ၸုမ်းသိုၵ်း SSPP ထွၼ်သိုၵ်းပွတ်းႁွင်ႇသေ ၽိူမ်ႉဢဵၼ်ႁႅင်း ၶဵင်ႈၶႅင်ၸူး RCSS/SSA

ၸုမ်းသိုၵ်း SSPP ဢၼ်တူင်ႉၼိုင်ဝႆႉယူႇ ပွတ်းၼမ်ႉတူႈ မိူင်းယဵၼ် ၸိူဝ်းၼႆႉ ဢဝ်ႁႅင်းသိုၵ်းမုင်ႈၼႃႈၸူး ပိုၼ်ႉတီႉဢၼ်တပ်ႉသိုၵ်းၸိုင်ႈတႆး RCSS/SSA တူင်ႉၼိုင်ပၵ်းသဝ်းၼၼ်ႉႁၢဝ်ႈႁႅင်းလႄႈ သွင်ၽၢႆႇမီးလွင်ႈၶဵင်ႈၶႅင်ၵၼ်မၢင်ပိုၼ်ႉတီႈ ၼႆယဝ်ႉ။

မိူဝ်ႈဝၼ်းထီႉ 26 May 2024 (လိူၼ်ႁူၵ်းလွင်ႈ 4 ၶမ်ႈ ပီႊတႆး 2118 ၼီႈ) ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ “မိူဝ်ႈၼႆႉၶၢဝ်းယၢမ်း 12:00 မူင်းၼႆႉ ၸုမ်းသိုၵ်းၶူဝ်းၶဵဝ်ၶဝ် ဢၼ်မီးၸွမ်းၼမ်ႉတူႈ မိူင်းယဵၼ်ၼႆႉ ၶၢမ်ႈၶူဝ်တႃႈတေႈ မုင်ႈၼႃႈလူင်းပွတ်းၸၢၼ်းၼမ်ဝႆႉဢေႃႈ ဢဵၼ်ႁႅင်းၶဝ်တေမီးမွၵ်ႈ သွင်ပၢၵ်ႇၸိူဝ်းၼႆႉၶႃႈ ၶဝ်လၢတ်ႈတီႈၵူၼ်းမိူင်းတဵမ်သူပ်းတဵမ်ပၢၵ်ႇဝႃႈ ၶဝ်တေၵႂႃႇတိုၵ်းၸုမ်းၶူဝ်းလၢႆး ပွတ်းၵျႂၵ်ႉၵူႇဢၢင်ႇတေႃးၸိူဝ်းၼၼ်ႉၼႆၶႃႈ” လၢတ်ႈၼႄၼင်ႉၼႆ။

လိူဝ်သေၼၼ်ႉ ယင်းလႆႉႁပ်ႉႁူႉဝႃႈ တီႈငဝ်ႈငုၼ်းဝၢၼ်ႈႁႆး သင်ႇလူင်းႁႂ်ႈ သိုၵ်း SSPP ၸိူဝ်းတူင်ႉၼိုင်ဝႆႉယူႇ ပွတ်းၸႄႈဝဵင်းၼမ်ႉၶမ်း၊ ပၢင်ႇသၢႆး၊ သႅၼ်ဝီ၊ ၼမ်ႉတူႈ၊ မိူင်းယဵၼ်၊ တၢင်ႉယၢၼ်း ၸိူဝ်းၼႆႉ ႁႂ်ႈထွႆလူင်းမႃး တီႈငဝ်ႈငုၼ်းဝၢၼ်ႈႁႆးမူတ်းမူတ်းၼႆသေ ယၢမ်းလဵဝ်ၼႆႉ မႅၼ်ႈၽွင်းၶဝ်တေႃႉဢဵၼ်ႁႅင်းၶဝ်လူင်းယူႇၼႆယဝ်ႉ တေမီးၽႅၼ်ၵၢၼ်ၸိူင်ႉႁိုဝ်တႄႉ ပႆႇလၢမ်းလႆႈ။

ၵူၼ်းမိူင်းၼႂ်းပိုၼ်ႉတီႈဝၢၼ်ႈႁႆးၵေႃႉၼိုင်ႈၵေႃႈ ပွင်ႇၶၢဝ်ႇမႃးဝႃႈ “ၸုမ်းသိုၵ်းဝ UWSA သင်ႇႁႂ်ႈၵူၼ်းသိုၵ်း SSPP သႂ်ႇၶိူင်ႈမၢႆသိုၵ်းဝ UWSA တင်းမူတ်းသေ ႁႂ်ႈထူဝ်းသိုၵ်းၸူးပွတ်းၸၢၼ်း တိုၵ်းပႅတ်ႈတပ်ႉသိုၵ်းၸိုင်ႈတႆး RCSS/SSA ၼႆၶႃႈဢေႃႈ” လွင်ႈၵူၼ်းမိူင်းတီႈဝၢၼ်ႈႁႆး ပွင်ႇၶၢဝ်ႇမႃးပၼ်ၼႆႉ ၸႂ်ႈတႄႉႁႃႉဢမ်ႇၸႂ်ႈၼႆၼၼ်ႉ ၽၢႆႇတပ်ႉသိုၵ်းၸိုင်ႈတႆး တိုၵ်ႉသိုပ်ႇထတ်းၶေႃႈမုၼ်းဝႆႉယူႇ။

ဝၢႆးသေသွင်ၽၢႆႇၶိုၼ်းလႆႈမီးလွင်ႈတိုၵ်းယိုဝ်းၵၼ်ၶိုၼ်းၼႆႉ ႁဵတ်းႁႂ်ႈၵူၼ်းမိူင်းၸၢင်ၸႂ် ၼိူဝ်သိုၵ်းတႆးသွင်ၸုမ်းမႃး ၼႂ်းၽွင်းယၢမ်းငဝ်းလၢႆးမိူဝ်ႈလဵဝ်ၼႆႉ သိုၵ်းတႆးသွင်ၸုမ်း ၵိုင်ႇလီၽွမ်ႉၵၼ်ၵႅတ်ႇၶႄပၼ်ၵူၼ်းမိူင်း သမ်ႉဢွၼ်ပိူၼ်ႈမႃး ၶဵင်ႈတေႃႇၵၼ်ၶိုၼ်းၼႆႉ ဢမ်ႇထုၵ်ႇလီပဵၼ် ၼႆယဝ်။

တႆးလွတ်ႈလႅဝ်း