ၸုမ်း G-7 ယိုၼ်ယၼ် တေသိုပ်ႇၵမ်ႉၸွႆႈၽၢႆႇယူႇၶရဵၼ်း

ဝၢႆးသေရၢတ်ႉသျႃး ယိုဝ်းမၢၵ်ႇမိတ်ႉသႆးသႂ်ႇ လၢႆလၢႆဝဵင်းလူင် ႁူမ်ႈထိုင် ဝဵင်းလူင် Kyiv လႄႈတေလႆႈဝႃႈ ၸွတ်ႇတူဝ်ႈၵႂႃႇၵူႈတၢင်း ၼႂ်းမိူင်းယူႇၶရဵၼ်းၼၼ်ႉ  ၸုမ်း G-7 ဢွၵ်ႇမႃးယိုၼ်ယၼ်လၢတ်ႈဝႃႈ တေသိုပ်ႇၵမ်ႉယၼ်ၸွႆႈထႅမ်ၵူႈလွင်ႈလွင်ႈ ပၼ်ယူႇၶရဵၼ်း ဝႃႈၼႆ။

ဝၢႆးသေၸုမ်း G-7 ၸတ်းႁဵတ်းပၢင်ၵုမ်တၢင်းဢွၼ်ႇလၢႆး ယဝ်ႉၵႂႃႇၼၼ်ႉ လုၵ်ႈၸုမ်း G-7 ဢွၵ်ႇပိုၼ်ၽၢဝ်ႇႁူမ်ႈၵၼ်ဝႃႈ ႁဝ်းတေသိုပ်ႇၸွႆႈထႅမ်ယူႇၶရဵၼ်း မိူၼ်ၼင်ႇ ငိုၼ်းတွင်း၊  ၽၢႆႇတၢင်းသုၼ်ႇလႆႈသုၼ်ႇပဵၼ်ၵူၼ်း၊ ၽၢႆႇၵၢၼ်သိုၵ်း၊ ၽၢႆႇၽွင်းတၢင်၊ ၸဵမ်ပၵ်းပိူင်မၢႆမီႈ လႄႈ ယိုၼ်ယၼ်ဝႃႈ တေသိုပ်ႇယူႇ ၽၢႆႇယူႇၶရဵၼ်းၵႂႃႇၵူႈၶၢဝ်းယၢမ်း၊ သိုပ်ႇလၢတ်ႈပၼ်ၵႂၢမ်းမၼ်ႈတေႃႇ ၸွမ်ၸိုင်ႈ သေႇလႅၼ်ႇသၵီႇ ဝႃႈ ၸွမ်းၼင်ႇယူႇၶရဵၼ်း ၶႂ်ႈလႆႈၶႂ်ႈပဵၼ်ၼၼ်ႉ ၸုမ်း G-7 ၽွမ်ႉတူဝ်ႈတၼ်း တႃႇယိုၼ်းမိုဝ်းၸွႆႈပၼ်ယူႇၶရဵၼ်းၵူႈလွင်ႈလွင်ႈ ဝႃႈၼႆ။

သိုပ်ႇပိုၼ်ၽၢဝ်ႇၵႂႃႇ လွင်ႈရၢတ်ႉသျႃး ယိုဝ်းမၢၵ်ႇမိတ်ႉသႆးသႂ်ႇ လၢႆလၢႆဝဵင်းလူင် ၼႂ်းယူႇၶရဵၼ်းၼၼ်ႉ တေလႆႈဝႃႈ ၽိတ်းၾိင်ႈပၢင်တိုၵ်းတေႉတေႉ၊ တေလႆႈဝႃႈ ပဵၼ်ၽူႈၵေႃႇၵၢၼ်ႁၢႆႉၵူၺ်း၊ ႁဝ်းတေ ႁဵတ်းႁႂ်ႈ ၸွမ်ၸိုင်ႈ ဝႃႇလႃႇတီႇမီရ်ႇ ပူႇတိၼ်ႇ လႄႈ ၵူႈၵေႃႉဢၼ်ၸွႆႈၵၼ်ဢွၵ်ႇပၢႆးဝူၼ်ႉ ယိုဝ်းမၢၵ်ႇမိတ်ႉသႆးၼၼ်ႉ တေလႆႈႁပ်ႉဢဝ်ၽွၼ်းႁၢႆႉၸႃႉမၼ်းၶိုၼ်းၵူႈၵေႃႉ ဝႃႈၼႆ။

လိူဝ်သေၼၼ်ႉ ၸုမ်း G-7 သၢၼ်ၶတ်းလွင်ႈႁဵတ်းလွင်ႈသၢင်ႈရၢတ်ႉသျႃး မိူၼ်ၼင်ႇ လွင်ႈၵဵပ်းႁွမ်သိုၵ်းမႂ်ႇ လႄႈ ဢဝ်မၢၵ်ႇၼိဝ်းၶလီးယႃး မႃးလွၵ်ႇငိူတ်ႈ ၸဵမ်ၸိူဝ်းၼႆႉ ႁဵတ်းႁႂ်ႈလုမ်ႈၾႃႉႁဝ်း ဢမ်ႇမီးလွင်ႈလွတ်ႈၽေး ၸုမ်း G-7 ယိုၼ်ယၼ်ဝႃႈ သင်ရၢတ်ႉသျႃး ၸႂ်ႉမၢၵ်ႇၼိဝ်းၶလီးယႃး လႄႈ Biological weapons, chemical weapons မၢၵ်ႇသႅၼ်းလႂ်ၵေႃႈယဝ်ႉ သင်မီးၽွၼ်းတုမ်ႉယွၼ်ႈႁၢဝ်ႈႁႅင်း ပေႃးၼႆၸိုင် ရၢတ်ႉသျႃး တေလႆႈထူပ်းလွင်ႈတုမ်ႉတွပ်ႇၶိုၼ်းႁၢဝ်ႈႁႅင်းမိူၼ်ၵၼ် ဝႃႈၼႆ။

တႆးလွတ်ႈလႅဝ်း