ၸွမ်သိုၵ်းလူင်ယွတ်ႈသိုၵ်း ၶဝ်ႈႁူမ်ႈပွႆးလူင်းပၢင်သွၼ်လိၵ်ႈတႆး ပီႊ2024 တီႈ ၸႄႈတွၼ်ႈၵဵင်းမႆႇ ၸိုင်ႈထႆး

မိူဝ်ႈၼႆႉ ဝၼ်းထီႉ 8 September 2024 ( လိူၼ်သိပ်းမႂ်ႇ 6 ၶမ်ႈ ပီႊတႆး 2118 ၼီႈ ) ယၢမ်း 13:00 မူင်းယူႇတီႈႁွင်ႈၵၢၼ်လူင်ပၢႆးပၺ်ႇၺႃႇလႄႈ ႁွင်ႈၵၢၼ်လူင်တိတ်းတေႃႇထႆး လႆႈႁူမ်ႈမိုဝ်းၵၼ်သေ ၸတ်းႁဵတ်းပၢင်သွၼ်လိၵ်ႈတႆး လၢႆလၢႆပိုၼ်ႉတီႈမိူၼ်ၼင်ႇ ဝတ်ႉသီပူဝ်းငိုၼ်း ၊ ဝၢၼ်ႈပူင်ႇယဵင်း ၊ ဝၢၼ်ႈမႂ်ႇတႆးမၼ်ႈၵိုမ်း ၸေႈတွၼ်ႈၵဵင်းမႆႇ လႄႈ ဝတ်ႉသၼ်ပႃႇႁဵင် လမ်းပုၼ်း  ၸိုင်ႈထႆး ဝႃႈၼႆ။

ပွႆးလူင်းပၢင်သွၼ်ၼႆႉ လႆႈၸတ်းႁဵတ်းၵႂႃႇတီႈ ဝတ်ႉၵူႇမၼ်ႈမူင်းၶူၼ်းသျႆး  ၵဵင်းမႆႇ မီးႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင်ယွတ်ႈသိုၵ်း လႄႈ ၽူႈၸတ်းၵၢၼ် ႁွင်ႈၵၢၼ်လူင်တိတ်းတေႃႇထႆး ၊ ၽူႈၸတ်းၵၢၼ် ႁွင်ႈၵၢၼ်လူင်ပၢႆးပၺ်ႇၺႃႇ ဢိၵ်ႇပႃးၽူႈယႂ်ႇၵူၼ်းလူင်လၢႆလၢႆၸဝ်ႈလႄႈ ပီႈၼွင်ႉၶႅၵ်ႇ၊ ပေႃႈမႄႈလုၵ်ႈႁဵၼ်း ၶဝ်ႈႁူမ်ႈပၼ်ႁႅင်းၵႂႃႇ ယူႇယဝ်ႉ ။

ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈၶေႃႈ ၵႂၢမ်းဝႃႈ  1.လိၵ်ႈလၢႆးၼႆႉမိူၼ်ပဵၼ်ၾႆးတဵၼ်း ဢၼ်ၼိုင်ႈ ႁဝ်းယူႇတီႈလႂ်ၵေႃႈ ဢမ်ႇလပ်းသိင်ႇ သင်ၽႂ်ဢမ်ႇမေႃလိၵ်ႈလၢႆးၵေႃႈ တေပဵၼ်ၵူၼ်းတူၵ်းလိုၼ်း၊ 2. ႁဝ်းမႃးယူႇၼႂ်းၽႅၼ်ႇလိၼ်ၸိုင်ႈထႆး မႃးပိုင်ႈဢိင်ၼႂ်းမိူင်းပိူၼ်ႈ ႁႂ်ႈမေႃၼပ်ႉယမ်ပၵ်းပိူင် ႁဝ်းယႃႇပေယူႇလိူင်း ၊ 3. ၸိူဝ်ႉမူင်ႈၵေႃႈမူင်ႈပႅင်း ၸိူဝ်ႉမႅင်းၵေႃႈမႅင်းႁၵ်ႉ ႁဝ်းလူဝ်ႇမေႃႁၵ်ႉၶိူဝ်း ယူႇတီႈလႂ်ၵေႃႈယႃႇလိုမ်းၶိူဝ်းႁဝ်း ယႃႇလိုမ်းမိူင်းႁဝ်း ၼႆယဝ်ႉ ။

ဝၢႆးသေၼၼ်ႉ ႁူဝ်ပဝ်ႈလူင် ၸင်ႇလႆႈယိုၼ်ႈမွပ်ႈဢၢပ်ႈပၼ် ဝႂ်ၽူႈမီးၼမ်ႉၸႂ်ၵမ်ႉၸွႆႈပၢႆးပၺ်ႇၺႃႇ ဢိၵ်ႇပႃး ယိုၼ်ႈမွပ်ႈပၼ်ဝႂ်ယုၵ်ႉယွင်ႈၼမ်ႉၸႂ်ၶူးသွၼ် လႄႈ လုၵ်ႈႁဵၼ်းသေ ထႆႇၶႅပ်းႁၢင်ႈႁူမ်ႈၵၼ်ပဵၼ်တီႈ မၢႆတွင်း လႄႈ ပၢင်လူင်းၵၢၼ်သွၼ်ယဝ်ႉတူဝ်ႈၵႂႃႇ ယူႇယဝ်ႉ ။

တႆးလွတ်ႈလႅဝ်း