ၼမ်ႉထူမ်ႈ ၼႆႇၵျီးရီးယႃး ၵူၼ်းလူႉသဵင်ႈတၢႆ ဢမ်ႇယွမ်း 600 ၵေႃႉ

လူင်ပွင်ၸိုင်ႈ ၼႆႇၵျီးရီးယႃး လႆႈဢွၵ်ႇမႃးလၢတ်ႈထိုင် လွင်ႈၼမ်ႉထူမ်ႈႁၢဝ်ႈႁႅင်းလိူဝ်ပိူၼ်ႈ ၼႂ်းႁွပ်ႈလၢႆသိပ်းပီႊၼႆႉဝႃႈ မီးၵူၼ်းလူႉသဵင်ႈတၢႆ ဢမ်ႇယွမ်း 600 ၵေႃႉယဝ်ႉလႄႈ မီးၵူၼ်းမိူင်း လႆႈၶၢႆႉပၢႆႈႁႃတီႈလွတ်ႈၽေးဢမ်ႇယွမ်း ၼိုင်ႈလၢၼ်ႉသၢမ်သႅၼ်ပၢႆ ၼႆယူႇ။

ႁွင်ႈၵၢၼ်လူင်ၽၢႆႇသုၼ်ႇလႆႈသုၼ်ႇပဵၼ်ၵူၼ်း ၼႆႇၵျီးရီးယႃး လၢႆးငၢၼ်းဝႃႈ တေႃႇထိုင်ၼႂ်းဝၼ်းထီႉ 16 October 2022 ၼႆႉ ႁူဝ်ၼပ်ႉၵူၼ်းလူႉသဵင်ႈတၢႆ ယွၼ်ႉၼမ်ႉထူမ်ႈ မီး 603 ၵေႃႉ လႄႈ လႆႈဝႃႈတိူဝ်းၶိုၼ်ႈလိူဝ်သေဝူင်ႈပူၼ်ႉ 500 ၵေႃႉ၊ လွင်ႈတၢင်းဢၼ်ၼိုင်ႈ ဢၼ်ႁဵတ်းႁႂ်ႈ ၵူၼ်းလူႉသဵင်ႈတၢႆ တိူဝ်းၶိုၼ်ႈမႃးၼမ်ၼၼ်ႉၵေႃႈ ယွၼ်ႉၽၢႆႇလူင်ပွင်ၸိုင်ႈၼႂ်းပိုၼ်ႉတီႈၼၼ်ႉ ဢမ်ႇလႆႈမီးၵၢၼ်ဝၢင်းၽႅၼ် ႁပ်ႉမိုဝ်းၸွမ်း ၼမ်ႉထူမ်ႈဝႆႉလႄႈ ႁဵတ်းႁႂ်ႈႁိူၼ်းယေး လူႉလႅဝ်သွင်သႅၼ်လင် ပိုၼ်ႉတီႈၵၢၼ်ၽုၵ်ႇသွမ်ႈလူႉသုမ်း သွင်သႅၼ်ဢေႇၵႃႉပၢႆ ယူႇယဝ်ႉ။

ၼႆႇၵျီးရီးယႃးၼႆႉ လၢတ်ႈလႆႈဝႃႈ ထူပ်းၽေးၼမ်ႉထူမ်ႈမႃးၸွမ်းၶၢဝ်းယူႇၵူႈပီႊ ၵူၺ်းၵႃႈ ၼႂ်းပီႊၼႆႉ ငဝ်းလၢႆးႁၢႆႉႁႅင်းမႃးလိူဝ်ၵဝ်ႇတေႉတေႉဝႃႈဝႃႈ ၽူၼ်ၵေႃႈတူၵ်းႁႅင်းလိူဝ်ၵဝ်ႇသေ ယွၼ်ႉလွင်ႈလႅၵ်ႈလၢႆႈၾိင်ႈၾႃႉရႃႇသီႇ ၼႆယူႇ၊ လိူဝ်သေၼၼ်ႉ ၼမ်ႉထူမ်ႈၼႆႉၵေႃႈ ပဵၼ်ဢၼ်လီမႆႈၸႂ် ၵဵဝ်ႇလူၺ်ႈလွင်ႈၽႄႈလၢမ်းတၢင်းပဵၼ် တေတိူဝ်းၶိုၼ်ႈမႃးထႅင်ႈ သေဢမ်ႇၵႃး ၵၢၼ်တေႃႉသူင်ႇ ၶဝ်ႈၼမ်ႉတၢင်းၵိၼ် ထၢၼ်ႁိၼ်ၸိူဝ်းၼႆႉၵေႃႈ လႆႈၵိုတ်းယင်ႉၵႂႃႇ မိူၼ်ၵၼ်ၼႆယူႇ။

ၽူႈမီးပုၼ်ႈၽွၼ်းၵေႃႉၼိုင်ႈၵေႃႈလၢတ်ႈဝႃႈ ပႅၵ်ႉသမ်ႉဝႃႈ မီးၵၢၼ်ႁူမ်ႈမိုဝ်းၵၼ် ပၼ်ၾၢင်ႉဝႆႉ လူင်ႈၼႃႈယူႇသေတႃႉ ၵူၺ်းၵႃႈ ၸုမ်းႁဵတ်းၵၢၼ်လၢႆလၢႆၸႄႈမိူင်းၵေႃႈ ယင်းဢမ်ႇပႆႇလႆႈ မီးၵၢၼ်ႁၢင်ႈႁႅၼ်းဝႆႉ တွၼ်ႈတႃႇၽေးၼမ်ႉထူမ်ႈၼႆႉလႄႈ ႁဵတ်းႁႂ်ႈမီးလွင်ႈတုမ်ႉတိူဝ်ႉမႃး 27 ၸႄႈမိူင်း ဢၼ်မီး 36 ၸႄႈမိူင်းၼၼ်ႉ ၼႆယူႇ။

မိူဝ်ႈပီႊပူၼ်ႉမႃးၼၼ်ႉ ပၢႆးမၢၵ်ႈမီး ၼႆႇၵျီးရီးယႃးၼႆႉၵေႃႈ လႆႈဝႃႈ တူၵ်းတႅမ်ႇႁႅင်းတေႉတေႉသေ ၶၼ်ငိုၼ်းၵီႈပွင်းၼမ်မႃး၊ ၶူင်းၵၢၼ်လွင်ႈၵိၼ်ယႅမ်ႉလုမ်ႈၾႃႉ လႄႈတင်း မုၵ်ႉၸုမ်းလွင်ႈၵိၼ်ယႅမ်ႉ လႄႈၵၢၼ်ၽုၵ်ႇသွမ်ႈ ၸၢတ်ႈၸိုင်ႈလုမ်ႈၾႃႉ လႆႈလၢတ်ႈဝႆႉ မိူဝ်ႈလိူၼ်ပူၼ်ႉမႃးၼၼ်ႉဝႃႈ ၼႆႇၵျီးရီးယႃး ၶဝ်ႈပႃးၼႂ်းမိူင်းဢၼ် တူၵ်းယူႇၼႂ်း လွင်ႈၵိၼ်ယႅမ်ႉဢမ်ႇၵုမ်ႇထူၼ်ႈ ဝႃႈၼႆ။

လိူဝ်သေၼၼ်ႉ ၽၢႆႇၾိင်ႈၾႃႉရႃႇသီႇ ၼႆႇၵျီးရီးယႃးၵေႃႈ ပၼ်ၾၢင်ႉဝႃႈ ၼမ်ႉတေၸၢင်ႈထူမ်ႈၵႂႃႇတေႃႇပေႃးထိုင် လိူၼ် November 2022 ၼႆႉထႅင်ႈ ဝႃႈၼႆ။

တႆးလွတ်ႈလႅဝ်း