ၸၢတ်ႈၸိုင်ႈလုမ်ႈၾႃႉဝႃႈ ၵူၼ်းမိူင်းတူဝ်ႈလုမ်ႈၾႃႉ 345 လၢၼ်ႉ ၵပ်ႉၵိၼ်းဢိုပ်းၶဝ်ႈၼမ်ႉတၢင်းၵိၼ်

မိူဝ်ႈဝၼ်းထီႉ 8 July 2022(လိူၼ်ပႅတ်ႇမႂ်ႇ 11ၶမ်ႈ ပီႊတႆး 2116 ၼီႈ)  David Beasley ၽူႈၸတ်းၵၢၼ် ၶဝ်ႈၼမ်ႉတင်းၵိၼ်လုမ်ႈၾႃႉ ဢမ်ႇၼၼ် WFP လႆႈပိုၼ်ၽၢဝ်ႇဝႃႈ “ၽွင်းယၢမ်းတေႃႈလဵဝ် ၵူၼ်းမိူင်းတူဝ်ႈလုမ်ႈၾႃႉ 345 လၢၼ်ႉၵေႃႉ ၵပ်ႉၵိၼ်း ဢိုပ်းၶဝ်ႈၼမ်ႉတၢင်းၵိၼ်ႁၢဝ်ႉႁႅင်းဝႆႉ၊  ပဵၼ်ႁူဝ်ၼပ်ႉၵူၼ်းၵပ်ႉၵိၼ်းဢိုပ်း ယၢၵ်ႈၶဝ်ႈၼမ်ႉတင်းၵိၼ်ၼမ်လိူဝ်ပိူၼ်ႈ တႄႇၸဵမ်မိူဝ်ႈ COVID-19 ပေႃႇမႃးဝႃႈၼႆ။

David Beasley သိုပ်ႇလၢတ်ႈတေႃႇၼႂ်းလၢႆလၢႆ ႁွင်ႈၵၢၼ်ၸၢတ်ႈၸိုင်ႈလုမ်ႈၾႃႉထႅင်ႈဝႃႈၵဵဝ်ႇလူၺ်ႈႁူဝ်ၼပ်ႉၵူၼ်း လုမ်ႈၾႃႉ လႆႈၵပ်ႉၵိၼ်း ဢိုပ်းယၢၵ်ႈၶဝ်ႈၼမ်ႉတင်းၵိၼ်တေလူတ်းလူင်းၵႂႃႇလူဝ်ႇႁႃတၢင်းဢွၵ်ႇႁူမ်ႈၵၼ်ၼႆသေလႆႈပၼ်ၾၢင်ႉပႃးဝႃႈ ထႅင်ႈလၢႆလိူၼ်တၢင်းၼႃႈၼႆႉ တေမီးၵူၼ်း ၵပ်ႉၵိၼ်းဢိုပ်းၶဝ်ႈၼမ်ႉတၢင်းၵိၼ် တိူဝ်းၼမ်ၶိုၼ်ႈ ထိုင် 50 လၢၼ်ႉၵေႃႉၼႂ်း 45 ၸိုင်ႈမိူင်း ၊ ဢၼ်တေၵပ်ႉၵိၼ်း ၼႃႇသေပိူၼ်ႈသမ်ႉ ပဵၼ် ဢၢပ်ႉၾရိၵ ဝႃႈၼႆ။

ဝၢႆးသေၼၼ်ႉၸၢတ်ႈၸိုင်ႈလုမ်ႈၾႃႉပိုၼ်ၽၢဝ်ႇဝႃႈ ဝၢႆးသေ COVID-19 လႄႈ ပၢင်တိုၵ်းယူႇၶရဵၼ်း ပေႃႇပဵၼ်မႃးယဝ်ႉ ၵူၼ်းၵပ်ႉၵိၼ်း ၶဝ်ႈၼမ်ႉတင်းၵိၼ် ၵေႃႈၼမ်ၶိုၼ်ႈမႃး ဢမ်ႇထၢတ်ႇဢမ်ႇဝၢႆး တေလႆႈဝႃႈ ပဵၼ်လွင်ႈၶဵင်ႇတႃႉတႄႉတႄႉ ဝႃႈၼႆ။

David Beasley လႆႈတုၵ်းယွၼ်း ႁႂ်ႈတင်ႈငိုၼ်းၵွင်ၵၢင် တႃႇၼႄပဵၼ်ၵၢၼ်ၵမ်ႉၸွႆႈၸိူဝ်းၵပ်ႉၵိၼ်းၶဝ်ႈၼမ်ႉတင်းၵိၼ် ၼင်ႇႁိုဝ် ၵူၼ်းၸိူဝ်းၵပ်ႉၵိၼ်းတေလူတ်းလူင်း ၽတ်ႉၽဵင်ႇ ၵၼ်ၼၼ်ႉ ၶဝ်သိုပ်ႇ တုၵ်းယွၼ်း ႁႂ်ႈႁႃတၢင်းဢွၵ်ႇ ၵၢၼ်မိူင်း ၼႂ်းယူႇၶရဵၼ်း ၼင်ႇႁိုဝ် မၢၵ်ႇၶဝ်ႈတဝ်ႈၼမ်ႉ တေဢွၵ်ႇၼႂ်း ယူႇၶရဵၼ်းမႃးလႆႈ ၼင်ႇႁိုဝ်လွၵ်းၵၢတ်ႇလုမ်ႈၾႃႉ တေမၼ်ႈၵိုမ်းဝႃႈၼႆ။

တႆးလွတ်ႈလႅဝ်း