ၼၢင်းယိင်း​ၵေႃႉၼိုင်ႈထုၵ်ႇၸၵ်ႉၶုတ်ႈႁိမ်ဢဝ်ထူင်ငိုၼ်း တီႈဝဵင်းတူၼ်ႈတီး

မိူဝ်ႈဝၼ်းထီႉ 7 July 2022 ( လိူၼ်ပႅတ်ႇမႂ်ႇ 10 ၶမ်ႈ ပီႊတႆး 2116 ၼီႈ ) ယၢမ်းဝၢႆးဝၼ်း 14:40 မူင်း ၼႆႉၵူၼ်းၸၢႆး​ၵေႃႉၼိုင်ႈဢမ်ႇႁူႉၸိုဝ်ႈ ၸၵ်ႉၶုတ်ႈႁိမ်ဢဝ်ထူင်ငိုၼ်း ၼၢင်းယိင်း​ၵေႃႉၼိုင်ႈ  တီႈႁိမ်းၵျွင်း ILBC  ၊ ပွၵ်ႉ​ယေႇ​ဢေးၵႂိၼ်း (ပွၵ်ႉၼမ်ႉၵတ်း) ၊ ဝဵင်းတူၼ်ႈတီး မိူင်းတႆးပွတ်းၸၢၼ်းဝႃႈၼႆ။

ၼၢင်းယိင်း​ၵေႃႉလႆႈၶၢမ်ႇႁိမ်ဢဝ်ထူင်ငိုၼ်းၼၼ်ႉ လၢတ်ႈ​ဝႃႈ “ ထုၵ်ႇႁိမ်ထူင်ငိုၼ်းၵႂႃႇ​တႄႉ ပႃးၵႂႃႇငိုၼ်း 3 သႅၼ် ​လႄႈ မၢႆၽၢင်ၵူၼ်းၵိုၵ်းမိူင်းၶႃႈ​ဢေႃႈ ၊ ၶႂ်ႈယွၼ်းတီႈ ၼွင်ႉဢၼ်ႁိမ်ဢဝ်ၵႂႃႇၼၼ်ႉ ၶႂ်ႈႁႂ်ႈပၼ်ၶိုၼ်း မၢႆၽၢင်ၵူၼ်းၵိုၵ်းမိူင်း​လႄႈ ၶူဝ်းၶွင်ဢၼ်မီးၼႂ်းမၼ်းၸိူဝ်းၼႆႉၵူၺ်းၶႃႈ ငိုၼ်း​တႄႉဢဝ်ၵႂႃႇဢမ်ႇပဵၼ်သင် ၊ ၶႃႈႁွင်ႉပၢဝ်ႇဝႃႈ ပၼ်ၶိုၼ်းမၢႆၽၢင်ၵူၼ်းၵိုၵ်းမိူင်း​ၵေႃႈလႆႈယဝ်ႉၼႆ မၼ်းသမ်ႉၵူဝ်​သေ ဢႅၼ်ႇပၢႆႈတိၵ်းတိၵ်း သင်ၽႂ်ၵဵပ်းလႆႈ သင်ၽႂ်ႁၼ်​ၵေႃႈ ​တေတွပ်ႇၵုင်ႇၶိုၼ်းၶႃႈ ´´ၼႆ လၢတ်ႈ​ၼႄၼင်ႇၼႆ ။

မိူဝ်ႈပူၼ်ႉမႃးဝၼ်းထီႉ 28 June 2022 ၼၼ်ႉ​ၵေႃႈ ယၢမ်းႁူဝ်ၶမ်ႈ ၵူၼ်းၼုမ်ႇ 2 ​ၵေႃႉ ဢဝ်ၽႃႉလမ်းၽၼ်း​သေ ၸၵ်ႉၶုတ်ႈႁိမ်ဢဝ်ၶူဝ်းၶွင် တီႈသူၼ်မွၵ်ႇမျႃႉၵၢၼ်ႇတႃႇ  ပွၵ်ႉၵုင်း​ႁေႃယွင်ႁူၺ်ႇ မိူၼ်ၵၼ်၊ ၵူၼ်းမိူင်း​ၵေႃႈ မီးလွင်ႈမႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈ ၼႂ်းလိူၼ် June ၼႆႉၵူၺ်း 1 ဝၼ်းလႂ် လူတ်ႉၶိူင်ႈထုၵ်ႇလၵ်ႉဢမ်ႇယွမ်း  3 လမ်း လၢၼ်ႉဢၼ်ထုၵ်ႇၽွၵ်ႈ​လၵ်ႉဢဝ်ၶူဝ်းၶွင် မီး 6 လၢၼ်ႉယဝ်ႉ ဝႃႈၼႆ။ ဝၢႆး​သေၶွင်ႇသီႇသိုၵ်းမၢၼ်ႈ ယိုတ်းဢၢမ်းၼၢတ်ႈမႃးၼႆႉ ၽူႈလၵ်ႉၵူၼ်းၸူၼ်ၸိူဝ်းၼႆႉ လိူင်ႇၼမ်မႃးၵူႈမိုဝ်ႉၵူႈ ဝၼ်း​ ပႅၵ်ႉသမ်ႉဝႃႈပဵၼ်တီႈ ​ၸႄႈဝဵင်းဢၼ်ပလိၵ်ႈမၢၼ်ႈပၵ်းသဝ်း​သေတႃႉ ဢမ်ႇၵုမ်းထိင်းလႆႈ၊ လိူဝ်သေ ၼမ်ၶိုၼ်ႈမႃးလွႆးလွႆးၵူၺ်း ဝႃႈၼႆ။

တႆးလွတ်ႈလႅဝ်း