ၸုမ်း G7 တုၵ်ႉယွၼ်းႁႂ်ႈရၢတ်ႉသျႃး ထွၼ်သိုၵ်းဢွၵ်ႇၼႂ်းမိူင်းယူႇၶရဵၼ်းၵမ်းလဵဝ်

မိူဝ်ႈဝႃး ဝၼ်းထီႉ 17 April 2023 (လိူၼ်ႁႃႈလွင်ႈ 13 ၶမ်ႈ ပီႊတႆး 2117 ၼီႈ) ၸုမ်း G7 လႆႈႁဵတ်းပၢင်ၵုမ်ၵၼ်တီႈၼႂ်းမိူင်းၵျႃႇပၢၼ်ႇသေ ႁူမ်ႈၵၼ်သပ်းၸႅင်ႈၶၢဝ်ႇ ႁႂ်ႈရၢတ်ႉသျႃး ထွၼ်သိုၵ်းလႄႈ ၶိူင်ႈယိပ်းၵွင်ႈၵၢင်ႇတင်းမူတ်း ဢွၵ်ႇၼႂ်းမိူင်းယူႇၶရဵၼ်းၵမ်းလဵဝ် ဝႃႈၼႆ။

ၼွၵ်ႈလိူဝ်သေၼႆႉ တီႈၼႂ်းပၢင်သပ်းၸႅင်ႈၶၢဝ်ႇၼၼ်ႉ ယင်းလႆႈမီးၶေႃႈသေႉသွမ်း တေႃႇ ၶေႃႈပိုၼ်ၽၢဝ်ႇၶွင် ၸွမ်ၸိုင်ႈရၢတ်ႉသျႃး ပူႇတိၼ်ႇ လွင်ႈတေတိတ်းတင်ႈ ၶိူင်ႈယိပ်းၼိဝ်းၶလီးယႃး တီႈၼႂ်းမိူင်းပေႇရႃႇရုတ်ႉ သေဢမ်ႇၵႃး ယင်းလႆႈယိုၼ်ယၼ် ထႅင်ႈဝႃႈ လွင်ႈရၢတ်ႉသျႃး ဢမ်ႇမေႃႁပ်ႉဢဝ်ပုၼ်ႈၽွၼ်း ၵဵဝ်ႇလူၺ်ႈၶိူင်ႈ ယိပ်းၼိဝ်းၶလီးယႃးၼၼ်ႉ ပဵၼ်လွင်ႈတၢင်းဢၼ်ယွမ်းႁပ်ႉဢမ်ႇလႆႈ ဝႃႈၼႆ။

မိူဝ်ႈပူၼ်ႉမႃးၼၼ်ႉၵေႃႈ ရၢတ်ႉသျႃး ယၢမ်ႈပဵၼ်ၽူႈၶဝ်ႈၸုမ်း G8 ၵူၺ်းၵႃႈ ထုၵ်ႇ လိုပ်ႈဢွၵ်ႇပႅတ်ႈ မိူဝ်ႈၼႂ်းပီႊ 2014 ဝၢႆးသေရၢတ်ႉသျႃး လႆႈဢဝ်ပွတ်းတွၼ်ႈ Crimea ၶဝ်ႈပဵၼ်ပွတ်းဢွၼ်ႇတွၼ်ႈၼိုင်ႈၶွင်မိူင်းရၢတ်ႉသျႃးၼၼ်ႉ ဝႃႈၼႆ။

ၼႂ်းဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ ၽူႈမီးပုၼ်ႈၽွၼ်းၸၼ်ႉသုင် ၼႂ်းႁွင်ႈၵၢၼ်လူင်ၽၢႆႇၼွၵ်ႈမိူင်း မိူင်းဢမေႇရိၵၢၼ်ႇ လၢတ်ႈတီႈၽူႈသိုဝ်ႇၶၢဝ်ႇဝႃႈ တီႈၼႂ်းပၢင်ၵုမ်ၸုမ်း G7 ၼၼ်ႉ လႆႈၸႂ်ၵၼ်သေ ယွမ်းႁပ်ႉဝႃႈ ၶႄႇတေႁဵတ်းၸွမ်းၶေႃႈမၼ်ႈၵႅၼ်ႇ ဢၼ်ပၼ်ဝႆႉတေႃႇ ၵူၼ်းမိူင်းၼႂ်းလုမ်ႈၾႃႉလႄႈ မိူင်းလႂ်မိူင်းၼၼ်ႉဝႃႈ တေဢမ်ႇၸတ်းႁႃၶိူင်ႈယိပ်းပၼ်ရၢတ်ႉသျႃးၼၼ်ႉ ဝႃႈၼႆ။

တႆးလွတ်ႈလႅဝ်း