဝ်းယၢမ်း 18:40 မူင်း ၸုမ်းသိုၵ်းလေႃး SSPP ဢၼ်ၸၢႆးထုၼ်းဢူး ဢွၼ်ႁူဝ်သေ တူင်ႉၼိုင်ၼႂ်းဢိူင်ႇႁၢႆးသႅင် ၸႄႈဝဵင်းလၢႆးၶႃႈ တဵင်းယွၼ်းၶဝ်ႈသၢၼ်ၵူၼ်းမိူင်းလႄႈ ၶွတ်ႇၽွတ်ႈပၼ်ၵူၼ်းမိူင်း ႁႂ်ႈဢွၵ်ႇတူင်ႉၼိုင်ၸွမ်းၶႅပ်ႇဝၢၼ်ႈ တႃႇသွၵ်ႈႁႃၵေႃႉသိုၵ်းၵေႃႉႁၢၼ် RCSS/SSA လႄႈ မၢၵ်ႇမႅင်းၸိူဝ်းၼႆႉ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ  “သိုၵ်းၶူဝ်းၶဵဝ် SSPP ၶဝ် တဵၵ်းယွၼ်းၶဝ်ႈသၢၼ်ၵူၼ်းမိူင်း ၼပ်ႉႁူဝ်သိပ်းၸေႃးၶႃႈဢေႃႈ ၵေႃႉသၢင်ႉလူင်းၼႆႉ ပဵၼ်ၸၢႆးထုၼ်းဢူး ၸဝ်ႈၸႄႈဝဵင်းမၢႆ 39 ၼႆၶႃႈ ၸုမ်းၶဝ်ယွၼ်းမႃးၼႂ်းဢိူင်ႇႁၢႆးသႅင်ၼႆႉ တႃႇၶဝ်ႈသၢၼ် 10 ၸေႃးၼႆဢေႃႈ ယူႇၵမ်ႉၼိုင်ႈသမ်ႉၶိုၼ်းလၢတ်ႈဝႃႈ ၶဝ်ႈသၢၼ်တႃႇ 10 ၸေႃးၼၼ်ႉ ႁႂ်ႈၼပ်ႉပဵၼ်တူဝ်ငိုၼ်းသေဢၢပ်ႈပၼ်ၶဝ်ၼႆၶႃႈ ၵႃႈၶၼ်ၶဝ်ႈသၢၼ် ၼိုင်ႈၸေႃးၼႆႉ တူၵ်းမႅၼ်ႈသၢင်ႉငိုၼ်း 700,000 ပျႃး ပေႃး 10 ၸေႃးၵေႃႈ တူၵ်းယူႇ 7,000,000 (ၸဵတ်းသိပ်းသႅၼ်ပျႃး) ဢေႃႈ ယၢပ်ႇၸႂ်ၵူၼ်းမိူင်းႁဝ်းၶႃႈတႄႉ” လၢတ်ႈၼႄၼင်ႇၼႆ။

ၼႂ်းဢိူင်ႇႁၢႆးသႅင်ၼႆႉ တေမီးယူႇ 4 ဝၢၼ်ႈ ၼႂ်း 4 ဝၢၼ်ႈဢၼ်လႆႈသႂ်ႇပၼ်ၸုမ်း SSPP ၶဝ်ၼၼ်ႉ မိူၼ်းၼင်ႇ ဝၢၼ်ႈႁၢႆးသႅင် လႆႈသႂ်ႇပၼ်ၶဝ်ၶဝ်ႈသၢၼ် 2 ၸေႃး ငိုၼ်း 1,400,000 ပျႃး၊ ဝၢၼ်ႈလုၵ်း ၶဝ်ႈသၢၼ် 5 ၸေႃး ငိုၼ်း 3,500,000 ပျႃး၊ ဝၢၼ်ႈၼမ်ႉပွၵ်ႉ ၶဝ်ႈသၢၼ် 1 ၸေႃး ငိုၼ်း 700,000 ပျႃး၊ ဝၢၼ်ႈပၢင်ႇၵျွင်း ၶဝ်ႈသၢၼ် 2 ၸေႃး ငိုၼ်း 1,400,000 ပျႃး ၼႆယဝ်ႉ။

လႅင်ႇၶၢဝ်ႇၼႂ်းပိုၼ်ႉတီႈၵေႃႉၼိုင်ႈၵေႃႈ လၢတ်ႈၼႄထႅင်ႈဝႃႈ “လိူဝ်သေတဵၵ်းယွၼ်းၶဝ်ႈယွၼ်းငိုၼ်းၵူၼ်းမိူင်းယဝ်ႉ သိုၵ်းၶူဝ်းၶဵဝ် SSPP ၶဝ်ၼႆႉ ႁွင်ႉဢဝ်ၵူၼ်းမိူင်းၼႂ်းဢိူင်ႇ ၼႂ်းဝၢၼ်ႈ ၶွတ်ႇၽွတ်ႈယူႇၵိုၵ်းတွႆးၸွမ်းသိုၵ်းၶဝ်သေ ႁႂ်ႈသွၵ်ႈတဝ်ၸွမ်းၶႅပ်ႇဝၢၼ်ႈ လႄႈၼႂ်းထိူၼ်ႇၼႂ်းၶိူဝ်း ၶဝ်လၢတ်ႈၵူၼ်းမိူင်းဝႃႈသွၵ်ႈတဝ်ႁႃၵူၼ်းသိုၵ်း RCSS လႄႈၵူၼ်းၵၢင်မၢၵ်ႇမႅင်းၼႆၶႃႈ ယၢမ်းလဵဝ်ၼႆႉၵူၼ်းမိူင်း ဢၼ်ယူႇဢိူင်ႇႁၢႆးသႅင်ၼၼ်ႉ 3 ပုၼ်ႈၼႆႉ ၵိုတ်းဢမ်ႇလိူဝ်သေ 1 ပုၼ်ႈၵူၺ်းယဝ်ႉ ပိူၼ်ႈဢွၼ်ၵၼ်ပၢႆႈၵႂႃႇတၢင်ႇတီႈမူတ်းယဝ်ႉၶႃႈ” လၢတ်ႈၼင်ႇၼႆ။

ဢၼ်သိုၵ်းလေႃးလႄး SSPP ၶဝ် တဵၵ်းတဵင်ၵူၼ်းမိူင်း လႄႈယွၼ်းၶဝ်ႈယွၼ်းငိုၼ်းၵူၼ်းမိူင်းလူၼ်ႉလိူဝ်ၼႆႉ ဢမ်ႇၵွမ်ႉၵႃႈၼႂ်းၸႄႈဝဵင်းလၢႆးၶႃႈၵူၺ်း လၢႆလၢႆၸႄႈဝဵင်းၵေႃႈၺႃးၸိူင်ႉၼႆမိူၼ်ၵၼ် လိူဝ်သေၼၼ်ႉ ယၢမ်းလဵဝ်ၸွမ်းလၢၼ်ႇ ဢၼ်သိုၵ်းလေႃးလႄးၶဝ်ပႂ်ႉၼၼ်ႉၵေႃႈ ၵူတ်ႇထတ်းၵူၼ်းမိူင်းႁၢဝ်ႈႁႅင်း သင်ၶဝ်ထူပ်းႁၼ်ၶူဝ်းၶွင် မိူၼ်ၼင်ႇမၢၵ်ႇထၢၼ်ႇ (ထၢတ်ႈၶႄး) ၸိူဝ်းၼႆႉၵူၺ်းၵေႃႈ ၶဝ်တေဝႃႈၶူဝ်းၽိတ်းၼႆသေ တီႉၺွပ်းၵူၼ်းဝႆႉၵမ်းလဵဝ် ၼႆယဝ်ႉ။

တႆးလွတ်ႈလႅဝ်း