ၸၢင်ႈတေမီးလူမ်းလႅင်ႉ ၽူၼ်လူမ်းၶၢဝ်းမႆႈၼႂ်းမိူင်းတႆးထႅင်ႈ

မိူဝ်ႈဝႃးဝၼ်းထီႉ 21 April 2020 (လိူၼ်ႁႃႈလပ်း ပီႊတႆး 2114 ၼီႈ) ႁွင်ႈၵၢၼ်ၾိင်ႈၾႃႉရႃႇသီႇ မိူင်းႁူမ်ႈတုမ် ဢွၵ်ႇလိၵ်ႈပၼ်ၾၢင်ႉဝႆႉဝႃႈ ၸၢင်ႈတေမီးၽူၼ်လူမ်းလႅင်ႉၶၢဝ်းမႆႈၽတ်ႉၶဝ်ႈၼႂ်းမိူင်းတႆးထႅင်ႈၼႆယဝ်ႉ။

ယွၼ်ႉဝႃႈမီးလူမ်းလႅင်ႉဢၼ်ၽတ်ႉၶဝ်ႈမႃးတင်းတူၵ်းလႄႈ တၢင်းဢွၵ်ႇမိူင်းႁူမ်ႈတုမ်ၼၼ်ႉသေ ၽူၼ်တေ ၸၢင်ႈတူၵ်း ၼႂ်းဝၼ်းထီႉ 24 April 2020 တေႃႇပေႃးထိုင် ဝၼ်းထီႉ 29 April 2020 (လိူၼ်ႁူမ်းမႂ်ႇ 3 ၶမ်ႈထိုင် လိူၼ်ႁူၵ်းမႂ်ႇ 8 ၶမ်ႈ ပီႊတႆး 2114 ၼီႈ) ၼႆယဝ်ႉ။

လူမ်းလႅင်ႉၸၢင်ႈတေၽတ်ႉၶဝ်ႈ ၼႂ်းမိူင်းတႆး၊ မိူင်းၶၢင်၊ မိူင်းၶျၢင်း၊ မိူင်းယၢင်း၊ မိူင်းယၢင်းလႅင်၊ မိူင်းမွၼ်း၊ မိူင်းရၶႅင်ႇ၊ တိူင်းၸႄႈၵႅင်း၊ တိူင်းတၼိၼ်းသႃႇရီႇ၊ တိူင်းဢႄႇရႃႇဝတီႇ၊ တိူင်းပႃႇၵိူဝ်လႄႈ တိူင်းတႃႈၵုင်ႈ ၸိူဝ်းၼႆႉဝႃႈၼႆ။

ၵူၺ်းၵႃႈ ဢၼ်ၽူၼ်တူၵ်းၼႂ်းမိူင်းတႆးၼႆႉ ဢမ်ႇၸႂ်ႈလႄႈဝႃႈ တေတူၵ်းတူဝ်ႈတင်းမိူင်းတႆး၊ တေတူၵ်းပဵၼ် ယွမ်ႇယွမ်ႇသေ ၵမ်ႈပႃႈၼမ်တေပဵၼ်ပိုၼ်ႉတီႈ ဢၼ်ၵႆႉမီးလူမ်းမႆႈႁႅင်းလႄႈ ၾႃႉငိုပ်းၾႃႉၵၢမ်ႈၼၼ်ႉၵူၺ်း ဝႃႈၼႆ။

လိူဝ်သေၽူၼ်တူၵ်းယဝ်ႉ ၸၢင်ႈတေမီးပႃး လူမ်းလႅင်ႉ၊ မၢၵ်ႇႁဵပ်းတူၵ်း ၊ ၾႃႉၽႃႇၾႃႉမႅပ်ႈၸိူဝ်းၼႆႉပႃး၊ ယွၼ်ႉဝႃႈပဵၼ်ၽူၼ်လူမ်းၶၢဝ်းမႆႈလႄႈ ၶၢဝ်းယၢမ်းၽူၼ်တူၵ်းတႄႉ တေဢမ်ႇပေႃးႁိုင်ၼင်ႇၵဝ်ႇ၊ ၵူၺ်းၵႃႈ ဢမ်ႇလႆႈႁူႉဝႃႈ ၽူၼ်လူမ်းတေမႃးၶၢဝ်းလႂ်လႄႈ ႁႂ်ႈလႆႈဢွၼ်ၵၼ်ႁၢင်ႈႁႅၼ်းတူဝ်ႈတၼ်းဝႆႉၽွင်ႈၼႆယဝ်ႉ။

မိူဝ်ႈပူၼ်ႉမႃး ဝၼ်းထီႉ 15 April 2020 (လိူၼ်ႁႃႈလွင်ႈ 8 ၶမ်ႈ ပီႊတႆး 2114 ၼီႈ) ၼၼ်ႉၵေႃႈ ယွၼ်ႉလူမ်းလႅင်ႉၶၢဝ်းမႆႈၽတ်ႉၶဝ်ႈ၊ ၽူၼ်တူၵ်းပႃးမၢၵ်ႇႁဵပ်းလႄႈ ႁဵတ်းႁႂ်ႈမၢၵ်ႇၶဝ်ႈတဝ်ႈၼမ်ႉ ၶူဝ်းၽုၵ်ႇသွမ်ႈၵူၼ်းမိူင်း တီႈဝၢၼ်ႈလႅတ်ႉပၢၼ်ႇၵူင်း (ၵုင်းၼိဝ်ႉ) ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ လႆႈလူႉသုမ်းတင်းၼမ်ဝႃႈၼႆ။

တႆးလွတ်ႈလႅဝ်း