ၸုမ်းသိုၵ်းလေႃးလႄး SSPP ၶႃႈႁႅမ်တၢႆၵူၼ်းမိူင်း တီႈၼႂ်းၸႄႈဝဵင်းမိူင်းၼွင်

ၸုမ်ႈသိုၵ်းလေႃးလႄး SSPP ဢၼ်တူင်ႉၼိုင်ယူႇၸွမ်း ၼႂ်းဢိူင်ႇဝၢၼ်ႈတူင်ႈ လူင်ယၢၼ်း ၽၢႆႇၸၢၼ်းဝဵင်းမိူင်းၼွင်ၼၼ်ႉ ၶႃႈႁႅမ်တၢႆပႅတ်ႈၵူၼ်းမိူင်း ဢၼ်ဢမ်ႇမီးတၢင်းၽိတ်းသင် ၼင်ႇမိူၵ်ႈမိူၵ်ႈလိူင်းလိူင်း ဝႃႈၼႆ။

မိူဝ်ႈၼႂ်းဝၼ်းထီႉ 10 April 2023 (လိူၼ်ႁႃႈလွင်ႈ 6 ၶမ်ႈ ပီႊတႆး 2117 ၼီႈ) ၼၼ်ႉ ၸုမ်းသိုၵ်းလေႃးလႄး တီႉၺွပ်းဢဝ်တူဝ် ၸၢႆးၺႃႇ ၵူၼ်းဝၢၼ်ႈၽၢႆမွင်ႉ ဢိူင်ႇဝၢၼ်ႈတူင်ႈ ၸႄႈဝဵင်းမိူင်းၼွင်သေ ၶႃႈႁႅမ်တၢႆပႅတ်ႈၼင်ႇမိူၵ်ႈလိူင်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းပိုၼ်ႉတီႈၵေႃႉၼိုင်ႈပိုတ်ႇလၢတ်ႈၼႄဝႃႈ “ၸႂ်ႈၶႃႈဢေႃႈ ႁဝ်းၶႃႈလႆႈငိၼ်းသဵင်ၵွင်ႈတႅၵ်ႇယူႇမွၵ်ႈ 2 ၵမ်းၸိူဝ်းၼႆႉဢေႃႈ ၵူၼ်းဝၢၼ်ႈၶဝ်တႄႉဢမ်ႇႁတ်းၵႂႃႇတူၺ်းၶႃႈ၊ ဝၢႆးမႃးၸင်ႇလႆႈႁူႉဝႃႈ ပဵၼ်ၸုမ်းၶူဝ်းၶဵဝ်ၶဝ် ၶႃႈႁႅမ်ၵူၼ်းဝၢၼ်ႈ လိူဝ်သေၼၼ်ႉယဝ်ႉ ၶဝ်လႆႈတီႉမတ်ႉၵႂႃႇပႃး ၵူၼ်းဝၢၼ်ႈထႅင်ႈၵေႃႉၼိုင်ႈ ၸိုဝ်ႈ ၸၢႆးမူးလိင်ႇ ၼႆဢေႃႈ” လၢတ်ႈၼႄၼင်ႇၼႆ။

ၸုမ်းသိုၵ်းလေႃးလႄး SSPP ဢၼ်တူင်ႉၼိုင်ပွတ်း မိူင်းၼွင်၊ လၢႆးၶႃႈ လႄႈ ထႅင်ႈလၢႆလၢႆပိုၼ်ႉတီႈၼႆႉ ၵႆႉတီႉၺွပ်းဢဝ်ပေႃႈမႄႈၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်ၸိူဝ်းၼၼ်ႉသေ ၵမ်ႈၽွင်ႈၵေႃႈ ၶိုၼ်းလွတ်ႈမႃးယူႇသေတႃႉ မၢင်ၵေႃႉတႄႉၺႃးၶဝ်ၶႃႈႁႅမ်တၢႆပႅတ်ႈၵေႃႈမီးၼႆယဝ်ႉ၊ လိူဝ်သေၼၼ်ႉဢမ်ႇၵႃး ၵူၼ်းမိူင်းလၢႆလၢႆပိုၼ်ႉတီႈၵေႃႈဢွၼ်ၵၼ်ၶၢင်းပွင်ႉ ယွၼ်ႉၸုမ်း SSPP ၶဝ်ၵဵပ်းသိုၵ်း၊ ၵဵပ်းၶွၼ်ႇၸိူဝ်းၼႆႉႁၢဝ်ႈႁႅင်းဝႆႉၼႆယဝ်ႉ။

တႆးလွတ်ႈလႅဝ်း