ၸုမ်းသိုၵ်း SSPP ဢထမ်ႇမတီႉၺွပ်းဢဝ်ၵူၼ်းမိူင်းႁၢဝ်ႈႁႅင်း ပွတ်းထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၶိင်းၵၢင်ႉၶိင်းႁဵင်ၵေႃႈဢမ်ႇဝႆႉၵိုတ်းလႄႈ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇဝႆႉ ဝႃႈၼႆ။

မိူဝ်ႈဝႃးဝၼ်းထီႉ 6 September 2022 (လိူၼ်သိပ်းမႂ်ႇ 12 ၶမ်ႈ ပီႊတႆး 2116 ၼီႈ) ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈပွင်ႇၶၢဝ်ႇမႃးဝႃႈ ၸုမ်းသိုၵ်း SSPP ၸိူဝ်းပၵ်းသဝ်းဝႆႉ ပွတ်းၸႄႈပွင်ႈ ၵုၼ်ႁဵဝ်း ထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ဢၼ်ၶုၼ်သိုၵ်း ဢေႃးတ လႄႈ ၶုၼ်ႁၢၼ် ပုင်ႇၺ ဢွၼ်ႁူဝ်ဝႆႉၼၼ်ႉ မႃးဢထမ်ႇမ တီႉၺွပ်းဢဝ်တူဝ် လုင်းပၢၼ်းသႃႇ ပူႇၵႄႇ (ၶိင်းၵၢင်ႉ) ဝၢၼ်ႈတွၼ်းၼေႇ လႄႈ ၵူၼ်းဝၢၼ်ႈၵူတ်ႉယူမ်း ၵေႃႉၼိုင်ႈ ၸိုဝ်ႈ ၸၢႆးၸိင်ႇပၢၼ်း ၵႂႃႇသေ တေႃႇထိုင်ယၢမ်းလဵဝ် ယင်းပႆႇပွႆႇပွၵ်ႈၶိုၼ်း ႁိူၼ်း ၼႆယဝ်ႉ။

ၵူၼ်းၼႂ်းပိုၼ်ႉတီႈလၢတ်ႈၼႄဝႃႈ “ဢၼ်ၶဝ်မႃးၺွပ်းၵႂႃႇၼႆႉ ပဵၼ်ယၢမ်းၵၢင်ၶိုၼ်း မွၵ်ႈ 20:00 မူင်း ၶမ်ႈဝႃးၶႃႈဢေႃႈ၊ ၶဝ်မႃးၺွပ်းဢဝ်ၶိင်းၵၢင်ႉ ၼႂ်းဝၢၼ်ႈတွၼ်းၼေႇ ၸိုဝ်ႈႁွင်ႉ လုင်းပၢၼ်းသႃႇ လႄႈ ၵူၼ်းဝၢၼ်ႈ တီႈၵူတ်ႉယူမ်းၼိုင်ႈၵေႃႉ ၸိုဝ်ႈႁွင်ႉၸၢႆးၸိင်ႇပၢၼ်းၶႃႈ၊ ယွၼ်ႉၶဝ်ၵဵပ်းသိုၵ်းမႂ်ႇ ဢမ်ႇလႆႈယဝ်ႉလႄႈ ၶဝ်မႃးၺွပ်းဢဝ်ၵူၼ်းလူင်ဝၢၼ်ႈ ၸိူဝ်းပဵၼ် ၽူႈမၢႆဝၢၼ်ႈ၊ ပူႇၵေႇပူႇၵၢင်ႉဝၢၼ်ႈ ၸိူဝ်းၼႆႉဢေႃႈ၊ ၵူၼ်းလူင်ဝၢၼ်ႈလၢႆလၢႆဝၢၼ်ႈၵေႃႈ လႆႈငိူင်ႉဝႄႈဝႆႉတင်းၼမ်ၶႃႈ” လၢတ်ႈၼင်ႇၼႆ။

လိူဝ်သေၼၼ်ႉ ယင်းသိုပ်ႇလၢတ်ႈဝႃႈ “မိူဝ်ႈဝၼ်းထီႉ 1 September 2022 ယၢမ်းၵၢင်ၶိုၼ်းမွၵ်ႈ 20:00 မူင်းပၢႆၼၼ်ႉၵေႃႈ  ၶဝ်ယွၼ်းၵူၼ်းဝၢၼ်ႈဢမ်ႇလႆႈလႄႈ ဢထမ်ႇမၺွပ်းဢဝ်တူဝ် လုင်းသု ၵေႃႉပဵၼ်ဢုၵ်ႉၵထ (ၶိင်းႁဵင်) ဢိူင်ႇၵွင်းမၢင်ႇ ၵႂႃႇသေ တေႃႇထိုင်ယၢမ်းလဵဝ်ၵေႃႈ ဢမ်ႇပႆႇပွႆႇမႃးၶိုၼ်းမိူၼ်ၵၼ်ၶႃႈ၊ ပွတ်းထုင်ႉၼမ်ႉပွင်ႈၼႆႉ ဝၢႆးသေၸုမ်းသိုၵ်းၶူဝ်းၶဵဝ်မႃးတူင်ႉၼိုင် တႄႇၸဵမ်မိူဝ်ႈပီႊ 2019 မႃး ၵူၼ်းမိူင်းၸိူဝ်းဢမ်ႇၶၢမ်ႇလႆႈ လွင်ႈတဵၵ်းတဵင်ၼၼ်ႉ ဢွၼ်ၵၼ်ပၢႆႈၶဝ်ႈ မိူင်းၶႄႇ၊ မိူင်းထႆး တင်းၼမ်ယဝ်ႉၶႃႈ” ၼႆယဝ်ႉ။

လႆႈႁူႉထႅင်ႈဝႃႈ ၼႂ်း 33 ၸႄႈဝဵင်း ဢၼ်သိုၵ်း SSPP ၶဝ်တူင်ႉၼိုင်ၼၼ်ႉ မီးၽႅၼ်ၵၢၼ် တေၵဵပ်းသိုၵ်းမႂ်ႇထႅင်ႈ ၼိုင်ႈၸႄႈဝဵင်းလႂ် ႁႂ်ႈလႆႈ 100 ၵေႃႉ၊ တီႈဢေႇသုတ်းႁႂ်ႈလႆႈ 60 ၵေႃႉလႄႈ သင်ဝႃႈဢမ်ႇလႆႈၼင်ႇၵူၼ်းလူင်ပႃႈၼိူဝ်သၢင်ႉလူင်းၼၼ်ႉၸိုင် ၸိူဝ်းပဵၼ် ၸဝ်ႈၸႄႈဝဵင်းၵေႃႈ တၵ်းတေလႆႈယိပ်းၵွင်ႈသေ ဢွၵ်ႇၼႃႈသိုၵ်း ၼႆယဝ်ႉ။

ၼႂ်းၸိုင်ႈတႆး ပွတ်းႁွင်ႇ လႄႈ ပွတ်းၸၢၼ်း လၢႆလၢႆပိုၼ်ႉတီႈၼႆႉ လႆႈထုၵ်ႇတင်း ၸုမ်းသိုၵ်းလေႃးလႄး ဢၼ်သိုၵ်း SSPP ဢွၼ်တူင်ႉၼိုင်ၼၼ်ႉ ပေႉၵိၼ်တဵၵ်းတဵင် ၵူၼ်းမိူင်း လႄႈ ၵဵပ်းသိုၵ်းမႂ်ႇ ၵဵပ်းၶွၼ်ႇ ႁၢဝ်ႈႁႅင်းဝႆႉ ၼႆယဝ်ႉ။

တႆးလွတ်ႈလႅဝ်း