ၼႃႈလိၼ်သိုၵ်းမၢႆ−1 RCSS/SSA ၸတ်းႁဵတ်းပၢင်ႁူမ်ၸူမ်းဝၼ်းၵိူတ်ႇ ၸဝ်ႈၼၢင်းႁေႃၶမ်းထႆး တူၼ်ထီႉ 10

လွႆၵေႃႇဝၼ်း ၼႃႈလိၼ်သိုၵ်းမၢႆ−1 RCSS/SSA လႆႈၸတ်းႁဵတ်း ပၢင်ယုၵ်ႉယွင်ႈဢဝ်ၵုင်ႇမုၼ် ႁူမ်ၸူမ်းဝၼ်းၵိူတ်ႇ ၸဝ်ႈတၢင်းႁေႃၶမ်းထႆး တူၼ်ထီႉ 10 ဢႃႇယုထူၼ်ႈထိုင် (46) ဝႃႇသႃၼၼ်ႉၼႆသေ မီးၽူႈယႂ်ႇၵူၼ်းလူင်ၼႂ်းမုၵ်ႉၸုမ်း လႄႈပေႃႈမႄႈၵူၼ်းမိူင်း၊ ၵူၼ်းသိုၵ်း ၶိုၼ်ႈႁွတ်ႈယွၼ်းသူးတင်းၼမ် ဝႃႈၼႆ။

မိူဝ်ႈဝၼ်းထီႉ 3 June 2024 (လိူၼ်းႁူၵ်းလွင်ႈ 12 ၶမ်ႈ ပီႊတႆး 2118 ၼီႈ) တူၵ်းမႅၼ်ႈဝၼ်းၶွပ်ႈၶူပ်ႇ ၸဝ်ႈၼၢင်းႁေႃၶမ်းထႆး တူၼ်ထီႉ 10 ဢႃႇယူႉၶွပ်ႈထူၼ်ႈ (46) ဝႃႇသႃ ၼႆလႄႈ ဢဝ်တိုဝ်ႉတၢင်းဝၼ်းၼႆႉသေ ယူႇတီႈမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်တႆး/တပ်ႉသိုၵ်းၸိုင်ႈတႆး (RCSS/SSA) ၼႃႈလိၼ်သိုၵ်းမၢႆ−1 ဢွၼ်ႁူဝ်ပေႃႈမႄႈၵူၼ်းမိူင်း ဢိၵ်ႇၵေႃႉသိုၵ်းၵေႃႉႁၢၼ်ၶဝ်သေ ၸတ်းႁဵတ်းပၢင်ယုၵ်ႉယွင်ႈ ဢဝ်ၵုင်ႇမုၼ် ႁူမ်ၸူမ်းၼႂ်းဝၼ်းၵိူတ်ႇ ၶွပ်ႈၶူပ်ႇ ၸဝ်ႈၼၢင်းႁေႃၶမ်းထႆး ၼႆယဝ်ႉ။

ၸွမ်းၼင်ႇၶပ်းမၢႆမီးၼၼ်ႉသေ ယူႇတီႈၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ−1 လႆႈလူႇသၢၵ်ႈ ဢုပ်းငိုၼ်းဢုပ်းၶမ်းသေ ဝၢႆးၼၼ်ႉယဝ်ႉ ၽူႈယႂ်ႈၵူၼ်းလူင်၊ ၵူၼ်းသိုၵ်း၊ ၵူၼ်းမိူင်း ႁူမ်ႈၵၼ်ၵၼ်ႇတေႃးသၢၵ်ႈဢုပ်းမွၵ်ႇ၊ ၸပ်းတဵၼ်း တိူင်ႇၵၢဝ်ႇပၼ်ပွၼ်း ၸဝ်ႈၼၢင်းႁေႃၶမ်းၸိုင်ႈထႆး လႄႈသိုပ်ႇပိုတ်ႇၽဵင်းၵႂၢမ်း (သတူတီ လႄႈ ၽဵင်းသၼ်သိူၼ်) ဝၢႆးၼၼ်ႉယဝ်ႉ ၽူႈၶိုၼ်ႈႁွတ်ႈတင်းသဵင်ႈ ၶိုၼ်းသိုပ်ႇယွၼ်းသူပၼ်ၼၢင်းႁေႃၶမ်းထႆး ႁႂ်ႈယူႇလီသုင်ဝၢၼ် ဢႃႇယုယိုၼ်းယၢဝ်းၵႂႃႇၶၢဝ်းႁိုင် ၼႆယဝ်ႉ။

ဝၢႆးတိူင်ႇၵၢဝ်ႇယွၼ်းသူးထိုင် ၼၢင်းႁေႃၶမ်းထႆးယဝ်ႉ ပိုၼ်ၽၢဝ်ႇ ပၢင်ယုၵ်ႉယွင်ႈဢဝ်ၵုင်ႇမုၼ် ဝၼ်းၵိူတ်ႇၸဝ်ႈၼၢင်ႈႁေႃၶမ်းထႆး တူၼ်ထီႉ 10 ယဝ်ႉတူဝ်ႈလီငၢမ်းၼႆယဝ်ႉ။

တႆးလွတ်ႈလႅဝ်း