ၸုမ်းသိုၵ်းလေႃးလႄး SSPP ပွႆႇမၢၵ်ႇသႂ်ႇႁိူၼ်းၵူၼ်းမိူင်းလႄႈ ႁွင်ႈယႃတူဝ်ၵူၼ်းမိူင်း

တႄႇၼႂ်းႁူဝ်လိူၼ် January 2025 မႃးၼႆႉ ယွၼ်ႉၸုမ်းသိုၵ်းလေႃးလႄး ဢၼ်ၸႂ်ႉတိုဝ်းၶိူင်ႈမၢႆသိုၵ်း SSPP ဢဝ်ႁႅင်းသိုၵ်းၸွမ်းသွၵ်ႈတဝ် RCSS/SSA ဢမ်ႇၵိုတ်းဢမ်ႇလိုဝ်ႈလႄႈ သွင်ၽၢႆႇၸင်ႇလႆႈပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းၵႄႈၵၢင်ၼမ်ႉၸၢင်-လၢႆးၶႃႈၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ လႆႈပၢႆႈၽေးသိုၵ်းတင်းၼမ် ၼႆယူႇယဝ်ႉ။

မိူဝ်ႈယၢမ်းၵၢင်ၶမ်ႈ ၼႂ်းဝၼ်းထီႉ 15-16 January 2025 ၼၼ်ႉ ယူႇတီႈၸုမ်းသိုၵ်းလေႃးလေး SSPP ယိုဝ်းမၢၵ်ႇလူင် 60mm လႄႈ M100 ၶဝ်ႈၵႂႃႇၼႂ်းဝၢၼ်ႈၼမ်ႉမူဝ် ဢိူင်ႇၼွင်ႁီး ၸႄႈဝဵင်းၼမ်ႉၸၢင်သေ တိူဝ်ႉၺႃးႁိူၼ်းၵူၼ်းမိူင်း 4 လင် မိူၼ်ၼင်ႇ 1. ႁိူၼ်းလုင်းမွင်ႇ + ပႃႈမျႃႉ၊ 2.ႁိူၼ်းလုင်းဝီႉ + ပႃးလိုၼ်း၊ 3. ႁိူၼ်းၸၢႆးမွၼ်း + ၼၢင်းၶမ်းဢွင်ႇ၊ 4. ႁိူၼ်းၸၢႆးဢွင်ႇသႃႇ+ၼၢင်းသိုဝ်ႉ လႄႈမၢၵ်ႇတူၵ်းပႃးၼႂ်းဝၢင်းႁွင်ႈပၼ်ယႃၵူၼ်းမိူင်း မီးလွင်ႈလူႉၵွႆၸွမ်းၵမ်ႈၽွင်ႈ ၼႆယဝ်ႉ။

ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼႄဝႃႈ “ဢၼ်ၶဝ်ပွႆႇမၢၵ်ႇသႂ်ႇၼႂ်းဝၢၼ်ႈၼႆႉ ဢမ်ႇၵွမ်ႉၵႃႈတီႈဝၢၼ်ႈၼမ်ႉမူဝ်ၵူၺ်း မိူဝ်ႈၼႂ်းဝၼ်းထီႉ 15 January 2025 ၼၼ်ႉၵူၺ်းၼင်ႇၵဝ်ႇ ၶဝ်ဢဝ်တရူၼ်းမိၼ်ပွႆႇမၢၵ်ႇသႂ်ႇၼႂ်းဝၢၼ်ႈၵုင်းတီး 37 လုၵ်ႈဢေႃႈ ၵူၼ်းၼႂ်းဝၢၼ်ႈတႄႉ ဢွၼ်ၵၼ်ပၢႆႈဢွၵ်ႇဝၢၼ်ႈမူတ်းယဝ်ႉ မူႇဝၢၼ်ႈဢၼ်ၶဝ်ထၢင်ႇထိူမ်ဝႃႈ မီးသိုၵ်းၶူဝ်းလၢႆးယူႇၼၼ်ႉ ၶဝ်ပွႆႇမၢၵ်ႇသႂ်ႇတိၵ်းတိၵ်းယဝ်ႉ” လၢတ်ႈၼင်ႇၼႆ။

ၵူၼ်းမိူင်းၸိူဝ်းဢၼ်လႆႈပၢႆႈၽေးၼၼ်ႉ မီးယူႇ 7 ဝၢၼ်ႈ လင်ႁိူၼ်းဢမ်ႇယွမ်းမွၵ်ႈ 2 ပၢၵ်ႇလင် မိူၼ်ၼင်ႇ ဝၢၼ်ႈႁူဝ်ၶူဝ် 15 လင်ႁိူၼ်း၊ ဝၢၼ်ႈၼမ်ႉဢုတ်ႇ 9 လင်ႁိူၼ်း၊ ဝၢၼ်ႈသီႇၵွင် 13 လင်ႁိူၼ်း၊ ဝၢၼ်ႈၵုၼ်သၢႆး 31 လင်ႁိူၼ်း၊ ဝၢၼ်ႈပၢင်ႇ 13 လင်ႁိူၼ်း၊ ဝၢၼ်ႈၵုင်းတီး 17 လင်ႁိူၼ်း၊ ဝၢၼ်ႈၼမ်ႉမူဝ် 42 လင်ႁိူၼ်း လႄႈတေႃႇထိုင်ယၢမ်းလဵဝ်ၼႆႉ ၵူၼ်းမိူင်းတိုၵ်ႉဢွၼ်ၵၼ်ပၢႆႈယူႇဢမ်ႇထၢတ်ႇ ၵမ်ႈၼမ်ပၢႆႈၵႂႃႇတီႈၵျွင်းမုၼ်ၸဝ်ႈ ဝၢၼ်ႈသၢမ်ၶႃ ဢိူင်ႇၼွင်ႁီး၊ မၢင်ၸိူဝ်းသမ်ႉဢွၼ်ၵၼ် ပၢႆႈၶဝ်ႈၼႂ်းဝဵင်းၼမ်ႉၸၢင် ၵမ်ႈၽွင်ႈပၢႆႈၵႂႃႇမိူင်းထႆး ၼႆယဝ်ႉ။

ပၢင်တိုၵ်းၼႆႉလႆႈဝႃႈပဵၼ်ယူႇၵူႈဝၼ်းတေႃႇထိုင်ယၢမ်းလဵဝ် လႆႈႁူႉဝႃႈၽၢႆႇၸုမ်းသိုၵ်းလေႃးလႄးၶဝ် ၵဵပ်းဢဝ်ၸၢႆးငၢၼ်ဝၢၼ်ႈ ၼႂ်းပိုၼ်ႉတီႈၶဝ်သေသူင်ႇမႃးၼႃႈသိုၵ်း ယွၼ်ႉၼၼ်ႉဢၼ်လႆႈလူႉတၢႆမၢတ်ႇၸဵပ်းၵမ်ႈၼမ် တေပဵၼ်လုၵ်ႈမႄႈတႆးၵူၺ်း ၼႆယူႇယဝ်ႉ။

တႆးလွတ်ႈလႅဝ်း