ၸုမ်းသိုၵ်း SSPP ႁွင်ႉဢဝ်ၵူၼ်းၸၢႆး ၼႂ်းဢိူင်ႇႁမ်းငၢႆး ၵူႈလင်ႁိူၼ်းႁဵတ်းပၢင်ၵုမ်

မိူဝ်ႈဝႃးၼႂ်းဝၼ်းထီႉ 08 January 2025 ၸုမ်းသိုၵ်းၶူဝ်းၶဵဝ် SSPP  တူင်ႉၼိုင်ပွတ်းဢိူင်ႇႁမ်းငၢႆး ဢိူင်ႇပၢင်ႇၵေႇတု ၸႄႈဝဵင်းမိူင်းၵိုင်ၼၼ်ႉ ႁွင်ႉဢဝ်ၵူၼ်းဝၢၼ်ႈၵူႈလင်ႁိူၼ်း ႁဵတ်းပၢင်ၵုမ်သေ ထတ်းပႃးၼႂ်းၽူင်းၵူၼ်းမိူင်းၵူႈၵေႃႉ ၼႆယဝ်ႉ။

ၵူၼ်းမိူင်းၼႂ်းၸႄႈဝဵင်းမိူင်းၵိုင်ၵေႃႈၼိုင်ႈလၢတ်ႈၼႄဝႃႈ “ ၼႂ်းဢိူင်ႇႁမ်းငၢႆးၼႆႉ ၸုမ်းသိုၵ်းၶူဝ်းၶဵဝ်ၶဝ်ႁွင်ႉမႃး လင်ႁိူၼ်းၸိူဝ်းမီးၵူၼ်းၸၢႆးၼၼ်ႉ ႁႂ်ႈၵႂႃႇၸူႉၵၼ် တီႈဝတ်ႉၵျွင်းၵုင်းၸူင် ၵူႈၵေႃႉၵူႈလင်ႁိူၼ်းၼႆဢေႃႈ ၶဝ်လၢတ်ႈႁႂ်ႈဢဝ်ၽူင်းၽႂ်မၼ်းၵႂႃႇပႃး ၶဝ်တေထတ်း တူၺ်းၼႂ်းၽူင်း။ ဝၼ်းထီႉ 08 January 2025 ၶဝ်ထတ်းဢမ်ႇယဝ်ႉလႆႈလႄႈ မိူဝ်ႈၼႆႉဝၼ်းထီႉ 09 January 2025 ႁႂ်ႈၶိုၼ်းၵႂႃႇထႅင်ႈ။ တေထတ်းတူၺ်းဝႃႈ ၽႂ်ၵပ်းသိုပ်ႇၸူးသိုၵ်းRCSS/SSA ၸဵမ်ၸိူဝ်းၼႆႉၶႃႈ၊ မိူဝ်ႈပူၼ်ႉမႃးပႆႇႁိုင်သင်ၼႆႉ လၢတ်ႈႁႂ်ႈၵူၼ်းဝၢၼ်ႈတဝ်ထိူၼ်ႇ ပေႃးၽႂ်ႁၼ် သိုၵ်းRCSS/SSA ႁႂ်ႈပွင်ႇပၼ်သိုၵ်းၶူဝ်းၶဵဝ်ၼႆသေ တူဝ်ၶဝ်တႄႉ ဢမ်ႇပေႃးႁတ်းတဝ်ယဝ်ႉ ႁႂ်ႈၵူၼ်းဝၢၼ်ႈၵေႃႉတဝ်ၵူၺ်း။ ၸိူဝ်းပဵၼ်ပေႃႈမႄႈ ပီႈၼွင်ႉသိုၵ်းၶူဝ်းလၢႆးၸိူဝ်းၼႆႉၵေႃႈ ၶၢဝ်းတၢင်း 3 ဝၼ်း ႁႂ်ႈၶၢႆႉဢွၵ်ႇၼႂ်းပိုၼ်ႉတီႈၶဝ်မူတ်းမူတ်းၼႆၶႃႈ” လၢတ်ႈၼႄၼင်ႇၼႆ။

ၼႂ်းဝၼ်းလဵဝ်ၵၼ် ၵေႃႉပဵၼ်ၸၢႆးမၢဝ်း ပဵၼ်ၽူႈၵွၼ်းတပ်ႉႁူမ်ႇလူမ်ႈ ၸဝ်ႈသႅင်ဝ SSPP ပႃးတင်းၵူၼ်းသိုၵ်းသေ ႁွင်ႉဢဝ်ၵူၼ်းမိူင်း ၼႂ်းဢိူင်ႇပၢင်ႇၵေႇတု ၵူႈလင်ႁိူၼ်း ႁဵတ်းပၢင်ၵုမ် တီႈဝၢၼ်ႈၵုင်းၶမ်းသေ ၵူၼ်းၸိူဝ်း ၵႂႃႇၶိုၼ်ႈပၢင်ၵုမ်ၼၼ်ႉ ပေႃးပဵၼ်ၵူၼ်းယိင်းၵေႃႉၵႂႃႇၸိုင် ၸႂ်ႉပွၵ်ႈမိူဝ်းၶိုၼ်းသေ ႁႂ်ႈပဵၼ်ၵူၼ်းၸၢႆး ၵေႃႉၵႂႃႇလႄႈ ၼၼ်ႉၵေႃႈထတ်းပႃးၼႂ်းၽူင်းၵူႈၵေႃႉမိူၼ်ၵၼ်ၼႆယဝ်ႉ။

သိုပ်ႇလၢတ်ႈၼႄဝႃႈ “ယိူင်းဢၢၼ်းၶဝ်တႄႉ ၵူၼ်းၸၢႆးပေႃးဢႃႇယူႉပႆႇပူၼ်ႉ 50 ၸိုင် ၶဝ်တေဢၢၼ်းဢဝ်သွၼ်ၵၢၼ်သိုၵ်းၵူႈၵေႃႉၼႆဢေႃႈ ၶဝ်ယင်းပၢႆဝႃႈပေႃးသဵင်ၵွင်ႈတႅၵ်ႇမႃးၸိုင် ၵူၼ်းမိူင်းၵူႈၵေႃႉ တေလႆႈၶဝ်ႈပၢင်တိုၵ်းၼႆၶႃႈ လိူဝ်ၼၼ်ႉၶဝ်ယွၼ်းပႃးသဵၼ်ႈမၢႆၸိူဝ်းပဵၼ်ပေႃႈမႄႈပီႈၼွင်ႉသိုၵ်းၶူဝ်းလၢႆးၸိူဝ်းၼႆႉဢေႃႈ” ဝႃႈၼႆ။

ၵူၼ်းမိူင်းၼႂ်းဢိူင်ႇႁူဝ်ၶၢႆး၊ ႁမ်းငၢႆး၊ ဢိူင်ႇပၢင်ႇၵေႇတု၊ ဢိူင်ႇဝၢင်ႈမိူင်း ၸိူဝ်းၼႆႉ ၵမ်းၵမ်းထုၵ်ႇတင်းၸုမ်းသိုၵ်းၶူဝ်းၶဵဝ် SSPP ႁွင်ႉပၢင်ၵုမ်လႄႈ ၵဵပ်းၶဝ်ႈၵဵပ်းငိုၼ်း ၵဵပ်းသိုၵ်း ဢမ်ႇထၢတ်ႇဢမ်ႇဝၢႆးၼႆယဝ်ႉ။

တႆးလွတ်ႈလႅဝ်း